ބަންދުގެ ޝަރުތުތައް ފުރިހަމަކޮށްފައިވާ އެއްވެސް މީހެއްގެ ޕާސްޕޯޓް ހިފަހައްޓައިފައެއް ނުވާނެ: އިމްރާން
ބަންދުގެ ޝަރުތުތައް ފުރިހަމަކޮށްފައިވާ އެއްވެސް މީހެއްގެ ޕާސްޕޯޓް ހިފަހައްޓައިފައެއް ނުވާނެ ކަމަށް ހޯމް މިިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ރައްޔިތުންގެ މަޖިލީހުގެ ނައިބުރައީސް އަދި ގަލޮޅު އުތުރު ދާއިރާގެ މެންބަރު އީވާ ޢަބްދުﷲ ލިޔުމުން ޖަވާބު ހޯއްދަވަން ކުރެއްވި ސުވާލަކަށް ދެއްވި ޖަވާބުގައެވެ.
މިނިސްޓަރ އިމްރާން ވިދާޅުވީ އަދަބަށް ލުއިދީ ނުވަތަ މައާފުކޮށް ގޭބަންދަށް ނުވަތަ ރަށު ބަންދަށް ދޫކޮށްފައިވާ ފަރާތްތަކުގެ ތެރެއިން އެ ފަރާތްތަކަށް ކުރި ޝަރުޠުތައް ފުރިހަމަކޮށްފައިވާ އެއްވެސް ފަރާތެއްގެ ޕާސްޕޯޓު ހިފަހައްޓައިފައި ނެތް ކަމަށެވެ. އެހެން ނަމަވެސް ހުކުމް ތަންފީޒުކުރަން ޖެހޭ މީހުންގެ ތެރެއިން އެކި ސަބަބުތަކާހުރެ މުޖުތަމަޢަށް ދޫވެފައިވާ ގިނަ ބައެއްގެ ޕާސްޕޯޓު ހިފަހައްޓައިފައިވާ ކަމަށް މިނިސްޓަރ ވިދާޅުވިއެވެ.
އޭގެ ތެރޭގައި ޑްރަގް ފަރުވާ ފުރިހަމަ ނުކުރުން, ދަރަނި އަދާ ނުކުރުން ފަދަ މައްސަލަތަކުގައި ހުކުމް ކޮށްފައިވާ މީހުން ހިމެނެއެވެ. އެ ފަރާތްތަކުގެ ޕާސްޕޯޓު ހިފަހައްޓައިފައި ވަނީ ތަންފީޒުކުރަން ޖެހޭ ހުކުމްތަކެއް ހުރުމުން ކަމަށާއި އެ ފަދައިން ޕާސްޕޯޓު ހިފެހެއްޓިފައިވާ މީހުންގެ އަދަދު ވަރަށް ގިނަ ކަމަށް ވެސް މިނިސްޓަރ ވިދާޅުވިއެވެ.
