ސިނަމާގައި ތިބެގެން ފިލްމު ބެލުމުން ލިބޭ ހިތްހަމަ ޖެހުން މާ ބޮޑުވާނެ: ސަލްމާން
ބޮލީވުޑްގެ ސުޕާސްޓާ ސަލްމާން ޚާން އެންމެ ފަހުން ކުޅުނު ފިލްމު "އަންތިމް"ގެ ޓްރޭލަރ އިއްޔެ ވަނީ ބަންދްރަަ ކުރްލާ ކޮމްޕްލެކްސްގައި ރިލީޒްކޮށްފައެވެ.
ޓްރެއިލާ ރިލީޒްކުރި ޙަފްލާގައި ބައިވެރިވި ނޫސްވެރިން ވަނީ މި ޙަފްލާގައި ސަލްމާން ޚާންއާ ވަރަށް ގިނަ ސުވާލުތަކެއް ކުރިމަތި ކޮށްފައެވެ. އޭގެ ތެރެއިން އެއް ސުވާލަކީ، ތިއޭޓަރުތަކުގައި "އަންތިމް" ދެއްކުމަށް ނިންމައިފައިވާ އިރު، ފާއިތުވީ ދެ އަހަރު ފިލްމުތައް އޯޓީޓީ މެދުވެރިކޮށް ރިލީޒްކޮށްފައިވުމާ ބެހޭ ގޮތުންނެވެ. އެގޮތުން ބެލުންތެރިން އޯޓީޓީއަށް މިހާރު އާދަވެފައިވާ އިރު، ތިއޭޓަރަށް ސަލްމާންގެ ފިލްމު ބަލަން ދާން ބޭނުންވާނެތޯ ވެސް ވަނީ ސުވާލު ކޮށްފައެވެ.
އެ ސުވާލަށް ޖަވާބު ދެމުން ސަލްމާން ބުނީ، ތިއޭޓަރަށް ގޮސްގެން ފިލްމު ބަލައިގެން އެ ލިބޭ ހިތްހަމަ ޖެހުން، ގޭގައި ތިބެގެން ފޯނުންނާއި ލެޕްޓޮޕުން ފިލްމު ބެލުމަަށް ވުރެ މާ ބޮޑުވާނެ ކަމަށެވެ.
ސަލްމާން ބުނީ، ފިލްމެއް ބެލުމުގެ ހަގީގީ ޖޯޝާއި ފޯރި އަރާނީ، ބޮޑު ސްކްރީނަކުން، ގިނަ ބަޔަކާ އެކީ އެ ފިލްމެއް ބެލުމުން ކަމަށެވެ.
މީގެ އިތުރުން ސަލްމާން ބުނީ، ޚަބަރު ހޯދަން ނޫސްވެރިން ތިއޭޓަރަށް އައި ބާރު މިނުގައި، އަންތިމް ބަލަން ބެލުންތެރިން ވެސް އަންނާނެ ކަމަށް އުންމީދު ކުރާ ކަމަށެވެ.
އަންތިމްއަކީ ސަލްމާން ޕްރޮޑިއުސްކޮށް ލީޑް ރޯލުން ފެނިގެންދާ އެކްޝަން ފިލްމެކެވެ. އަންނަ މަހު 26ގައި ތިއޭޓަރުތަކަށް ރިލީޒްވާ މި ފިލްމުގައި ސަލްމާނާއި އެކު ހަރަކާތްތެރި ވަނީ އޭނަގެ ކޮއްކޮގެ ފިރިމީހާ އާޔުޝް ޝަރްމާއެވެ. އޭގެ އިތުރުން މަހީމާ މަކްވާނާއާއި މަހޭޝް މަންޖްރޭކަރް ވެސް މި ފިލްމުން ފެނިގެން ދާނެއެވެ.
