Sunday, 22 November 2026
Advertisement
Ooredoo — Airfibre (leaderboard)
ސިޔާސީ

އުސްތާޒް ޢަބްދުއްރަޙްމާން ޔޫނުސް އަދާލަތު ޕާޓީއާ ގުޅިވަޑައިގެންފި

ގުރުއާނުގެ ދާއިރާއިން ގައުމީ އިނާމު ހާސިލުކުރައްވާފައިވާ އަލްއުސްތާޒް އަބްދުއްރަހްމާން ޔޫނުސް އަދާލަތު ޕާޓީއާ ގުޅިވަޑައިގަތުމުން އެ ޕާޓީން މަރުހަބާ ކިޔައިފިއެވެ.

ފޮޓޯ: އަދާލަތު ޕާޓީ
ފޮޓޯ: އަދާލަތު ޕާޓީ

ކީރިތި ޤުރުއާނުގެ ދާއިރާއިން ފާހަގަކޮށްލެވޭ ތަޖުރިބާކާރެއް ކަމަށްވާ އަލްއުސްތާޒް ޢަބްދުއްރަޙްމާން ޔޫނުސް، އަދާލަތު ޕާޓީއާ ގުޅިވަޑައިގެންފިއެވެ.

އުސްތާޒް ޢަބްދުއްރަޙްމާން އެ ޕާޓީއާ ގުޅިވަޑައިގަތުމާ ގުޅިގެން، އަދާލަތު ޕާޓީގެ އިސް ބޭފުޅުންނާއި ރަސްމީ އެކައުންޓްތަކުން ވަނީ އޭނާއަށް ހޫނު މަރުހަބާއެއް ކިޔާފައެވެ. އެގޮތުން އެ ޕާޓީގެ އިސްފަނޑިޔާރު ޑރ. މުޙައްމަދު އިޔާޟް ޢަބްދުއްލަޠީފް ވިދާޅުވީ، އަދާލަތު ޕާޓީ އަބަދުވެސް ދާނީ ސާބިތުކަމާ އެކު ކުރިއަށް ކަމަށެވެ.

އުސްތާޒް ޢަބްދުއްރަޙްމާނަކީ ޤުރުއާނާއި، ޝަރީއާ އަދި އިސްލާމީ ތައުލީމުގެ ދާއިރާއިން މަތީ ތައުލީމު ހާސިލުކުރައްވައިގެން ހުންނެވި، ކިޔަވައިދެއްވުމުގެ ދާއިރާގައި ގިނަގުނަ ޚިދުމަތްތަކެއް ކުރައްވާފައިވާ ބޭފުޅެކެވެ. އޭނާ މިހާރު ވެސް ގެންދަ ވަނީ ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ޝަރީޢާ އެންޑް ލޯގެ ސީނިއަރ ލެކްޗަރާއެއްގެ މަޤާމު ފުރުއްވަމުންނެވެ.

ތައުލީމީ ދާއިރާގައި ކުރެއްވި ޚިދުމަތްތަކުގެ ތެރޭގައި، ކީރިތި ޤުރުއާނާ ބެހޭ މަރުކަޒުގެ ޑެޕިއުޓީ ޕްރިންސިޕަލްކަމާއި، އިސްލާމިކް ޔުނިވަރސިޓީގެ ޕާޓް-ޓައިމް ލެކްޗަރާއެއްގެ މަޤާމު ހިމެނެއެވެ. މީގެއިތުރުން "ތަޖުވީދުލް މުޔައްސަރު" ރިފަރެންސް ފޮތާއި، ޤުރުއާން މުދައްރިސުން ތަމްރީނުކުރާ ކޯސްތަކުގެ މޮޑިއުލްތައް އެކުލަވައިލުމުގައި ވެސް އޭނާ ވަނީ އިސް ދައުރެއް އަދާކުރައްވާފައެވެ.

ޤުރުއާން އުނގަންނައިދިނުމުގެ ދާއިރާއިން ކުރެއްވި އިޚުލާސްތެރި މަސައްކަތްތަކަށްޓަކައި، މިއަހަރުގެ ސެޕްޓެމްބަރު މަހު ސަރުކާރުން ވަނީ އޭނާއަށް ހިތްވަރު ދިނުމުގެ ޤައުމީ އިނާމު އަރުވާފައެވެ. އަދާލަތު ޕާޓީން ބުނީ އުސްތާޒް ޢަބްދުއްރަޙްމާން ފަދަ އިލްމީ ބޭފުޅަކު ޕާޓީއާ ގުޅުމަކީ އެ ޕާޓީގެ ހަރަކާތްތަކަށް ލިބުނު ބޮޑު ކުރިއެރުމެއް ކަމަށެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.