ރިޔާސީ ބަޔާނުން އެނގުނީ މިދިޔަ އަހަރު ސަރުކާރުން ގިނަ ކަންތައްތަކެއް ކުރިކަން: ޝައުނާ
ރިޔާސީ ބަޔާނުން އެނގުނީ 2021 ވަނަ އަހަރުގައި، ސަރުކާރަށް އެތައް މަސައްކަތްތަކެއް ކުރެވުނުކަން ކަމުގައި އެންވަޔަރްމަންޓް މިނިސްޓަރު އައިމިނަތު ޝައުނާ ވިދާޅުވެއްޖެއެވެ.
މިއަހަރަށް ރައްޔިތުންގެ މަޖިލިސް ހުޅުވައި ދެއްވަވައި، ބުރާސްފަތި ދުވަހު ރައީސް އިބްރާހީމް މުހައްމަދު ސޯލިހު އިއްވެވި ރިޔާސީ ބަޔާނާ ގުޅޭގޮތުން ޓީވީ ޕްރޮގްރާމެއްގައި ވާހަަކަ ދައްކަވަމުން މިނިސްޓަރު ޝައުނާ ވިދާޅުވީ ނިމިދިޔަ އަހަރަކީ ވަރަށް ގިނަ ކަންތައްތަކެއް ހާސިލު ކުރެވުނު އަހަރެއް ކަމަށެވެ.
ރިޔާސީ ބަޔާނުން އެނގިގެން ދިޔައީ، މިހިނގާ 2022 ވަނަ އަހަރުގައި ވެސް، ތަރައްގީގެ ގިނަ މަސައްކަތްތަކެއް ކުރުމަށް ސަރުކާރުން ރާވައިފައިވާކަން ކަމުގައި ވެސް އެކަމަނާ ވިދާޅުވިއެވެ.
"އަޅުގަނޑު ދެކޭ ގޮތުގައި ރާއްޖޭގެ ތަރައްގީއަށާއި، އަދި މި ސަރުކާރުން ރައްޔިތުންނަށް ވެފައިވާ ވައުދުތައް ފުއްދައިދިނުމުގައި ސާބިތުކަމާ އެކު ސަރުކާރުން މަސައްކަތް ކުރަމުން އަންނަކަން، ރައީސުލްޖުމްހޫރިއްޔާގެ ރިޔާސީ ބަޔާނުން ވަރަށް ރަނގަަޅަށް އެނގިގެން ދިޔަ." ޝައުނާ ވިދާޅުވިއެވެ.
ރައީސް ޞާލިހު އިއްވެވި ރިޔާސީ ބަޔާނުގައި، ތިމާވެށީގެ ދާއިރާއިން ހޯދުނު ބައެއް ކާމިޔާބީތަކަށް އަލިއަޅުވައިލައްވައި ވިދާޅުވީ ފަސްދޮޅަސް ތިން ރަށެއްގައި ވޭތުވެދިޔަ އަހަރު އަވިން ކަރަންޓް އުފައްދާ ނިޒާމު ޤާއިމުކުރެވުނު ކަމަށެެވެ.
އަދި ޖުމްލަ 128 ރަށެއްގައި މި ނިޒާމުގެ ޒަރީޢާއިން އުފައްދާ އަވި-ކަރަންޓުގެ ޖުމްލައަކީ 36.5 މެގަވޮޓް ކަމަށާއި، އިތުރު 89 ރަށަކުން 25 މެގަވޮޓްގެ އަވި-ކަރަންޓް މި އަހަރުގެ ތެރޭގައި އުފެއްދުމަށް ރޭވިފައިވާ ކަމަށް ވިދާޅުވިއެވެ.
އެ މަނިކުފާނު ވިދާޅުވި ގޮތުގައި، ސަރުކާރުގެ އަމާޒަކީ ހޯމްސޯލަރ ޕްރޮގްރާމްގެ ދަށުން މަދުވެގެން 1000 ގޭބިސީގެ ފުރާޅު، މި އަހަރު މި ނިޒާމުގެ ތެރެއަށް ގެނައުމެވެ.
