އަލީ ވަހީދު ފުލުހުންނަށް: ސައްޙަ ދައުވާކުރީމަ ރާއްޖެ ގެންދެވޭނެ
ޖިންސީ ގޯނާގެ ދައުވާތަކެއް އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެ ގެނެވޭނެ ގޮތެއް ނެތް ކަމަށް ކޮމިޝަނަރު އޮފް ޕޮލިސް މުހައްމަދު ހަމީދު ވިދާޅުވި ވާހަކަތަކަށް އަލީ ވަހީދު ރައްދު ދެއްވައިފިއެވެ.
އަލީ ވަހީދު ވިދާޅުވީ އޭނާ ރާއްޖެ ގެނެވޭނެ ކަމަށާއި ސައްޙަ ތަޙުޤީޤާއި ސައްޙަ ދަޢުވާ ކުރުމުން ކޮންމެ ޤައުމަކުން ވެސް އެކަން ބަލާނެ ކަމަށެވެ. ނަމަވެސް، ފްރޭމްކޮށް، ކުރެވޭ ތުހުމަތެއް، ކުރި ކުށެއް ، ކޯޓުގައި ވެސް ޕީޖީއަށް ބުނެ ނުދެވޭ ނަމަ ދުނިޔޭގެ ސިސްޓަމްތަކުގައި ބޭނުންހައި އެއްޗެއް ނުހެދޭނެ ކަމަށް އަލީ ވަހީދު ވިދާޅުވިއެވެ.
މީގެ އިތުރުން އަލީ ވަހީދު ވިދާޅުވީ އިނގިރޭސިވިލާތުގެ ކޯޓުތައް ހުރީ ހުޅުވިފައި ކަމަށާއި އޭނާ ހުރީ ނިޒާމުގެ ތެރެއިން ޖަވާބުދާރީވާން ތައްޔާރަށް ކަމަށެވެ. އަދި “ކުޅިކުޅިވަރު ކުޅޭކަށް ފުރުޞަތެއް ނުދޭނަން" ކަމަށް އަލީ ވަހީދު ވިދާޅުވިއެވެ.
އަލީ ވަހީދު މިފަދައިން ވިދާޅުވީ އިއްޔެ ހަވީރު އޮތް ނޫސްވެރިންގެ ބައްދަލުވުމެއްގައި ނޫސްވެރިއެއް ކުރެއްވި ސުވާލަކަށް ޖަވާބު ދެއްވަމުން ޢަލީ ވަހީދު ރާއްޖެއަށް ގެނެވޭނެ ފަދަ ގޮތެއް އަދި ނެތް ކަމަށް ކޮމިޝަނާ އޮފް ޕޮލިސް މުޙައްމަދު ޙަމީދު ވިދާޅުވުމާ ގުޅިގެންނެވެ. ސީޕީ ހަމީދު ވިދާޅުވީ އަލީ ވަހީދު ރާއްޖެ ގެނައުމަށް ޓަކައި ފުލުހުން މިހާރުވެސް މަސައްކަތް ކުރަމުންދާ ކަމަށެވެ.
