އިންޑިއާއާ އެކު ވެފައިވާ އެއްބަސްވުންތަކުގެ ސަބަބުން ގައުމީ ސަލާމަތަށް ނުރައްކަލެއް ނެތް ކަމަށް ފާސްކޮށްފި

އިންޑިޔާ ސަރުކާރާއި ދިވެހި ސަރުކާރާ ދެމެދު ސޮއިކޮށްފައިވާ އެއްބަސްވުންތަކުގައި ގައުމީ ސަލާމަތާއި މިނިވަންކަމާއި ސިޔާދަތަށް ނުރައްކާވާ ފަދަ ކަމެއް ނެތް ކަމަށް ރައްޔިތުންގެ މަޖިލީހުން ފާސްކޮށްފިއެވެ.

Ads by MWSC

އެ އެއްބަސްވުމުގައި ނުރައްކާވާ ފަދަ ކަމެއް ނެތްކަން ކަށަވަރު ކުރުމަށް ޓަކައި، އެ އެއްބަސްވުންތަކުގެ އަސްލު ހޯދައި ދިރާސާކޮށް ޤައުމީ ސަލާމަތާއި ޤައުމުގެ މިނިވަންކަމާއި ސިޔާދަތަށް ނުރައްކާވާ ފަދަ ކަންކަން ހުރިތޯ ބަލައިދިނުމަށް އެދި މަޖިލީހަށް ހުށަހެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރެވެ.

މެންބަރު އާދަމް ޝަރީފު ހުށަހެޅުއްވީ އުތުރު ތިލަފަޅު ތަރައްގީކުރުމާ ބެހޭ އެއްބަސްވުމާއި، ހައިޑްރޮގްރަފީއާ ބެހޭ އެއްބަސްވުމާއި އަދި ޑޯނިއަރ މަތިންދާ ބޯޓާ ބެހޭ އެއްބަސްވުމުގައި ގައުމީ ސަލާމަތަށް ނުރައްކާވާ ފަދަ ކަމެއް އޮތްތޯ މަޖިލީހުން ކަށަވަރުކުރުމަށެވެ.

މި ރިޕޯޓު ފާސް ކުރުމަށް 53 މެމްބަރުން ވޯޓު ދެއްވައިފައިވެއެވެ. ރިޕޯޓު ފާސް ނުކުރުމަށް ވޯޓު ދެއްވީ ހަ މެންބަރުންނެވެ.

މި ރިޕޯޓަށް މެންބަރު އާދަމް ޝަރީފް 13 އިސްލާހެއް ހުށަހެޅުއްވިއެވެ. އެ ގޮތުން ކޮމިޓީ ރިޕޯޓުގެ ހޯދުންތަކުގެ ބައެއް ނަމްބަރުތަކަށް އިސްލާހު ގެނައުމަށް ވެސް ހުށަހަޅުއްވައިފައިވެއެވެ. ނަމަވެސް މިއިން އެއްވެސް އިސްލާހެއް ފާސްވެފައެއް ނުވެއެވެ.