އިންތިހާބާ ގުޅިގެން ޕީޕީއެމްގެ ބައެއް ކަންބޮޑުވުންތައް ހިއްސާކޮށްފި
ރައްޔިތުންގެ މަޖިލީހުގެ ހުސްވެފައިވާ ކޮމަންޑޫ ދާއިރާގެ ބައި-އިލެކްޝަނާ ގުޅިގެން އިދިކޮޅު ޕީޕީއެމްގެ ފަރާތުން ހުރި ބައެއް ކަންބޮޑުވުންތަކާާއި ހުށަހެޅުންތައް، އެ ޕާޓީން އިލެކްޝަން ކޮމިޝަން (އީސީ)އާ ހިއްސާކޮށްފިއެވެ.
އީސީގެ މެމްބަރުންނާ މިއަދު ބައްދަލު ކުރައްވައި، ހިއްސާ ކުރެއްވި ކަންތައްތަކާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ޕީޕީއެމްގެ ނައިބު ރައީސް އަދި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ، މިއަދު އީސީގެ މެމްބަރުންނާ ބައްދަލުކުރީ އެ އިންތިހާބާ ގުޅޭގޮތުން ޕީޕީއެމްއިން ފާހަގަ ކުރާ ކަންތައްތަކަކާ ގުޅޭގޮތުން މަޝްވަރާ ކުރުމަށް ކަމަށެވެ.
އެގޮތުން އަންނަ މަހުގެ ފަސްވަނަ ދުވަހު ބޭއްވޭ މި އިންތިހާބަކީ ހާމަކަން ބޮޑު، ދެ ފުށް ފެންނަ އިންސާފުވެރި އިންތިހާބަކަށް ވެގެން ދާން ޕީޕީއެމުން ބޭނުންވާ ކަމަށް ޑރ. މުއިއްޒު ވިދާޅުވިއެވެ.
"އަޅުގަނޑުމެން ބޭނުންވޭ މި އިންތިހާބުގައި ފޮށިތައް ކައިރީގައި (އޮފިޝަލުންގެ ގޮތުގައި) ތިބޭ މީހުންނަކީ މިނިވަން ބަޔަކަށް ވާން. މިދެންނެވީ، އެއްވެސް ޕާޓީއެއްގައި އުޅޭ މީހަކަށް ނުވުން. އެހެންވެ އީސީގެ އޮފިޝަލުން ވޯޓު ފޮށިތައް ކައިރީގައި ތިބުމަށް އެދުނިން." ޑރ. މުއިއްޒު ވިދާޅުވިއެވެ.
މީގެ އިތުރުން ޑރ. މުއިއްޒު ވިދާޅުވީ އީސީއާ އެކު ބޭއްވުނު އެ މަޝްވަރާ ބައްދަލުވުން ދިޔައީ ހިތްހަމަ ޖެހޭ ގޮތަކަށް ކަމަށާއި، އެދިލެއްވި ކަންތަކަަށް އެއްބަސްވި ކަމަށެވެ. ނަމަވެސް އީސީގެ އޮފިޝަލުންނަަށް ދަތުރު ކުރުމުގައި ދަތިތަކަކާ ކުރިމަތިވެދާނެކަން ފާހަގަ ކުރުމުން ވެސް އެކަމަށް ވަރަށް ބާރު އަޅައި ދެއްވައި، އީސީގެ އޮފިޝަލުން ވޯޓު ފޮށިތައް ކައިރީގައި ހުރެދިނުމަށް އެދިލެއްވިކަމަށް ޑރ. މުއިއްޒު ވިދާޅުވިއެވެ.
