ލޭންޑް ޔޫސް ޕްލޭން އެކުލަވައިލީ މާލޭގެ ހާސްކަން ކުޑަކޮށް ހިތްފަސޭހަކަން ލިބޭނެ ގޮތަށް: ޑރ. މުޢިއްޒު
މާލޭ ލޭންޑް ޔޫސް ޕްލޭންގެ ޑްރާފްޓް އެކުލަވައިލީ ތޮއްޖެހުން ބޮޑު މާލޭގެ ހާސްކަން ކުޑަކޮށް، އާންމުންނަށް ފަސޭހަ ހިދުމަތާއި ހިތްފަސޭހަކަން ލިބޭ ގޮތަށް ކަމަށް މާލެސިޓީގެ މޭޔަރު ޑރ. މުހައްމަދު މުޢިއްޒު ވިދާޅުވެއްޖެއެވެ.
އޮންލައިން ނޫސް "މިހާރު"އަށް މައުލޫމާތު ދެއްވަމުން ޑރ. މުޢިއްޒު މިއަދު ވިދާޅުވީ މާލޭގެ ރައްޔިތުންގެ ހިޔާލާ އެކު ލޭންޑް ޔޫސް ޕްލޭން އެކުލަވައިލައިފައި ވަނީ ރައްޔިތުންނަށް ނޭވާލާނެ ޖާގަ ލިބޭ ގޮތަށް ކަަމަށާއި އާމްދަނީ ހޯދާނެ ވަސީލަތްތަކާއި ވަޒީފާތަކާއި ހިދުމަތްތައް ހޯދުމުގައި ލުއި ފަސޭހަކަން ހޯދައިދޭން ބަލައިފައިވާނެ ކަމަށެވެ.
ލޭންޑް ޔޫސް ޕްލޭން އެކުވައިލީ މާލޭގެ ރައްޔިތުންގެ ފުރިހަމަ ބައިވެރިވުމާ އެކު ކަމަށް ވިދާޅުވަމުން ޑރ. މުޢިއްޒު އިތުރަށް ވިދާޅުވީ ފުރަތަމަ ފަހަރަށް ޕްލޭނެއް އެކުލަވައިލައި މިދިޔަ އޮގަސްޓް މަހުން ފެށިގެން އާއްމުންނަށް ހުޅުވައިލުމުން މިހާތަނަށް 1،100އަށް ވުރެން ގިނަ ހިޔާލު ހުށަހަޅައިފައިވާ ކަަމަށެވެ. އޭގެ ތެރޭގައި ސަރުކާރުގެ އިދާރާތަކާއި ޖަމިއްޔާތަކާއި އާއްމު ފަރުދުން ހިމެނޭ ކަމަށް ވެސް މާލޭ މޭޔަރު ވިދާޅުވިއެވެ.
"ފުރަތަމަ ފަހަރަށް މާލޭ ރައްޔިތުންގެ ބައިވެރިވުމާ އެކު ލޭންޑް ޔޫސް ޕްލޭނެއް މި އެކުލަވައިލީ. މިއީ ވަރަށް ތާރީހީ ކަމެއް،" ޑރ. މުޢިއްޒު ވިދާޅުވިއެވެ.
މާލޭ ސިޓީ ކައުންސިލުން ނިންމަވައިފައި އޮތީ އެ ޕްލޭން ފައިނަލް ކުރުމުގެ ކުރިން ވެސް ހިޔާލު ހުށަހެޅުމުގެ ފަހު ފުރުސަތު ރައްޔިތުންނަށް ދިނުމަށެވެ. އެގޮތުން މިއަދުން ފެށިގެން ހަފުތާއެއްގެ މުއްދަތަށް ސިޓީ ކައުންސިލްގެ ވެބްސައިޓު މެދުވެރިކޮށް ހިޔާލު ހުށަހެޅޭނެކަމަށް ވެސް ޑރ. މުޢިއްޒު ވިދާޅުވިއެވެ.
