ޤަރުނު ނިމުމުގެ ކުރިން ރާއްޖެ ނެތިދާނެ ކަމުގެ ބިރު އެބައޮތް: ރައީސް ޞާލިޙް
ތިމާވެށި ހިމާޔަތްކޮށް، ދުނިޔޭގެ ފިނިހޫނުމިން އެއްވަރެއްގައި ހިފެހެއްޓުމަށް އެކަށީގެންވާ މަސައްކަތްތަކެއް ނުކުރެވިއްޖެ ނަމަ، މި ޤަރުނު ނިމުމުގެ ކުރިން ރާއްޖެ ނެތިދާނެ ކަމުގެ ބިރު އެބައޮތް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ސްކޮޓްލެންޑުގެ ގްލާސްގޯގައި މިހާރު ކުރިއަށްދާ، ތިމާވެށީގެ ސަމިޓް ކޮޕް26ގެ ލީޑަރުންގެ ބައްދަލުވުމުގައި ތަޤްރީރު ކުރައްވަމުން ރައީސް ޞާލިޙް ވިދާޅުވީ، ދުނިޔޭގެ ފިނިހޫނުމިން ޕްރި-އިންޑަސްޓިއަލް ލެވެލްގައި ހުރި ވަރަށްވުރެ 2 ޑިގްރީ މައްޗަށް ގޮސްފި ނަމަ އެއީ ރާއްޖެއަށް ދެވޭ "ޑެތް ސެންޓެންސެއް" ކަމަށެވެ.
ދުނިޔޭގެ ފިނިހޫނުމިން 1.5 ޑިގްރީއަށް ވުރެ މަތިނުވެ، ހިފެހެއްޓުމަށް ކުރަން ޖެހޭ ކަންތައްތަކާ ގުޅޭ ގޮތުން މިއަހަރުގެ ކޮޕް ސަމިޓްގައި މަޝްވަރާ ކުރެވޭނެއެވެ.
ރައީސްގެ ތަޤްރީރުގައި އިތުރަށް ވިދާޅުވީ، މޫސުމީ ބަދަލުތަކުގެ ގެއްލުން ދިވެހިންނަށް މިހާރު ވެސް ކުރަމުން އަންނަ ކަމަށެވެ. މިސާލު ނަންގަވަމުން ރައީސް ވިދާޅުވީ، މިމަހު ރައީސް ކުރެއްވި ދަތުރުފުޅުގައި ވަޑައިގަންނެވި ހަ ރަށުގައި ވެސް ރަށް ގިރުމުގެ މައްސަލަތައް ފެންމަތިވެފައިވާ ކަމަށެވެ. އަދި ވިދާޅުވީ، ތިމާވެށީގެ ވާހަކަ އަބަދުވެސް ޖަޒީރާ ޤައުމެއްގެ ރައީސްގެ ހައިސިއްޔަތުން ދައްކަވާނެ ކަމަށާއި، ސަބަބަކީ ތިމާވެއްޓަށް އަންނަ ބަދަލުތަކުގެ ސަބަބުން އެކަމުގެ އަސަރު ކުރާ ޤައުމުތަކުގެ އެންމެ ކުރީގައި ދިވެހި ރާއްޖެ އޮތުން ކަމަށެވެ.
"ރާއްޖެ ފާހަގަވެފައި އޮންނަނީ ދުނިޔޭގެ ތިމާވެއްޓަށް އަންނަމުންދާ ބަދަލުތަކުގެ ސަބަބުން މެޕުން ފޮހެލެވޭނެ ޤައުމެއްގެ ގޮތުގައި." ރައީސް ވިދާޅުވިއެވެ.
ރައީސްގެ ވާހަކަފުޅުގައި އިތުރަށް ވިދާޅުވީ، މިހާރު ތިމާވެށީގެ މައްސަލަ އޮތް ހާލަތުން އަރައިގަތުމަށް ރާއްޖެ އޮތީ ކެތްމަދުވެފައި ކަމަށާއި އެހެން ނަމަވެސް މިކަން ކުރެވޭނީ ހުރިހާ ޤައުމެއްގެ ވެސް އެއްބާރުލުން ލިބިގެން ކަމަށެވެ. މިގޮތުން، މޫސުމީ ބަދަލުތަކުގެ ސަބަބުން ނުރައްކަލަށް ހުށަހެޅޭ ޤައުމުތަކަށް އެހީވާން ތަަރައްޤީވެފައިވާ ޤައުމުތަކުން ޕެރިސް ބައްދަލުވުމުގައި ވައުދުވި 100 ބިލިޔަން ޑޮލަރު ނުލިބޭތީ ވެސް ރައީސްގެ ވާހަކަފުޅުގައި ވަނީ ކަންބޮޑުވުން ފާޅު ކުރައްވައިފައެވެ. އަދި ވިދާޅުވީ، މިއީ ވަކިވަކި ޤައުމުތަކުން ނިކުމެ ހައްލު ކުރެވޭ ވަރަށްވުރެ ބޮޑު މައްސަލައެއް ކަމަށާއި ޤައުމުތައް އެކުވެ މަސައްކަތް ކުރުން މުހިންމު ކަަމަށެވެ.
ތަޤްރީރު ނިންމަވައިލައްވަމުން ރައީސް ވިދާޅުވީ، ބަލިމަޑުކަމެއްގެ ތެރޭގައި ވެސް އެންމެން އެއް މޭޒަކަށް ޖަމާވީ، މައްސަލައިގެ މުހިންމު ކަމުން ކަމަށާއި މިހެންކަމުން، މިކަމުގައި އެއްވެސް މީހަކު މާޔޫސްވިޔަ ދީގެން ނުވާނެ ކަމަށެވެ. އަދި މިއީ މޫސުމަށް އަންނަ ބަދަލުތަކަށް ހައްލު ހޯދަން ލިބޭ އެންމެ ފަހު ފުރުސަތަށް ވުން ވެސް އެކަށީގެންވާ ކަމަށާއި ފުރުސަތުގެ ބޭނުން ހިއްޕެވުމަށް ލީޑަރުންގެ ކިބައިން ރައީސް އެދިވަޑައިގެންނެވިއެވެ.
އެހެންވީމާ އަވަހަށް މިގައުމު ވިއްކާލާ….ބަރާބަރު…..އިންޑިޔާ އޮތީ ދެތިން މިލިޔަނަށް މިގައުމު ގަންނަ ގޮތަށް. ސާބަހޭ ރައީސޫ….!!!
ފޮނުވާ ކޮމެންޓު ނުޖަނާނެ.ވިކިފަ….މިއީ ދެވަނަ ކޮމެންޓު.
ފައިސާ ހޯދުމުގެ ދަހިވެތި ކަމުގައި ރަށަކަށް ރަށެއް ޣަރަޤުވާ ކަމަށް ބުނީމާ މިތާގައި އިންވެސްޓްކުރަން އަންނާނީ ކާކު؟