ކެޓްރީނާއާ ވިކީ ހަނީމޫނަށް ނުގޮސް، ދިރިއުޅޭ ގެ ހަދަނީ
އަންނަ ޑިސެމްބަރު މަހު ކައިވެނިކުރަން ތައްޔާރުވަމުންދާ ބޮލީވުޑް ޖޯޑު ކެޓްރީނާ ކެއިފްއާއި ވިކީ ކައުޝާލް ކައިވެންޏަށް ފަހު ހަނީމޫނަށް ނުގޮސް ދެމީހުން ދިރިއުޅޭ ގެ ހަދަން ވަގުތު ދޭން ނިންމައިފައިވާކަމަށް ޚަބަރުތަކުން ބުނެފިއެވެ.
ކެޓްރީނާއާއި ވިކީގެ ވަރަށް ގާތް ފަރާތަކާ ހަވާލާދީ އިންޑިއާގެ މީޑިއާތަކުން ބުނީ ޑިސެމްބަރު މަހު އޮންނަ ކައިވެނީގެ ހަފްލާއަށް ތައްޔާރުވުމުގެ ގޮތުން ދެތަރިން ވެސް މިހާރު ވަނީ ގާތްގަނޑަކަށް މަސްދުވަހުގެ ޗުއްޓީއެއް ނަގައިފައި ކަމަށެވެ. ކެޓްރީނާ ޝޫޓު ކުރަމުން ދިޔަ "ޓައިގާ 3"ގެ މަސައްކަތް ޑިސެމްބަރު މަހަށް ފަސްކޮށްފައިވާއިރު ވިކީ މަސައްކަތް ފަށަން ތައްޔާރުވަމުންދިޔަ "ސޭމް ބަހާދުރް" ވެސް ޑިސެމްބަރަށް ވަނީ ތާވަލްކޮށްފައެވެ.
އެހެން ނަމަވެސް ދެތަރިން ވެސް ދަނީ އެންޑޯޒްމެންޓުތަކާއި ކޮމާޝަލްތަކުގެ ޝޫޓިންތަކުގައި މިހާރު ހަރަކާތްތެރިވަމުންނެވެ. ރިޕޯޓުތައް ބުނާގޮތުން ކައިވެނީގެ ތައްޔާރީތައް ދެމީހުންގެ ގޭގައި ވެސް ދަނީ ވަމުންނެވެ. ކައިވެނީގެ ހަފްލާ ތާވަލްކޮށްފައިވާ ސީދާ ތާރީހު މިހާތަނަށް ހާމަކޮށްފައި ނުވި ނަމަވެސް ޑިސެމްބަރު މަހުގެ މެދުތެރޭގައި ހަފްލާ އޮންނާނެކަމަށް ބެލެވެއެވެ.
ކެޓްރީނާއާއި ވިކީގެ ކައިވެނީގެ ހަފްލާތައް ހަތަރު ދުވަހަށް ދިގު ދެމިގެން ދާނެކަމަށް ރިޕޯޓުތައް ބުނެއެވެ. އޭގެ ފަހުން ހަފްތާއެއްހާ ދުވަހުގެ ތެރޭގައި ދެމީހުން ވެސް މަސައްކަތަށް ނިކުންނަން ޖެހޭނެއެވެ. އެހެންކަމުން ދެތަރިންގެ ހަނީމޫން ފަސްކޮށްފާނެކަމަށް ރިޕޯޓުތައް ބުނެއެވެ.
ދެތަރިންގެ ގާތް ފަރާތަކުން ބުނީ ހަނީމޫނުގެ ބަދަލުގައި ކައިވެންޏަށް ފަހު ލިބޭ އެއް ހަފްތާގައި ދެތަރިން ވެސް އުޅޭނީ އެމީހުން ދިރިއުޅޭ ގެ ޒީނަންތެރި ކުރުމުގައެވެ. އަދި ޝޫޓިންއަށް ނިކުތުމުގެ ކުރިން ދެމީހުން އެކީގައި ވަގުތު ހޭދަކުރަން ނިންމައިފައިވާކަމަށް ވެއެވެ.
ކައިވެނީގެ ހަފްލާއަށް ކެޓްރީނާ ލާނެކަމަށް ބެލެވެނީ ސަބްޔަސަޗީ ލެހެންގާއެކެވެ. އަނެއްކޮޅުން ވިކީ ލާނީ ކުނާލް ރާވަލް އަދި ރާގަވެންދްރަ ރާތޯރުގެ ސޫޓެކެވެ. ކެޓްރީނާއާއި ވިކީގެ ކައިވެނީގެ ހަފްލާ ބާއްވަނީ ރޯޔަލް ރާޖަސްތާން ތީމަށެވެ. މި ހަފްލާއަކީ މިއަހަރުގެ އެންމެ ބޮޑު ކައިވެނީގެ ހަފްލާއަށް ވާނެ ކަމަށް އޮތީ ބެލެވިފައެވެ.
