ފިޝަރީޒްގެ ރަހުމް ކުޑަ ނިންމުމާ އެކު 566 ދޫނި މަރައިލި
ގަވާއިދާ ހިލާފަށް ރާއްޖެއަށް އެތެރެ ކުރި 130 ދޫނި މަރައިލި މައްސަލައެއް ފެންމަތިވެފައި ވަނިކޮށް، ފިޝަރީޒް މިނިސްޓްރީން އިސްނަގައިގެން މަރައިލި ދޫނިތަކުގެ ޖުމްލަ އަދަދު 500އަށް ވުރެ ގިނަކަން ހާމަވެއްޖެއެވެ.
"ދެން"އަށް މައުލޫމާތު ލިބިފައިވާ ގޮތުގައި ޖުމްލަ 566 ދޫނި އިއްޔެ ވަނީ ނައްތައިލައިފައެވެ.
"ގަވާއިދާ ހިލާފަށް އެތެރެ ކޮށްފައި ހުރި ދޫނިތަކެއް. ފަސް ބައެއްގެ ދޫނިތަކެއް އެއީ. ޕެޓް މާސްޓާގެ އެކަނި އެއީ 130 ދޫނި" ނަން ހާމަ ނުކުރުމަށް އެދި ދެން އަށް މައުލޫމާތު ދިން މީހަކު ބުންޏެވެ.
"ދެން" އަށް މައުލޫމާތު ދިން ފަރާތުން ބުނީ މި ހުރިހާ ދޫންޏެއް ވެސް ނައްތާލައިފައިވަނީ ހަމަ އެއްވަގުތެއްގައި ކަމަށެވެ. އެގޮތުން ދޫނިތައް މަރާލައިފައި ހުރި މަންޒަރު ދައްކުވައިދޭ ފޮޓޯތަކުން ފެންނަ "ޕެކެޓުތަކުގައި ހުރީ އެ ދޫނިތައް" ކަމަށް ވެސް އޭނާ ބުނެފައިވެއެވެ.
"އޭގައި އުޅޭނީ ސޮސައިޓީ ފިންޗް (ދިވެހިން ކިޔައި ބެންގާޅީސް)، ޖާވާ ފިންޗް އަދި ގްރާސް ފިންޗް. މައިގަނޑުކޮށް އުޅޭނީ ސޮސައިޓީ ފިންޗް." މައުލޫމާތު ދިން މީހާ ބުންޏެވެ.
މީގެ އިތުރުން އޭނާ ބުނީ، އިތުރަށް މެރި ދޫނިތައް މަރާފައި ވަނީ "ޑްރައި އައިސް" ބޭނުންކޮށްގެން ކަމަށެވެ.
"އަނެއްހެން ބުނަންޏާ އެއީ ސަފޮކޭޓް (ނޭވާ ހާސް) ކޮށްގެން. ޑްރައި އައިސްއަކީ ޑްރައިކޮށް ހުންނަ ކާބަންޑައިއޮކްސައިޑް" މައުލޫމާތު ދިން މީހާ އިތުރަށް ބުނެފައިވެއެވެ.
ދޫނިތައް މެރުމާ ގުޅިގެން ފިޝަރީޒް މިނިސްޓްރީއާއި ބަންޑާރަނައިބުގެ އޮފީހާ ދެމެދު ވަނީ ދެބަސްވުންތަކެއް ވެސް ފެންމަތިވެފައެވެ.
އެގޮތުން ދޫނިތައް ނައްތާލަން ފިޝަރީޒް މިނިސްޓްރީއަށް އަމުރުކުރީ ބަންޑާރަނައިބު ކަމަށް އެ މިނިސްޓްރީއާ ހަވާލާދީ މީޑިއާތަކުން އިއްޔެ ވަނީ ރިޕޯޓުކޮށްފައެވެ. ނަމަވެސް އެކަން ބަންޑާރަނައިބުގެ އޮފީހުން ވަނީ ދޮގު ކޮށްފައެވެ.
މިކަމާ ގުޅޭގޮތުން ނަންހާމަ ނުކޮށް "ދެން" އަށް މައުލޫމާތު ދިން މީހަކު ބުނީ، ބަންޑާރަނައިބު ލަފާ ދިނީ އެފަދައިން ނޫން ކަމަށެވެ.
"އޭޖީއިން ލަފާ ދީފައިވަނީ ސީދާ ނައްތާލާކަށް ނޫން، ކަރަންޓީނު ޕްރޮސީޖަރ އާ އެއްގޮތަށް ކުރިއަށް ގެންދަން." އެމީހާ ބުންޏެވެ.
އޭނާ އިތުރަށް ބުނީ، ޕްރޮސީޖަރ އާ އެއްގޮތަށް ކަންތައް ކުރަން އުޅެނިކޮށް، އޭގެ ދެ ދުވަސް ފަހުން ބަންޑާރަނައިބުގެ އޮފީހުން ފިޝަރީޒް މިނިސްޓްރީއަށް މެއިލެއް ފޮނުވާފައިވާ ކަމަށެވެ.
"މެއިލެއް ފޮނުވާފައި އިން، ލިޔުމަކުން ކޯޓަށް އެބަ ލަމޭ މި ކޭސް، އިތުރު ލަފާއެއް ހޯދަން. އެހެންވީމަ ދޫނިތައް ނައްތާ ނުލައި މަޑުކުރާށޭ. އެހެން ބުނެފައި ހުއްޓާ، ކޯޓުން ވަކި އަމުރެއް ނުނެރެނީސް ދޫނިތައް ނައްތާލައިފަވަނީ" ކަންހިނގައި ދިޔަ ގޮތުގެ ތަފްސީލު ކިޔައިދެމުން އެމީހާ ބުންޏެވެ.
އޭނާ އިތުރަށް ބުނީ، ބަންޑާރަނައިބުގެ އޮފީހުން އެ މައްސަލަ ކޯޓަށް ފޮނުވިކަމެއް އެނގިފައި ނުވާ ކަމަށާއި އެހެންނަމަވެސް ފޮނުވާނެ ވާހަކަ ބުނެފައިވާ ކަމަށެވެ. އަދި ދޫނިތައް ނައްތާނުލައި މަޑުކުރަން ބުނެފައިވާކަމަށް ވެސް އޭނާ ބުންޏެވެ.
