ކުޑަ ކުއްޖަކު މަރައިލިކަމުގެ ކުށް ސާބިތުވި 4 މީހަކު އުމުރަށް ޖަލަށް

އުމުރުން 14 އަހަރުގެ ކުޑަ ކުއްޖަކު މަރައިލިކަމުގެ ކުށް ސާބިތުވި ހަތަރު މީހަކު އުމުރަށް ޖަލަށް ލާން ކްރިމިނަލް ކޯޓުން މިއަދު ހުކުމް ކޮށްފިއެވެ.

Ads by Sosun Fihaara

މި ހާދިސާގައި މަރައިލައިފައި ވަނީ ށ. ފޭދޫ ހީނާމާގެ އިސްމާއިލް ޝައްފާން ޝަރީފްއެވެ. އޭނާ މަރައިލި ކަމަށް ދައުލަތުން ދައުވާކޮށްފައި ވަނީ ސ. ހިތަދޫ/ މަލަ މުހައްމަދު އައިމަން ހަބީބް، ސ. މަރަދޫ/ މޫންލައިޓް ގްލޯރީ ހަސަން ނަބާހް، ސ. ހިތަދޫ/ ޗަމަން ހުސައިން ނިހާދު އަހްމަދު އަދި ކ. މާލެ ޓޮމާޓޯފްލާވަރ ހުސެއިން ޖައިލަމްގެ މައްޗަށެވެ.

މި މައްސަލައިގައި ނިހާދުއާއި ޖައިލަމްގެ މައްޗަށް އުފުލައިފައި ވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ. އަދި ނަބާހްއާއި އައިމަންގެ މައްޗަށް އުފުލައިފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މަރައިލުމުގައި ބައިވެރިވުމުގެ ކުށުގެ ދައުވާއެވެ.

މި މައްސަލައިގައި މި ހަތަރު މީހުންގެ މައްޗަށް ވެސް މިއަދު ވަނީ 25 އަހަރަށް ޖަލަށްލުމަށް ހުކުމް ކޮށްފައެވެ.

މިއަދު އޮތް އަޑުއެހުމުގައި ކްރިމިނަލް ކޯޓުން އިއްވި ހުކުމުގައި ބުނެފައި ވަނީ މައްސަލައިގެ މުހިންމު ހެއްކެއް ދޮގު ހެކިބަސް ދީފައިވާތީ ދައުލަތުން އުފުލައިފައިވާ ދައުވާތައް ސާބިތުނުވާ ކަމަށެވެ. ނަމަވެސް ފޮރެންސިކް ތަހުލީލުތަކާއި ބައެއް ޝަފަހީ ހެކިންގެ ހެކިބަހަށް ބަލާއިރު އެ މީހުންގެ މައްޗަށް މީހަކު މަރައިލުމުގައި ބައިވެރިވިކަމުގެ ކުށް ސާބިތުވާ ކަމަށެވެ.

ޝައްފާން މަރައިލައިފައި ވަނީ 2018ވަނަ އަހަރުގެ އޮކްޓޯބަރު މަސް ތެރޭގައެވެ. އޮޓޯ ގަރާޖު ކައިރިން ވަޅިއަކުން އެތައް ތަނަކަށް ހަމަލާދީ ޝަައްފާން މަރައިލީ އެ ދުވަސްވަރު މާލެ ތެރޭގައި ހިނގި މާރާމާރީތަކާ ގުޅިގެން ބަދަލު ހިފުމުގެ ގޮތުން ދިން ހަމަލާއެއްގައެވެ. އޭނާ އޭޑީކޭ ހޮސްޕިޓަލަށް ގެންދިޔައިރު ވެސް އޮތީ މަރުވެފައެވެ.