ބަނގްލަދޭޝްއިން ރާއްޖެއަށް ސީދާ ދަތުރުތައް އިތުރު ކުރާނެ: ޝެއިހް ހަސީނާ
- ބަނގްލަދޭޝް ގައުމީ އެއާލައިންގެ ދަތުރުތައް ރާއްޖެއަށް ފަށަން ތައްޔާރުވަނީ
- ރާއްޖެއާއި ބަނގްލަދޭޝްއާ ދެމެދު ޝިޕިން ލައިނެއް ފަށަން މަޝްވަރާ ކުރެއްވި
- ބަނގްލަދޭޝްއަށް ދަތުރުކުރާ ދިވެހިންނަށް އޮންއެރައިވަލް ވިސާ ދެއްވަން ނިންމިކަން އިއުލާންކުރެއްވި
ބަނގްލަދޭޝްގެ ގައުމީ އެއާލައިން، ބިމާން ބަނގްލަދޭޝް އެއާލައިންގެ ދަތުރުތައް އެގައުމުގެ ވެރިރަށް ޑާކާއިން ވެލާނާ އިންޓަނޭޝަނަލް އެއާޕޯޓަށް ދަތުރުކުރުމަށް ތައްޔާރުވަމުންދާ ކަމަށާއި، ދެގައުމުގެ ދެމެދުގައި ޝިޕިންލައިނެއް ތައާރަފުކުރުމުގެ މަޝްވަރާތައް ވެސް ކުރެވެމުންދާކަމަށް ބަނގްލަދޭޝްގެ ބޮޑުވަޒީރު ޝެއިހް ހަސީނާ ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާ އެކު ރަސްމީ މަޝްވަރާތައް ކުރިއަށް ގެންދެވުމަށް ފަހު މީޑިއާތަކާ ބައްދަލުކުރައްވައި ވާހަކަފުޅު ދައްކަވަމުން ބޮޑުވަޒީރު ހަސީނާ ވިދާޅުވީ ބަނގްލަދޭޝްއާއި ރާއްޖެއާ ދެމެދު މިހާރު ވެސް ސީދާ ދަތުރުތައް އެގައުމުގެ އެއާލައިން ޔޫއެސް ބަންގްލާއިން ކުރަމުން ގެންދާކަމަށާއި ދެގައުމުގެ ގުޅުން އިތުރަށް ރަނގަޅު ކުރުމަށް ގައުމީ އެއާލައިންގެ ސީދާ ދަތުރުތައް ވެސް ފަށަން ތައްޔާރުވަމުން ދާކަމަށެވެ. އަދި ވިދާޅުވީ ދެގައުމުގެ ދެމެދުގައި ދަތުރުތައް އިތުރުވުމާ އެކު ފަތުރުވެރިކަމުގެ ދާއިރާއިން ވެސް ގުޅުން ބަދަހިވެގެން ދާނެކަމަށް އުއްމީދު ކުރައްވާ ކަމަށެވެ.
މީގެ އިތުރުން ޝެއިހް ހަސީނާ ވިދާޅުވީ ރާއްޖެއާއި ބަނގްލަދޭޝްއާ ދެމެދު ޝިޕިން ލައިނެއް ތައާރަފުކުރުމުގެ މަޝްވަރާތައް ވެސް ކުރިއަށް ގެންދެވިކަމަށެވެ. ހަސީނާ ވަނީ ރާއްޖެއިން ބަނގްލަދޭޝްއަށް ދަތުރުކުރާ ފަރާތްތަކަށް އޮންއެރައިވަލް ވިސާ ދޭން ނިންމަވައިފައިވާކަން މިއަދު އިއުލާން ކުރައްވައިފައެވެ.
We are delighted to announce that Bangladesh government has decided to facilitate visa on arrival for Maldivian nationals in the context of impromptu situation of the current pandemic
Sheikh Haseena -
މީގެ އިތުރުން ހަސީނާ ވިދާޅުވީ ރާއްޖެއާއި ބަނގްލަދޭޝްއާ ދެމެދު ސިއްހީ، ތައުލީމީ، ކުޅިވަރު، މަސްވެރިކަމާއި ދަނޑުވެރިކަމުގެ އިތުރުން އިންސާނީ ވަސީލަތްތައް ތަރައްގީކުރުމުގެ ދާއިރާއިން ގުޅުން ބަދަހި ކުރުމަށް މަޝްވަރާ ކުރެވުނު ކަމަށެވެ. ސިއްހީ ދާއިރާގެ ޕްރޮފެޝަނަލުން ބަނގްލަދޭޝްއިން ފޯރުކޮށްދިނުމަށް ރާއްޖެއިން ހުށަހެޅި ހުށަހެޅުން އެގައުމުން ގަބޫލުކޮށްފައިވާކަމަށް ވެސް ހަސީނާ ވިދާޅުވިއެވެ. ހަމައެއާ އެކު ރާއްޖޭގެ ދަރިވަރުންނަށް ސިއްހީ ދާއިރާގެ ޕޯސްޓް ގްރެޖުއޭޓް ކޯސްތަކަށް ފުރުސަތު ފަހިކޮށްދެއްވާނެކަމަށް ވެސް އެކަމަނާ ވަނީ ވިދާޅުވެފައެވެ.
ބޮޑުވަޒީރު ހަސީނާ ރާއްޖެއަށް ކުރައްވާ ދަތުރުފުޅުގައި ދެގައުމުގެ ދެމެދުގައި ރަސްމީ ވާހަކަތައް ކުރިއަށް ގެންދިޔައީ މިއަދު ހެނދުނެވެ. މީގެ އިތުރުން ހަވީރު ހަތަރެއް ޖަހާއިރު ޝެއިހް ހަސީނާ ރައްޔިތުންގެ މަޖިލީހުގައި ވެސް ތަގުރީރު ކުރައްވާނެއެވެ.
