މީހުން ބަރަހަނާ ކުރުމަށް ފަހު ފޭރޭ ނެޓްވޯކުގެ ދެ މީހަކު ޝަރީއަތް ނިމެންދެން ބަންދުކޮށްފި
އޮޅުވައިލައިގެން މީހުން ގެސްޓްހައުސްތަކަށް ގެންގޮސް ރަހީނުކޮށް، ބަރަހަނާ ކުރުމަށް ފަހު އެ މީހުން އަތުން ފައިސާ ފޭރޭ ނެޓްވޯކަކަށް ނިސްބަތްވާ ދެ މީހަކު ޝަރީއަތް ނިމެންދެން ބަންދުކުރަން ކްރިމިނަލް ކޯޓުން މިއަދު އަމުރުކޮށްފިއެވެ.
މި މައްސަލައާ ގުޅިގެން ފުލުހުން ހައްޔަރުކޮށްފައި ވަނީ ހދ. ނޭކުރެންދޫ/ ވިނަރެސް، އާދަމް ވިޝާން (18އ.)އާއި ގއ. ކަނޑުހުޅުދޫ/ ފެހިގެ، އަހުމަދު ސަނީން (21އ.) އެވެ. މި ދެމީހުންގެ މައްޗަށް ދައުވާކޮށްފައި ވަނީ މިދިޔަ ޖަނަވަރީ މަހުގެ 13ގައެވެ.
މި މައްސަލައިގައި ހައްޔަރު ކުރި ވިޝާންއާއި ސަނީންގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން، އެ މައްސަލަ ބެއްލެވި ފަނޑިޔާރު އިސްމާއިލް ޝަފީއު ވަނީ، އެ ދެމީހުންގެ ބަންދާމެދު ޝަރީއަތުން ވަކި ގޮތެއް ކަނޑައަޅަންދެން އެމީހުން ބަންދުގައި ބޭތިއްބުމަށް އަމުރު ކުރައްވައިފައެވެ.
އެ ދެމީހުންގެ ތެރެއިން ވިޝާންގެ މައްސަލައާ ގުޅިގެން ކޯޓުން ބުނީ އޭނާގެ މައްޗަށް އެކަށީގެންވާ ހެކި ހުރި ކަމަށެވެ. އެގޮތުން ކޯޓުން ނެރުނު އަމުރުގައި ބުނެފައިވަނީ އިތުރު ބަޔަކާ ވިޝާން ބައިވެރިވެގެން، ތަފާތު ދެ މީހަކަށް އޮޅުވައިލައިގެން އެ މީހުން ވިލިމާލޭގައި ހުންނަ "މެލެއިމާ" ކިޔާ ގެސްޓް ހައުސްއަކަށް ގެންދިޔަ ކަމަށާއި އެ ތަނުގައި އެ މީހުން ހިފަހައްޓައި، ވަޅިން ބިރުދައްކައި އަނިޔާ ވެސް ކޮށްފައިވާ ކަމަށާއި ތޫނު ހަތިޔާރު ބޭނުންކޮށްގެން އިންޒާރުދީ، ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ ކުރުމަށް ފަހު، އެ މީހުންގެ އެކައުންޓުތަކާއި ވޮލެޓުގައި ހުރި ފައިސާ ފޭރިގެންފައިވާ ކަމުގެ ހެކި ހުރި ކަމަށެވެ.
މި މައްސަލައިގައި ސަނީންގެ މައްޗަށް ވެސް ކޮށްފައި ވަނީ ހަމަ އެ ތުހުމަތުތަކެވެ.
Ads by STO
