732 ދުވަސްފަހުން ރައީސް ޔާމީން މިނިވަން ވެއްޖެ

އިދިކޮޅު ލީޑަރު، ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ މައްޗަށް ކްރިމިނަލް ކޯޓުން އިއްވި ފަސް އަހަރުގެ ޖަލު ހުކުމާއި ފަސް މިލިޔަން ޑޮލަރުގެ ޖޫރިމަނާގެ މައްސަލައިގައި، އިސްތިއުނާފްގެ ފަހު މަރުހަލާއިން، ރައީސް ޔާމީންގެ މައްޗަށް ކުށް ސާބިތުނުވާ ކަމަށް ތިން ފަނޑިޔާރުންގެ އިއްތިފާޤުން ހުކުމްކޮށްފިއެވެ.

Ads by Sosun Fihaara

ސުޕްރީމް ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރި ހުކުމުގައި ފާހަގަކޮށްފައިވާ އެންމެ މުހިންމު އެއް ކަމަކީ، ވޮޑަމުލާގެ ފައިސާ އެސްއޯއެފަށް ޖަމާކުރި ކަމަށް ބުނާ ޗެކް ނަންބަރު ދިމާނުވާތީ ރައީސް ޔާމީންގެ އެކައުންޓަށް ޖަމާވީ ދައުލަތުގެ ފައިސާ ކަމާ މެދު ޝައްކު އުފެދޭ ހާލަތެއް އޮތުމެވެ.

ދައުލަތުން ޔާމީނަށް ކުރި ދައުވާގައި ބުނާ ގޮތުގައި ޔާމީންގެ އެކައުންޓަށް ޖަމާވީ ދައުލަތަށް ލިބެން ޖެހޭ ފައިސާކަމަށެވެ. އެހެން ނަމަވެސް އެކަން ދައުލަތަށް ސާބިތުކޮށް ނުދެވޭކަމަށް ޔާމީންގެ ފަރާތްޕުޅުން ކޯޓުގައި ދިޔައީ ވިދާޅުވަމުންނެވެ.

ރައީސް ޔާމީންގެ އެކައުންޓަށް ޖަމާވި ފައިސާއަކީ ކުށްކޮށްގެން ހޯދި ފައިސާ ކަމަށް ޝައްކު ކުރެވޭ ހާލަތެއް އޮތް ކަމަށް ދަށު ކޯޓާއި ހައި ކޯޓުން ހުކުމް ކުރި ނަމަވެސް ސުޕްރީމް ކޯޓުގެ ހުކުމުގައި ބުނެފައި ވަނީ އެފައިސާއަކީ ކުށުގެ ފައިސާކަން ތަހުގީގަށް އެނގިފައި ނުވާކަމަށެވެ. ހުކުމުގައި ވަނީ ޔާމީނަށް ޖަމާވި އެއް މިލިއަން ޑޮލަރުގެ ހަގީގަތް ހޯދަން ތަހުގީގުކޮށް އެ ފައިސާއަކީ ކުށް ކޮށްގެން ހޯދައިފައިވާ ފައިސާ ނަމަ ދައުލަތަށް ނެގުމުގެ އިހްތިޔާރު އޮތް ކަމަށެވެ.

ސުޕްރީމް ކޯޓުގައި މި މައްސަލަ ބެއްލެވީ ފަނޑިޔާރު މަހާޒު އަލީ ޒާހިރާއި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު ޑރ. މުހައްމަދު އިބްރާހިމެވެ. ރިޔާސަތު ބެލެހެއްޓެވީ ފަނޑިޔާރު މަހާޒު އިއްވެވި ރައުޔަށް ފަނޑިޔާރުންގެ ބެންޗުގައި ހިމެނިވަޑައިގަންނަވާ އަނެއް ދެ ފަނޑިޔާރުން ވެސް ވަނީ ތާއީދު ކުރައްވައިފައެވެ.

