ރައީސް އަބްދުﷲ ޔާމީންގެ ސަރުކާރުގައި ބިލިއަނުން ދަރަނި ނަގައިގެން ހިންގި މަޝްރޫއުތައް ދެކޮޅު ނުޖެހޭކަމަށް ވިދާޅުވެ އެފަދަ މަޝްރޫއުތަކާ މެދު ފިނޭންސް މިނިސްޓަރު އަމީރު މިއަދު ކަންބޮޑުވުން ފާޅުކުރައްވައިފިއެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅައިފައިވާ ބަޖެޓު ބަހުސްގައި މެމްބަރުންގެ ވާހަކަތަކަށް ޖަވާބުދާރީވާން މިއަދުގެ ޖަލްސާގައި ލިބުނު ވަގުތުގައި ވާހަކަ ދައްކަވަމުން އަމީރު ވަނީ ކުރީ ސަރުކާރުން ހިންގި މަޝްރޫއުތައް ތަހުގީގު ކުރުމަށް ގޮވައިލައްވައިފައެވެ. އެގޮތުން ދައުލަތުގެ ދަރަނި މިއަދު އިންތިހާއަށް މައްޗަށް ގޮސްފައި ވަނީ ކުރީ ސަރުކާރުން ބޮޑެތި އަދަދުތަކުން ދަރަނި ނަގައިފައިވާތީކަމަށް މިނިސްޓަރު ވިދާޅުވިއެވެ.
އަމީރު ވަނީ ސަރުކާރުން ޒިންމާވާގޮތަށް ނަގައިފައިވާ ސީދާ ދަރަންޏާއި ދައުލަތުން ސޮވެރިން ގެރެންޓީ ދީގެން ނަގައިފައިވާ ދަރަނިތަކުގެ ތަފްސީލު ވެސް މިއަދު ހިއްސާކޮށްދެއްވައިފައެވެ.
މިނިސްޓަރު އަމީރު ވިދާޅުވި ދަރަނީގެ ތަފްސީލުގެ ހުލާސާ؛
- ރައީސް މައުމޫން އަބްދުލްގައްޔޫމްގެ ސަރުކާރު - 6.2 ބިލިއަން ރުފިޔާ
- ރައީސް މުހައްމަދު ނަޝީދުގެ ސަރުކާރު - 11.3 ބިލިއަން ރުފިޔާ
- ރައީސް މުހައްމަދު ވަހީދު ހަސަން މަނިކުގެ ސަރުކާރު - 6.2 ބިލިއަން ރުފިޔާ
- ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރު - 39.6 ބިލިއަން ރުފިޔާ
- ރައީސް އިބްރާހިމް މުހައްމަދު ސޯލިހުގެ ސަރުކާރު - 34 ބިލިއަން ރުފިޔާ
މިނިސްޓަރު އަމީރު ވިދާޅުވީ ރައީސް ސޯލިހު ދަރަނި ނަންގަވަނީ އިގްތިޞޯދު ދަށަށް ގޮސް ދަރަނި ނަގަން ޖެހޭ ހާލަތަށް ކަންކަން ދިޔުމުން ކަމަށެވެ. އެއާ ހިލާފަށް ރައީސް ޔާމީން ދަރަނި ނެންގެވީ އިގްތިޞޯދީ ހާލަތު ރަނގަޅަށް އޮތް ދުވަސްވަރެއްގައިކަމަށް އަމީރު ވިދާޅުވިއެވެ. ދުނިޔޭގެ އިގްތިޞޯދަށް އެއްވެސް ކާރިސާއެއް އައިސްފައި ނުވާ އެ ދުވަސްވަރު ބިލިއަނުން ދަރަނި ނަގައިގެން އޭރުގެ ސަރުކާރުން ކުރެއްވީ ކޮން ކަމެއްތޯ އަމީރު ސުވާލު ކުރެއްވިއެވެ.
މީގެ އިތުރުން ކުރީ ސަރުކާރުން ކޮންޓްރެކްޓު ކުރީ 58.9 ބިލިއަން ރުފިޔާގެ މަޝްރޫއު ކަމަށާއި މި ސަރުކާރުން މިހާތަނަށް 51.1 ބިލިއަން ރުފިޔާ ކޮންޓްރެކްޓު ކޮށްފައިވާކަމަށް ވެސް މިނިސްޓަރު ވިދާޅުވިއެވެ.
މިއަދުގެ މަޖިލިސް ޖަލްސާގައި ބައެއް މެމްބަރުން ވަނީ ބަޖެޓުގައި ހިމަނައިފައިވާ ބައެއް މަޝްރޫއުތައް ނުފެށި ލަސްވާތީ ކަންބޮޑުވުން ފާޅުކޮށްފައެވެ. އެކަމަށް ޖަވާބުދެއްވަމުން މިނިސްޓަރު އަމީރު ވިދާޅުވީ މަޝްރޫއުތައް ނުފެށި ލަސްވީ ކޮވިޑް-19ގެ ސަބަބުން ކަމަށެވެ. އެހެން ނަމަވެސް މިހާރު އިގްތިޞޯދު ވަރަށް ބޮޑަށް ރަނގަޅުވަމުން ދިޔުމާ އެކު އަންނަ އަހަރުގެ ބަޖެޓުގައި ހިމަނައިފައިވާ މަޝްރޫއުތައް ފަށައި ނިންމަވާނެކަމަށް އަމީރު ވިދާޅުވިއެވެ.
ކުރީގެ ސަރުކާރުން ހިންގި މަޝްރޫއުތަކުގެ ފެންވަރު ދަށްކަމުން އަލުން އެ މަޝްރޫއުތަކަށް މިސަރުކާރުން ހަރަދު ކުރަންޖެހިފައިވާކަމަށް ވިދާޅުވެ މިނިސްޓަރު އަމީރު ވަނީ މިސަރުކާރުގެ މަޝްރޫއުތަކުގެ ފެންވަރު ރަނގަޅުވާނެކަމަށް ވިދާޅުވެފައެވެ. މިނިސްޓަރު އަމީރު ވަނީ ކުރީ ސަރުކާރުން ހިންގި ފެންވަރު ދަށް މަޝްރޫއުތައް ތަހުގީގު ކުރުމަށް ގޮވައިލައްވައިފައެވެ.
މިނިސްޓަރު އަމީރު ވިދާޅުވި ގޮތުގައި މިސަރުކާރުން ދަނީ ދަރަނި ކުޑަކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން އުފެއްދުންތެރިކަމުގެ ނިސްބަތުން 122 އިންސައްތައިގައި ހުރި ދަރަނި އަންނަ އަހަރު ނިމޭއިރު 104 އިންސައްތައަށް ތިރިވާނެ ކަމަށާއި 2023ވަނަ އަހަރުގެ ނިޔަލަށް އެ އަދަދު 101 އިންސައްތައަށް ތިރިވާނެ ކަމަށް ވެސް ދައުލަތުން ލަފާކުރެއެވެ.
ކޮމެންޓް