މަޖިލީހުގެ މެންބަރުންގެ މުސާރަށް ދަށް ކުރަން އިދިކޮޅުން ގޮވައިލައިފި
ސަރުކާރުގެ ޚަރަދުތައް ކުޑަ ކުރުމަށް ޓަކައި ރައްޔިތުންގެ މަޖިލީހުގެ މެންބަރުންގެ މުސާރަ ދަށް ކުރަން ޖެހޭ ކަމަށް މަޑުއްވަރީ ދާއިރާގެ ޕީއެންސީ މެންބަރު އާދަމް ޝަރީފް އުމަރު ވިދާޅުވެއްޖެއެވެ.
ފައިސާ ޗާޕުކުރުން ނުވަތަ ދައުލަތުގެ ޕަބްލިކް ބޭންކު އެކައުންޓް (ޕީބީއޭ) އޯވާޑްރޯ ކުރަން ދީފައިވާ ހުއްދައިގެ މުއްދަތު އިތުރުކޮށްފި ނަމަ ޑޮލަރު ލިބުން ދަތިވެ ތަކެތީގެ އަގު ބޮޑުވުން ފަދަ ބޮޑެތި އިގްތިސާދީ މައްސަލަތަކެއް ކުރިމަތިވެދާނެ ކަމުގެ އިންޒާރު މަރުކަޒީ ބޭންކުން ދީފައި ވަނިކޮށް، އެ ހުއްދަ އިތުރު އެއް އަހަރަށް ދަންމައިލާން ފިނޭންސް މިނިސްޓްރީން ރައްޔިތުންގެ މަޖިލީހުގައި މިއަދު ވަނީ އެދިފައެވެ.
މިކަމާ ގުޅިގެން މަޖިލީހުގައި މިއަދު ވާހަކަދައްކަވަމުން ޝަރީފް ވިދާޅުވީ މިސަރުކާރަށް 3 އަހަރު ފުރޭއިރު މިއަދު ރައްޔިތުންނަށް އެމްޑީޕީގެ ސަރުކާރުން މިދެނީ ލަނޑެއް ކަމަށެވެ. އަދި މިއީ އެއްގޮތަކަށް ވެސް ރާއްޖޭގެ އިޤްތިޞާދު ރަނގަޅުވާނެ ކަމެއް ނޫން ކަމަށެވެ. އަދި މިކަމުން ރައްޔިތުންނަށް ފައިދާވާނެ ކަމެއްވެސް ނޫން ކަމަށް ވެސް ވިދާޅުވިއެވެ.
މީގެ އިތުރުން ޝަރީފް ވިދާޅުވީ ސަރުކާރުން އުޅެނީ، ދަރަނިތައް ހަމަޖައްސާނެ ގޮތެއް ނޭނގިގެން ކަމަށެވެ. އަދި އެއީ ދަރަނިތައް ހަމަޖައްސާނެ ގޮތެއް ނޭނގިގެން ސަރުކާރުން ކުރަމުންދާ ކަންތައްތައް ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ސަރުކާރުގެ ދަރަނިތައް އަދާކުރުމަށް މަޖިލީހުން ކޮށްދޭން ޖެހޭ ކަމަކީ އެކަން ކުރާނެ ގޮތެއް ރާވައި ކިޔައިދިނުން ކަމަށެވެ. އަދި "ސަރުކާރުގެ ނެތް ކެޕޭސިޓީ. މި ދަރަނި އަދާކުރާނެ ގޮތެއް, ކަންކުރާނެ ގޮތެއް ނޭނގިގެން ދިޔައިމަ މިހެން ކަންތައް ކުރަން ޖެހެނީ" ޝަރީފް ވިދާޅުވިއެވެ.
ޝަރީފްގެ ވާހަކަފުޅުގައި އިތުރަށް ވިދާޅުވީ، ޚަރަދު ކުޑަ ކުރަން މިސަރުކާރުގެ ސިޔާސީ މަޤާމުތައް މަދުކޮށް، މަޖިލީހުގެ މެންބަރުންގެ މުސާރަ ކުޑަ ކުރަން ޖެހޭ ކަމަށެވެ.
"އެންމެ ފުރަތަމަ ސިޔާސީ މީހުން މަދުކުރަން ޖެހޭނީ. ސިޔާސީ މީހުން މަދުކޮށްފައި ދައުލަތުގެ ރަކަރެންޓް ޚަރަދު ކުޑަ ކުރަން ޖެހޭނީ. ހަމައެއާ އެކު، ދެން އަޅުގަނޑުމެން ކުރަން ޖެހޭނެ ކަމަކީ އަޅުގަނޑުމެން މެންބަރުންނާއި ސިޔާސީ މަޤާމުތަކުގައި ތިބި މީހުންގެ މުސާރަ ދަށްކުރަން ޖެހޭނީ" އާދަމް ޝަރީފް ވިދާޅުވިއެވެ.
