އެންމެ ޑޯޒެއް ޖަހަންޖެހޭ ޖޯންސަންސް&ޖޯންސަންސްގެ ވެކްސިން ބޭނުން ކުރުމުގެ ހުއްދައަށް އެދިއްޖެ
ކޮވިޑް-19 އިން ދިފާޢު ވުމަށް ޓަކައި އުފައްދާފައިވާ ގިނަ ވެކްސިންތަކާއި ޚިލާފަށް، އެންމެ ޑޯޒެއް ޖަހަންޖެހޭ ޖޯންސަން&ޖޯންސަން އިން އުފައްދާފައިވާ ވެކްސިން ބޭނުން ކުރުމުގެ ހުއްދައަށް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) ކުރެން އެދިއްޖެއެވެ.
އެހެން ގިނަ ވެކްސިންތަކާ ޚިލާފަށް ޖޯންސަން&ޖޯންސަންގެ ކޮވިޑް-19 ވެކްސިނަކީ އެއްތަނުން އަނެއްތަނަށް އުފުލަން ފަސޭހަ ވެކްސިނެކެވެ. މިގޮތަން 7 ޑިގްރީ ސެލްސިއަސްގައި މިވެކްސިން ބެހެއްޓެއެވެ. މިވެކްސިން އުފައްދާފައި ވަނީ އާއްމު ރޯގާގެ ވައިރަސްއެއް ކަމަށްވާ އެޑިނޯވައިރަސް ޓައިޕް 26 ބޭނުން ކޮށްގެންނެވެ. މި ވައިރަސް ހަށިގަނޑުގެ ތެރެއަށް ވެކްސިނާއެކު ފޮނުވާލާ، ހަށިގަނޑުގެ ތެރެއަށް ކޮރޯނާވައިރަސް ޕްރޮޓީން އެތެރެކުރެއެވެ. އަދި މިއާއެކު ހަށިގަނޑު ކޮރޯނާ ވައިރަސް ޕްރޮޓީންއާ ހަނގުރާމަކުރެއެވެ. އަދި ވައިރަސް އިން ދިފާޢުވާނެ ގޮތް ދަސް ކުރެއެވެ.
ޖޯންސަން&ޖޯންސަންގެ ވެކްސިންގެ ތަޙްލީލްތަކުން ދައްކާ ގޮތުގައި މިވެކްސިނަކީ ކޮވިޑް-19 އާ ދެކޮޅަށް މަސައްކަތް ކުރުމުގައި 66 އިންސައްތަ ކާމިޔާބު ވެކްސިނެކެވެ. ޖޯންސަން&ޖޯންސަން އިން ބުނެފައިވަނީ ވެކްސިންގެ އިފެކްޓިވްނެސް ދަށްވީ މިވެކްސިނަކީ އެންމެ ޑޯޒެއް ޖަހަން ޖެހޭ ވެކްސިނަކަށްވެފައި، ވެކްސިންގެ ޓްރައިލް ކުރިޔަށް ދިއަކީ ކޮވިޑް-19 ގެ އިތުރު ވޭރިއަންޓްތައް ވެސް ހުރި އިރެއްގައި ކަމުން ކަމަށެވެ.
ޖޯންސަން&ޖޯންސަންގެ ވެކްސިން ޖަހަން އެމެރިކާއިން ހުއްދަ ދީފިނަމަ އެވެކްސިން ވެގެންދާނީ އެމެރިކާގައި ބޭނުން ކުރަން ހުއްދިދިން ތިން ވަނަ ވެކްސިނަަށެވެ. މިހާރު އެމެރިކާގައި ފައިޒާ އަދި މޮޑާނާ ވެކްސިން ޖެހުމަށް އެފްޑީއޭއިން ވަނީ ހުއްދަދީފައެވެ.
އެމެރިކާއާއި ޖޯންސަން&ޖޯންސަން ކުންފުންޏާ ދެމެދުވަނީ 100 މިލިޔަން ޑޯޒް ގަތުމުގެ އެއްބަސްުވުމެއް ހަދާފައެވެ. 1 ބިލިޔަން ޑޮލަރުގެ މިއެއްބަސްވުމާއެކު މިވެކްސިން ޖެހުމުގެ ހުއްދަ އެމެރިކާއިން ދީފިނަމަ، އެމެރިކާގައި މިހާރު ކުރިޔަށްދާ ވެކްސިން ޖެހުމުގެ ފޮރޮގްރާމް އިތުރަށް ހަލުވި ވެގެން ދާނެއެވެ. ޖޯންސަންސް&ޖޯންސަންސް އިން ބުނެފައިވަނީ މިހާރު މި 100 މިލިޔަން ވެކްސިން ރެޑީގައި ހުރި ކަމަށާއި ބޭނުން ކުރުމުގެ ހުއްދައާއެކު އެމެރިކާއަށް ފޮނުވުމުގެ މަސައްކަތް ލަސްނުކޮށް ކުރިޔަށް ދާނެ ކަމަށެވެ.
އެމެރިކާއަކީ ދުނިޔޭގައި މިހާތަނަށް އެންމެ ގިނަ މީހުން ކޮވިޑް-19 ޖެހުނު ޤައުމުކަން ފާހަގަ ކޮށްލެވެއެވެ.
