ހިރިލަންދޫ ކައުންސިލްގެ ކަންބޮޑުވުމާ އެކު ރައީސް ވިދާޅުވީ "ވަރަށް އަވަހަށް" މަޝްރޫއުތައް ފަށާނެކަމަށް
ތ. އަތޮޅު ހިރިލަންދޫގައި ކުރިއަށް ގެންދަން ހަމަޖެހިފައިވާ ތަރައްގީގެ މަޝްރޫއުތައް ނުފެށި ލަސްވާތީ އެރަށު ކައުންސިލުން ކަންބޮޑުވުން ފާޅުކުރުމުން، "ވަރަށް އަވަހަށް" އެ މަޝްރޫއުތައް ފައްޓަވާނެކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހު މިއަދު ވަނީ ހިރިލަންދޫ ކައުންސިލް މެމްބަރުންނާ ބައްދަލުކުރައްވައިފައެވެ. ކައުންސިލުގެ ފަރާތުން ކައުންސިލުގެ ރައީސް މުޙައްމަދު ޖަލާލު ވަނީ އެ ރަށުގެ ތަރައްޤީއަށް ރާއްވަވައިފައިވާ މަސައްކަތްތަކާއި، ރައްޔިތުންގެ ކަންބޮޑުވުންތަކުގެ މަޢުލޫމާތާއި، ރަށުގެ ތަރައްޤީއަށް ބޭނުންވާ ކަންކަމާއި ބެހޭގޮތުން ރައީސް ޞާލިހާ މަޝްވަރާކުރައްވައިފައެވެ. ހިރިލަންދޫގެ ކައުންސިލުގެ ރައީސް ވަނީ ރަށުގެ ބިންހިއްކުމުގެ މަޝްރޫޢާއި ފެނާއި ނަރުދަމާގެ މަޝްރޫޢުގެ އިތުރުން ސްކޫލް ކްލާސްރޫމް އިމާރާތާއި މަލްޓިޕާޕަސް ހޯލް އިމާރާތުގެ މަސައްކަތް ފެށުން ލަސްވާތީ އެކަމުގެ ކަންބޮޑުވުން ފާޅުކުރައްވައިފައެވެ. މީގެ އިތުރުން ޞިއްޙީ ޚިދުމަތުގެ ފެންވަރު މަތިކުރުމަށް ކުރަން ހުރި ކަންކަމާއި، ފަސޭހައިން ބޭސް ލިބޭނެ އިންތިޒާމު ފަހިކޮށްދެއްވުމަށާއި، އަދި މި ނޫން ވެސް ރަށުގެ ތަރައްޤީއަށް މުހިންމު ކަންކަމާ ގުޅޭގޮތުން ރަށުގެ ކައުންސިލުގެ ރައީސް މަޝްވަރާކުރެއްވިއެވެ.
އެއަށް ފަހު ރައީސް ޞާލިހު ވިދާޅުވީ ހިރިލަންދޫ ސްކޫލްގެ ކްލާސްރޫމް އިމާރާތާއި މަލްޓިޕާޕަސް ހޯލްގެ މަސައްކަތް ވަރަށް އަވަހަށް ޓެންޑަރ ކުރެވޭނެކަމަށެވެ. އަދި އެރަށުގެ ބިންހިއްކުމުގެ މަޝްރޫޢަކީ ރިޔާސީ ވަޢުދެއްކަން ފާހަގަކުރައްވައި އެމަސައްކަތް ކުރިޔަށްދާނެ ކަމަށް ވެސް ވިދާޅުވިއެވެ.
މިއަދުގެ ބައްދަލުކުރެއްވުމުގައި ހިރިލަންދޫ ކައުންސިލުން ވަނީ އެރަށުގައި ގިނަ ޒަމާންތަކެއްވަންދެން ނުކުރެވި ހުރި ތަރައްޤީގެ ބައެއްކަންކަން މި ސަރުކާރުން ކުރެވޭނެގޮތަށް ފަހިކޮށްދެއްވާފައިވާތީ އެކަން ފާހަގަކުރައްވައިފައެވެ.