ރައީސް ޔާމީންގެ ފަރާތުން އިސްތިއުނާފީ 22 މައްސަލައެއް ވަނީ ހުށަހަޅުއްވައިފައެވެ. ލައިވްކޮށްގެން ކުރިޔަށް ދިޔަ މިއަދުގެ ޝަރީއަތުގެ މަޖިލީހުގައި ފަނޑިޔާރު މަހާޒް އަލީ ވަނީ ދިފާއުން އިސްތިއުނާފަށް ހުށަހަޅަން ފާހަގަކުރި މައްސަލަތަކަށް ދައުލަތުން ދީފައިވާ ރައްދުތަކާއި، ފަނޑިޔާރުންގެ ނިންމުން ތަފްސީލްކޮށް ވިދާޅުވެދެއްވައިފައެވެ.

ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިޔަން ޑޮލަރު، ލޯންޑަރު ކުރިކަމުގެ ކުށް ކްރިމިނަލް ކޯޓުގައި ސާބިތުވެ، އެ މަނިކުފާނު ޖަލަށްލުމަށް ހުކުމް ކުރީ 28 ނޮވެންބަރު 2019ގައެވެ. އެ މައްސަލަ ރައީސް ޔާމީންގެ ފަރާތުން ހައި ކޯޓަށް އިސްތިއުނާފް ކުރުމަށް ހުށަހެޅުމުން، އެކަން ހައި ކޯޓުން ބަލައިގަނެ، ކްރިމިނަލް ކޯޓުގެ ނިންމުން ރަނގަޅު ކަމަށް 21 ޖެނުއަރީ 2021ގައި ނިންމިއެވެ.

ރައީސް ޔާމީންގެ ފަރާތުން، ހައި ކޯޓުގެ ހުކުމް އިސްތިނާފް ކުރުމަށް، އިސްތިއުނާފީ އެންމެ ފަހުގެ މަރުހަލާ، ސްޕްރީމް ކޯޓަށް ހުށަހެޅީ މި އަހަރު އޭޕްރީލް މަހުގެ ތެރޭގައެވެ. މި މައްސަލައިގައި ސްޕްރީމް ކޯޓުގައި ގިނަ އަޑު އެހުންތަކެއް ބާއްވައިފައިވެއެވެ. މައްސަލައިގައި އަޑު އެހުންތައް ނިންމައިލައިފައި ވަނީ މިދިޔަ މަހު ފަސް ވަނަ ދުވަހުއެވެ. ނަމަވެސް މިދިޔަ ހަފްތާގައި ދައުލަތަށް ހެދުނު ގޯހެއްގެ ސަބަބުން އިތުރު އަޑުއެހުމެއް ވަނީ ބާއްވައިފައެވެ. އެއީ ގއ. ވޮޑުމުލާގެ ކުލީގެ ފައިސާ ހިމެނޭ ޗެކްގެ ނަންބަރު ބޭންކް ސްޓޭޓްމެންޓާއި ޑެޕޮސިޓް ސްލިޕްގެ ނަންބަރު ތަފާތުކޮށް އޮތުމުން އެކަން ސާފު ކުރުމަށެވެ. އެ މައްސަލައިގައި ދައުލަތުން ވިދާޅުވެފައި ވަނީ ވަނީ، އެކަން އެގޮތަށް ހިނގައިފައި ވަނީ ޓައިޕް ކުރުމުގައި ދިމާވި މައްސަލައަކުން ކަމަށެވެ.

ގއ. ވޮޑަމުލާ މައްސަލައިގައި ކްރިމިނަލް ކޯޓުގެ ހުކުމް ރަނގަޅު ނޫން ކަމަށް ސްޕްރީމް ކޯޓުން މިއަދު ނިންމިއިރު، ރ. ފުއްގިރި މައްސަލައިގައި ވެސް ޔާމީންގެ މައްޗަށް މަނީ ރިޝްވަތު ގަބޫލުކުރުމުގެ ދައުވާ އުފުލައިފައެވެ. އަދި ވ. އާރަށު މައްސަލާގައި ވެސް ޔާމީންގެ މައްޗަށް ރިޝްވަތު ހިފިކަމުގެ ދައުވާ ވަނީ އުފުލައިފައެވެ.

ރައީސް ޔާމީންގެ މައްޗަށް ކޮށްފައިވާ ޖަލު ހުކުމުން މިނިވަންވުމާ އެކު 2023ވަނަ އަހަރު އޮންނަ ރިޔާސީ އިންތިހާބުގައި އެ މަނިކުފާނަށް ވާދަކުރެވޭނެއެވެ.