އައު ވޭރިއަންޓާ ގުޅިގެން ރާއްޖެއިން އަޅަން ނިންމައިފައިވާ ފިޔަވަޅުތައް ހާމަކޮށްފި
އައު ވޭރިއަންޓާ ގުޅިގެން ރާއްޖެއިން އަޅަން ނިންމައިފައިވާ ފިޔަވަޅުތައް ހެލްތް ޕްރޮޓެކްޝަން އެޖެންސީން ހާމަކޮށްފިއެވެ.
ރައްކާތެރިކަމުގެ ފިޔަވަޅެއްގެ ގޮތުން ހަތް ޤައުމަކުން ރާއްޖެއަށް އެތެރެވުން ވަނީ މަނާކޮށްފައެވެ. އޭގެ ތެރޭގައި ހިމެނެނީ ސައުތު އެފްރިކާ، ނެމީބިއާ، މޮޒަންބީކް، ލެސޯތޯ، ބޮޓްސްވާނާ، ޒިންބާބްވޭ އަދި އެސްވަޓީރީއެވެ. ހަމައެއާ އެކު، ރާއްޖެ އައުމުގެ 14 ދުވަސް ކުރިން އެ ހަތް ޤައުމަށް ދަތުުރުކޮށްފައިވާ ފަރާތްތަކަށާއި 12 ގަޑިއިރަށް ވުރެ ގިނައިރު އެ ޤައުމުތަކުގައި ޓްރާންސިޓް ވެފައިވާ ފަރާތްތަކަށް ވެސް ރާއްޖެ ވަނީ ބަންދުކޮށްފައެވެ.
މީގެ އިތުރުން ދިވެހިރާއްޖެއަށް އައުމުގެ 14 ދުވަސްކުރިން ބަޔާންކުރެވުނު ހަތް ޤައުމުގައި އުޅުމަށް ފަހު، ރާއްޖެ އަންނަ ދިވެހިންނާއި ވާރކްވިސާގައި އަންނަ މީހުން ރާއްޖެ އައުމަށް ފަހު 14 ދުވަހުގެ މުއްދަތަށް ކަރަންޓީނުވާން ޖެހެއެވެ. މީގެ ތެރޭގައި އެ ޤައުމުތަކުގައި 12 ގަޑިއިރަށް ވުރެ ގިނައިރު ޓްރާންސިޓްވާ މީހުން ވެސް ހިމެނެއެވެ. އެފަދަ މީހުން ކަރަންޓީން ފުރިހަމަކޮށް ކަރަންޓީނުން ވީއްލާ ސުންކު ނަގަން ޖެހެއެވެ.
މިއާ އެކު، މި ވަގުތު ރާއްޖެއަށް އެ ޤައުމުތަކުން ދަތުރު ކުރާ ފަރާތްތަކުންނާއި ވޭތުވެދިިޔަ 14 ދުވަހުގެ ތެރޭގައި އެ ޤައުމުތަކުން ދަތުރުކޮށްފައިވާ ފަރާތްތައް، ވަގުތުން ޕީސީއާރު ޓެސްޓް ހަދަން ޖެހެއެވެ. އަދި 14 ދުވަސް ނުވަތަ އެއަށް ވުރެ ދިގު މުއްދަތަކަށް ރާއްޖޭގައި ހޭދަކުރާ މީހުން، 14 ދުވަސް ފުރިހަމަ ވުމުން އިތުރު ޕީ.ސީ.އާރު ޓެސްޓެއް ހަދަން ޖެހެއެވެ. އެއަށްވުރެ ކުރިން ފުރާ ނަމަ، ފުރުމުގެ ކުރިން ޓެސްޓް ހަދަން ޖެހެއެވެ.
އެޗްޕީއޭއިން ވަނީ މި އެންގުން، މިރޭ ދަންވަރު 12އިން ފެށިގެން ތަންފީޒު ކުރުމަށް ކަމާގުޅޭ އިދާރާތަކަށް އަންގައިފައެވެ.
މި އަހަރު، ދެކުނު އެފްރިކާއިން މިދިޔަ ސެޕްޓެންބަރުގެ ނިޔަލަށް އެފްރިކާ ބައްރުން 20،000 ގިނަ ފަތުުރުވެރިން ރާއްޖެއަށް ޒިޔާރަތްކޮށްފައިވެއެވެ. މީގެ ތެރެއިން 12،000 ފަތުރުވެރިން އައިސްފައި ވަނީ އައު ވޭރިއަންޓް ފެނިގެން އުޅޭ ދެކުނު އެފްރިކާއިންނެވެ.
އައު ވޭރިއަންޓެއް ފެނި ރާއްޖޭގެ ބޯޑަރު އެފްރިކާގެ ޤައުމުތަކަށް ބަންދުކުރަން ނިންމައިފައި ވަނީ ރާއްޖޭގެ ޓޫރިޒަމް ވަރަށް ބޮޑަށް ރަނގަޅުވެފައިވާ ދުވަސްވަރެއްގައެވެ. މިހާތަނަށް 1.1 މިލިޔަން ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، 1.3 މިލިޔަން ފަތުރުވެރިން ރާއްޖެއަށް ގެނައުމަށް ޓޫރިޒަމް މިނިސްޓްރީން ވަނީ އަމާޒު ހިފައިފައެވެ.
އައު ވޭރިއަންޓާ ބެހޭ ގޮތުން މިހައިތަނަށް އެނގޭ މައުލޫމާތު
އޮމިކްރޮންގެ ނަން ދީފައިވާ ބީ.1.1.529 ކޮވިޑް-19ގެ އައު ވޭރިއަންޓްގައި މިއުޓޭޝަންގެ ވަރަށް އާދަޔާ ޚިލާފު ކޮންސްޓަލޭޝަންއެއް އެކުލެވިގެންވާ ކަމަށް ސައިންވެރިން ބުނެއެވެ. މިއީ ހަށިގަނޑުގެ ދިފާއީ ނިޒާމުގެ ފޫއަޅުވައިލެވޭ ފަދަ ވޭރިއަންޓެއް ކަމަށާއި މިހެންކަމުން، ބަލި ޖެހޭ މިންވަރު އިތުރުވާނެ ކަމަށް މިހައިތަނަށް ހެދުނު ދިރާސާތަކުން ދައްކަައެވެ.
ދެކުނު އެފްރިކާގެ ސައިންސްވެރިން ވަނީ މި ވޭރިއަންޓްގެ ސްޕައިކް ޕްރޮޓީންއަށް 30އަށް ވުރެ ގިނަ މިއުޓޭޝަން އައިސްފައިވާކަން ދެނެގަނެފައެވެ. ސްޕައިކް ޕްރޮޓީނަކީ ކޮރޯނާ ވައިރަސް އިންސާނުންގެ ސެލްތަކަށް އިންފެކްޓްވުމަށް އެންޓްރީ ޕޮއިންޓެއް އުފެއްދުމަށް އެހީތެރިވެދޭ ބައެވެ. މިހެންކަމުން މި ވޭންއަންޓުގެ ސަބަބުން ކޮވިޑް-19 ވެކްސިން މަސައްކަތް ނުކޮށްފާނެ ކަމަށް ސައިންސްވެރިން ދެކެއެވެ. ވެކްސިން މަސައްކަތް ކުރޭތޯ، ޔަޤީން ވާނީ ދެ ހަފްތާ ފަހުން ކަމަށް ވެކްސިން އުފައްދާ ކުންފުނިތަކުން ހާމަކުރެއެވެ.
ޠިބަލީގރ އަލާމަތް ތަ ކިޔާދީބަލަ ނިކަން