ބިދޭސީއަކު މަރައިލި މައްސަލައިގައި ހަމްޒާ 10 އަހަރަށް ޖަލަށް
މީގެ ހަ އަހަރު ކުރިން ބިދޭސީއަކު މަރައިއިލި މައްސަލައިގައި ދައުވާ އުފުލައިފައިވާ ލ. ގަން/ ރެޑްފިޝް، އަލީ ހަމްޒާ 10 އަހަރަށް ޖަލަށް ލައި، މަރުގެ ދިޔަ ދޭން ކްރިމިނަލް ކޯޓުން މިއަދު ހުކުމްކޮށްފިއެވެ.
ދައުލަތުން މި މައްސަލައިގައި ހަމްޒާގެ މައްޗަށް އުފުލި ދައުވާގައި ބުނެފައި ވަނީ 2015ވަނަ އަހަރުގެ ޖޫން މަހުގެ ނުވަވަނަ ދުވަހުގެ ރޭގަނޑުގެ 10:00ހައިއިރު، ބަނގްލަދޭޝްގެ ރައްޔިތެއް ކަމަށްވާ ބާންދު ޝަހުމިޔާއަށް ދިން ހަމަލާއެއްގެ ސަބަބުން އޭނާ މަރުވެފައިވާ ކަމަށެވެ. އޭނާއަށް ހަމްޒާ ހަމަލާ ދީފައިވަނީ ލ. ގަމުގައެވެ.
ހަމްޒާ ދިން ހަމަލާގެ ތަފްސީލު ހާމަ ކުރަމުން ދައުލަތުން ބުނީ، ލ. ގަން ރަންދާނުގެ ނަމަކަށް ކިޔައި ގެއެއްގެ ފެންޑާގައި ޝަހުމިޔާ ނިދައިފައި އޮއްވާ، ހަމްޒާ ވަނީ ލަކުޑި ފަތިބުރިއަކުން އޭނާގެ މޫނުމަތީގައި ޖަހައިފައި ކަމަށެވެ. އެ ފަތިބުރީގައި ތިން ފޫޓު ހުންނާނެ ކަމަށާއި، ޝަހުމިޔާ މަރުވީ ލިބުނު އެ އަނިޔާގެ ސަބަބުން ކަމަށް ވެސް ދައުލަތުން ބުނެފައިވެއެވެ.
މި މައްސަލައިގެ ތަހުގީގު މަރުހަލާގައި ހަމްޒާ ވަނީ އެ ކުށަށް ފުރަތަމަ އިއުތިރާފުވެފައެވެ. ނަމަވެސް ފަހުން ކޯޓު މަރުހަލާގައި އޭނާ އެ ކުށަށް އިންކާރު ކުރިއެވެ.
ހަމްޒާގެ މައްޗަށް ކުށް ސާބިތުވާ ކަމަށް މީގެ ކުރިން ވެސް ކޯޓުން ނިންމި ކަމުގައި ވިޔަސް އޭނާއާ ބާންދު ޝަހުމިޔާއާ މެދު ދެކޮޅުވެރިކަމެއް އޮތްކަން ހަމްޒާ ކުރިންވި އިއުތިރާފުން އެނގެން ނެތުމުން "ގަސްދު މަރައިލުމު"ގެ ކުށް ސާބިތެއް ނުވެއެވެ. އަދި ގަސްދުގައި މީހަކު މެރިކަމުގެ ރުކުންތައް ހަމްޒާ ކުރި ކުށުގެ އަމަލުން ސާބިތު ނުވާ ކަމަށް މި މައްސަލަ ބެއްލެވި ގާޒީ އަލީ އާދަމް ވިދާޅުވިއެވެ. އެކަމަކު އޭނާ މަރުވެފައި ވަނީ ހަމްޒާ ކުރި އަމަލެއްގެ ސަބަބުންކަން ސާބިތުވެފައިވާތީ މިއީ ސިބްހުލްއަމްދުގެ މަރެއް ކަމަށް ވެސް ގާޒީ ވަނީ ނިންމަވައިފައެވެ.
މިއަދު އޮތް މި މައްސަލައިގެ އަޑުއެހުމުގައި ޝަހުމިޔާގެ ވާރިސުންގެ ބަސް ވެސް ވަނީ ނަގައިފައެވެ. ވާރިސުންގެ ބަސް ނަގަމުން ދިޔައިރު ހަމްޒާ ވާހަކަ ދައްކައި ހަޑި ހުތުރު ބަސް ބޭނުންކުރުމުން، ކޯޓުގެ ހުރުމަތް ކެނޑިކަމުގެ ކުށުގައި އޭނާގެ މައްޗަށް 15 ދުވަހުގެ ޖަލު ހުކުމެއް ވެސް ގާޒީ ވަނީ އިއްވަވައިފައެވެ.
ހަމްްޒާގެ މައްޗަށް ކުށް ސާބިތުވެ، އޭނާއަށް މިއަދު އިއްވައިފައި ވަނީ 10 އަހަރު ދުވަހުގެ ޖަލު ހުކުމަކާ އެކު ތިން އަހަރުތެރޭ 1.3 މިލިއަން ރުފިޔާ ސިވިލް ކޯޓަށް ދެއްކުމަށެވެ. އަދި މިހައިތަނަށް ޖަލުގައި ހުރި މުއްދަތު ކެނޑުމަ ށްފަހު ދެން އޭނާ ތަންފީޒުކުރަން ޖެހޭނީ ހަތަރު އަހަރާއި ނުވަމަހާ 25 ދުވަހެވެ.
ބެދީސީ އަކަސް، އެ ގެއްލުވާލީ ފުރާނައެއް. މި ދުނިޔޭގައި ދޮގު ހަދައިގެން ސަލާމަތް ވަނީ ކޯއްޗެއް ހޯދަން ބާއޭ ހިތަށްއަރާ.. އިންސާފުން ޝަރީޔަތް ކުރެވޭނެ ދުވަހެއް ވޭ.