ހިޔާ ފްލެޓުތަކުގެ ބިއްލޫރިގަނޑު ތަޅައިގެން ދިޔައީ ކޮލިޓީ ދަށް ވެގެނެއް ނޫން: އެޗްޑީސީ
ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓް ޓަވަރުތަކުގެ ބައެއް ފްލެޓްތަކުގައި ހުރި ކުޑަދޮރުތަކުގެ ބިއްލޫރިގަނޑު ތަޅައިގެން ދިޔައީ ކޮލިޓީ ދަށްވެގެން ނޫން ކަމަށް ހައުސިންގް ޑިވެލޮޕްމެންޓް ކޯޕަރޭޝަން (އެޗްޑީސީ)އިން ބުނެފިއެވެ.
މިކަމާ ގުޅޭގޮތުން "ދެން"އަށް މައުލޫމާތު ދެއްވަމުން އެޗްޑީސީގެ މީޑިއާ އޮފިޝަލު ވިދާޅުވީ ހިޔާ ފްލެޓްތަކުގެ ބިއްލޫރިގަނޑު ތަޅައިގެން ދިޔައީ އެޗް3އާއި އެޗް 4އިން ކަމަށާއި މި ބިއްލޫރިގަނޑު ތަޅައިގެން ދިޔައީ ކޮލިޓީ ދަށް ވެގެން ކަމަށް ގަބޫލު ނުކުރާ ކަމަށެވެ.
އެގޮތުން އެޗް 3 ގެ ބިއްލޫރިގަނޑު ތަޅައިގެން ދިޔައީ އެއްޗަކުން ޖެހިގެންކަން ތަހުގީގަށް އެނގިފައިވާ ކަމަށާއި އެޗް 4 ބިއްލޫރި ތަޅައިގެން ގޮސްފައި ވަނީ ބިއްލޫރިގަނޑު ނައްޓައިފައި ހުއްޓައި ކަމަށް އެޗްޑީސީގެ މީޑިއާ އޮފިޝަލު ވިދާޅުވިއެވެ. އަދި އެޗް 4ގެ ބިއްލޫރިގަނޑު ތަޅައިގެން ދިޔަ ސީދާ ސަބަބެއް ނޭނގޭ ކަމަށް ވެސް ވިދާޅުވިއެވެ.
ހިޔާ ފުލެޓުތަކުގެ ދޮރުގައި ބިއްލޫރި ހަރުކޮށްފައި ހުންނަތާ ދެ އަހަރަށް ވުރެ ގިނަ ދުވަސްވެފައިވާއިރު މިހާތަނަށް ބިއްލޫރިގަނޑު ތަޅައިގެންދިއުމުގެ ހާދިސާއެއް ހިނގައިފައެއް ނުވެއެވެ. އެޗްޑީސީން ބުނެފައި ވަނީ އެ ފުލެޓުތަކުގައި ހަރުކޮށްފައިވާ ބިއްލޫރީގެ ފެންވަރާ މެދު ސުވާލެއް ނެތް ކަމަށެވެ.
