"!ތިކި" ހުއްޓައިލާން އަމުރެއް ނެރެއެއް ނުދިން
"ތިކި" އެޕްލިކޭޝަނަކީ "ހަދިޔާ.އެމްވީ"ގެ ކޮޕީއެއްކަމަށް ބުނެ، އެ އެޕްލިކޭޝަން ހުއްޓައިލުމުގެ ވަގުތީ އަމުރަކަށް ލ. ފޮނަދޫ ޑޭލައިޓް، ޔޫސުފް ޚަލީލް އެދިފައިވާ އަމުރު ކޯޓުން ނެރެއެއް ނުދިނެވެ.
މިއަދު ފޮނަދޫ މެޖިސްޓްރޭޓް ކޯޓުގައި ކުރިޔަށް ދިޔަ އަޑު އެހުމުގައި މި މައްސަލަ ބެއްލެވި ގާޒީ، އަލީ ޝަރީފް ވިދާޅުވީ، މި މައްސަލައިގައި ވަގުތީ އަމުރެއް ނެރެދެވިދާނެތޯ، ނުވަތަ ނޫންތޯ، ބެލިއިރު، ވަގުތީ އަމުރު ނެރެދެވެން އޮންނަ ތިން ޝަރުތު ވެސް ހަމަނުވާ ކަމަށެވެ.
މި މިމައްސަލައިގައި ދެން އޮންނާނީ މަދަނީ ބަދަލު ނަގައިދިނުމަށް އެދި ހުށަހަޅައިފައިވާ މައްސަލައިގެ އަޑުއެހުމެވެ. މި އަޑުއެހުން ތާވަލްކޮށްފައި ވަނީ، މި އަންނަ މާރިޗް މަހުގެ 5 ވަނަ ދުވަހަށެވެ. ޔޫސުފް ޚަލީލް ކޯޓަށް ހުށަހެޅި މައްސަލައިގައި ބުނެފައި ވަނީ ތިކި އެޕްލިކޭޝަން ހަދައިފައި ވަނީ އޭނާ ހަދައިފައިވާ "ހަދިޔާ.އެމްވީ"ގެ ޑޭޓާބޭސް ނަގައިގެން ކަމަށެވެ.
މި މައްސަލައިގައި ޔޫސުފް ޚަލީލް އެދިފައި ވަނީ، ޖުމްލަ، 375،400 ރުފިޔާގެ ބަދަލަކަށެވެ. އެއީ، ތިކި ހަދައިގެން ޔޫސުފް ޚަލީލަށް ލިބުނު، ނަފްސާނީ ބަދަލުގެ ގޮތުގައި 350،000 ރުފިޔާއާއި ވެބްސައިޓް ހެދުމަށް ޔޫސުފް ޚަލީލުގެ އަތުން ޚަރަދުވި 20،000 ރުފިޔާގެ އިތުރުން، ޑޮމައިންގައި ފީއެއްގެ ގޮތުގައި ދިރާގަށް ތިން އަހަރުގެ މުއްދަތުގައި ދެކި 5،400 ރުފިޔާއެވެ.
