ނުކުޅެދުންތެރިކަން ހުންނަ މީހުންގެ އިނާޔަތް ބޮޑުކޮށްދޭން އެދިއްޖެ
ނުކުޅެދުންތެރިކަން ހުންނަ މީހުންނަށް ދައުލަތުން ދެމުންދާ އިނާޔަތް ބޮޑުކޮށްދޭން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އަރިހުން އެދިއްޖެއެވެ.
ނުކުޅެދުންތެރިންކަން ހުންނަ މީހުންގެ ފަރާތުން އެކަމަށް އެދިފައި ވަނީ ރައީސް ޞާލިހާ އެކު މިއަދު ބޭއްވި ބައްދަލުވުމުގައެވެ.
މި ބައްދަލުވުމުގައި ބައިވެރިވި ކުދީން މައިގަނޑު ގޮތެއްގައި ފާހަގަކޮށްފައި ވަނީ ދިރިއުޅުމުގެ ހަރަދުތަކަށް ބަލާއިރު މިހާރު ދެމުންދާ އެލަވަންސް ކުޑަކަމާއި އެކަމުގެ ސަބަބުން ގިނަ ދަތިތަކާ ކުރިމަތިވާ ކަމެވެ. އަދި އެފަދަ މީހުންނަށް ފޯރުކޮށްދޭން ޖެހޭ ފަރުވާއާއި އިތުރު ހިދުމަތްތައް ރާއްޖޭގެ އެކި ކަންކޮޅުތަކުން ހޯދުމުގައި ގޮންޖެހުންތަކެއް ހުރުމާ އެކު މާލީ އެހީތެރިކަން އިތުރުވެގެން ދިޔުމަކީ އެކަމަށް ވެސް ކޮންމެވެސް ވަރެއްގެ ލުޔެއް ލިބިގެންދާނެ ކަމެއްކަން ވެސް ފާހަގަ ކޮށްފައިވެއެވެ.
ލޯފަން ބައެއް ކުދިންނާ އެކު ރައީސް ޞާލިޙް ބޭއްވެވި މި ބައްދަލުކުރެއްވުމުގައި އެންސްޕާގެ އިސްވެރިން ވެސް ބައިވެރިވެލެއްވިއެވެ. އެ އިދާރާ ތަމްސީލުކުރި ބޭފުޅުން ވަނީ ނުކުޅެދުންތެރިކަން ހުންނަ މީހުންނަކީ ކޮބައިކަން ކަނޑައެޅުމާއި ނުކުޅެދުންތެރިކަން ހުންނަ މީހުންގެ ދަފުތަރު އެކުލަވައިލުމާއި އެ ދަފުތަރު ބެލެހެއްޓުމުގެ ގަވާއިދު ގެޒެޓް ކުރުމާ ގުޅިގެން ނުކުޅެދުންތެރިކަން ހުންނަ މީހުންގެ ނުކުޅެދުންތެރިކަން ހުންނަ މިންވަރު ކަނޑައަޅައި "ޑިސްއެބިލިޓީ ސިވިއާނަސް"އަށް ބަލައި ދެވޭ އެލަވަންސް މުރާޖައާ ކުރުމުގެ މަޝްވަރާތައް މިނިސްޓްރީ އޮފް ފިނޭންސްއާއި މިނިސްޓްރީ އޮފް ޖެންޑާ ފެމިލީ އެންޑް ސޯޝަލް ސާވިސަސްއާއެކު އެންސްޕާއިން ކުރަމުން ގެންދާ ކަމަށް މިއަދުގެ ބައްދަލުވުމުގައި ވިދާޅުވެފައެވެ.
ވަރަށްރަނގަޅުކަމެއް