އޭސީސީއަށް މެންބަރުން އައްޔަނު ކުރަން މަޖިލީހަށް ނަންތައް ފޮނުވައިފި
އެންޓި ކޮރަޕްޝަން ކޮމިޝަން (އޭސީސީ)އަށް މެންބަރުން އައްޔަން ކުރުމަށް ރައީސް އޮފީހުން މިއަދު ނަންތައް ފޮނުއްވައިފިއެވެ.
ރައީސް އޮފީހުގެ ތަރުޖަމާނު މަބްރޫކް އަބްދުލްއަޒީޒް މިއަދު ވިދާޅުވީ، އޭސީސީއަށް މެންބަރުން އައްޔަން ކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް، ރައްޔިތުންގެ މަޖިލީހަށް މިއަދު ނަންތައް ފޮނުއްވައިފައިވާ ކަމަށެވެ.
ރައީސް ޞާލިޙް ފޮނުއްވި ނަންތައް ހާމަކުރާނީ (ކުރިއެެކޭ ވެސް އެއްގޮތަށް) މަޖިލީހުގައި ކަމަށް ވެސް މަބްރޫކް ވިދާޅުވިއެވެ.
އެކަށީގެންވާ ވަރަށް މަސައްކަތް ނުކުރާ ކަމަށް ބުނެ، މަޖިލިސް ޗުއްޓީގައި އޮއްވާ އޭސީސީގެ މެންބަރުން ވަކިކުރުމުގެ މަސައްކަތް ފެށުމާ އެކު، ކޮމިޝަންގެ ހުރިހާ މެންބަރުން ވަނީ އިސްތިއުފާ ދެއްވައިފައެވެ. އެއްވެސް މެމްބަރަކު ނެތި، މަސައްކަތް ހުއްޓިފައި އެ ކޮމިޝަން އޮންނަތާ މިހާރު ދޮޅު މަހަށް ވުރެ ގިނަ ދުވަސްވެ، އެ ކޮމިޝަނަށް މެންބަރުން އައްޔަނު ކުރުމަށް ނަންތައް ފޮނުވުން ލަސްވެފައިވުމުން ސަރުކާރަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ.
