ޑެންމާކްގައި "ކޮވިޑް ޕާސްޕޯޓް" އުފައްދާ، ވެކްސިން ޖަހާ މީހުން ކަރަންޓީންވާން ނުޖެހޭ ގޮތަށް ހަދަނީ
ޑެންމާކްގައި ވެކްސިން ޖަހާ މީހުން ފާހަގަ ވާނެ ގޮތަކަށް ކޮވިޑް-19 ޕާސްޕޯޓެއް އުފައްދަން ނިންމައިފިއެވެ.
މިކަން ހާމަކޮށްފައި ވަނީ އެޤައުމުގެ ފިނޭންސް މިނިސްޓަރެވެ. ޑެންމާކްގެ ދައުލަތުގެ ޓީވީގައި ވާހަކަފުޅު ދައްކަވަމުން ފިނޭންސް މިނިސްޓަރ މޯޓެން ބޮޑްސަވިކް ވިދާޅުވީ، މިހާރު މިއީ ޤައުމު ހިނގައިގަންނަންވީ ވަގުތު ކަމަށާއި މިކަން ކުރުމަށް ވެކްސިނާއެކު މަސައްކަތް ކުރަން ޖެހޭ ކަމަށެވެ.
"ވެކްސިނާއެކު އަނެއްކާވެސް ޤައުމުގެ މިސްރާބް ރަނގަޅު ކުރަންވީ، ދާންވީ މިސްރާބު ފެންނަން އެބައޮތް. މިކަން ވާނީ "ވެކްސިން ޕާސްޕޯޓް" އަކާއެކު" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ވެކްސިން ޖަހާ ފަރާތްތައް ވަކިން އެނގޭނެ ގޮތަށް ޕާސްޕޯޓެއް ކުރިޔަށް އޮތް ތިން މަހެއްގެ ތެރޭގައި އެޤައުމުން ހެދުމަށް ނިންމާފައިވާ ކަަމަށާއި މި ޕާސްޕޯޓް އޮންނަ ފަރާތްތަކުން ކަރަންޓީން ވާން ނުޖެހޭ ކަމަށެެވެ.
"ވެކްސިން ޕާސްޕޯޓާއެކު އަބުރާ ކުރީގެ ހާލަތަށް ދާން މިވިސްނަނީ. މިމަސްތެރޭ އޮންލައިން ސައިޓަކުން ވެކްސިން ދެ ޑޯޒް ފުރިހަމަ ކުރި މީހުންގެ މަޢުލޫމާތު ފެންނާނެ. އެފަރާތްތަކަށް ޚާއްސަ ހުއްދަ ތަކެއް އަވަސް މުސްތަޤްބަލެއްގައި ދެވިގެންދާނެ." މިނިސްޓަރ ވިދާޅުވިއެވެ.
މިނިސްޓަރުގެ ވާހަކަފުޅުގައި ވިދާޅުވެފައި ވަނީ ޑެންމާކްއިން ނަމޫނާ ދައްކާނެ ކަމަށާއި ކޮވިޑް ޕާސްޕޯޓް އުފައްދާ ފުރަތަމަ ޤައުމަކަށް އެޤައުމު ވާނެ ކަމަށެވެ.
ޑެންމާކުން ކޮވިޑް ޕާސްޕޯޓް އުފެއްދުމަށް ނިންމި ނަމަވެސް، ދުނިޔޭގެ ސިއްހަތު ޖަމިއްޔާއިން މިދިޔަ ޖެނުއަރީ މަހުގެ ތެރޭގައި. ކޮވިޑް ޕާސްޕޯޓް ހެދުމަކީ މިވަގުތަށް އެންމެ ރަނގަޅު ކަމެއް ނޫން ކަމަށް ވަނީ ވިދާޅުވެފައެވެ. ސަބަބެއްގެ ގޮތުގައި ބުނެފައިވަނީ، ވެކްސިންގެ އަސަރު ހުންނަ މުއްދަތު އަދިވެސް ތަޙްލީލް ކުރެވެމުންދާތީއެވެ. ޔޫރަޕްގެ ބައެއް އިތުރު ޤައުމުތަކުން ދަނީ ވެކްސިން ޕާސްޕޯޓް އުފެއްދުމަށް ޝައުޤުވެރިކަން ފާޅު ކުރަމުންނެވެ.
