އިއްސެގެ މަރު: ހަތަރު އަހަރު ފަހުން ހުކުމް ކުރަނީ
ހއ. އިހަވަންދޫގެ އައިސް ޕްލާންޓެއްގެ ތެރޭގައި މީގެ ހަތަރު އަހަރު ކުރިން މަރައިލި ޅ. ހިންނަވަރު އިސްމާއިލް އުމަރު (އިއްސެ)ގެ މަރުގެ މައްސަލައިގައި މި މަހު ހުކުމް އިއްވަން ހަމަޖައްސައިފިއެވެ.
އައިސް ޕްލާންޓުގައި މަސައްކަތް ކުރަނިކޮށް ތޫނު އެއްޗަކުން ހަމަލާދީ ޒަހަމް ކޮށްލައިފައި ވަނީ 2017ވަނަ އަހަރުގެ ޖޫން މަހުގައެވެ. މި މައްސަލައިގައި ދައުލަތުން ދައުވާ ކޮށްފައި ވަނީ، އޭނާއާ އެކު އެތަނުގައި އެއިރު މަސައްކަތްކުރި ބަނގްލަދޭޝްގެ ރައްޔިތެއް ކަމަށްވާ ސުމޮން މިއާގެ މައްޗަށެވެ.
އިއްސެ މަރައިލިކަމަށް ސުމޯން ކޯޓުގައި އެއިރު އެއްބަސްވުމަށް ފަހު މިހާރު އެ ކަމަށް އިންކާރު ކުރެއެވެ.
މި މައްސަލައިގެ އަޑުއެހުމެއް މިއަދު ކްރިމިނަލް ކޯޓުގައި ބާއްވައި ދެ ފަރާތުގެ ޚުލާސާ ބަޔާން އިއްވުމަށް ފަހު، އެ މައްސަލަ ބައްލަވާ ގާޒީ އަލީ އާދަމް ވިދާޅުވީ އެ މައްސަލައިގައި ކުށް ސާބިތުވޭތޯ ކަނޑައެޅުމަށް ބާއްވާ މަޖިލިސް މިމަހު އޮންނާނެ ކަމަށާއި، ކުށް ސާބިތުވާ ކަމަށް ނިންމައިފި ނަމަ އެ ދުވަހު އިއްސެގެ ވާރިސުންގެ ބަސް ވެސް ނަގާނެ ކަމަށެވެ.
މިއަދުގެ އަޑުއެހުމުގައި ޚުލާސާ ބަޔާން ހުށަހަޅަމުން ދައުލަތުން ބުނީ ސުމޮން ވަނީ ތަހުގީގުގެ އިތުރުން ކޯޓުގައި ވެސް ކުށަށް އިއުތިރާފްވެ، އެކަން ކުރި ގޮތް ކިޔައިދީފައިވާ ކަމަށެވެ. ހަމަލާދިން ހަތިޔާރާއި ގޮތަށް ބަލާއިރު އިއްސެ މެރުމުގެ ގަސްދު ސުމޮންގެ ކިބައިގައި އޮތް ކަމަށާއި އަދި އޭނާގެ އިއުތިރާފަށް ބާރު ލިބޭ އެތައް ހެއްކެއް އެބަހުރި ކަމަށް ވެސް ދައުލަތުން ބުންޏެވެ. އަދި އެއްވެސް ޝައްކެއް ނެތް މިންވަރަށް ސުމޮން މައްޗަށް ކުށް ސާބިތުވާނެ ކަމަށް ދައުލަތުން ބުންޏެވެ.
ދައުލަތުގެ ފަރާތުން ސުމޮންއަށް ހަމަޖައްސައިދިން ވަކީލާ ވިދާޅުވީ، ސުމޮން ކުށަށް އެއްބަސްވީ އޭނާއަށް ބިރުދެއްކުމުން ކަމަށާއި އެއިރު އޭނާއަށް ވަކީލެއްގެ އެހީތެރިކަން ވެސް ނުލިބޭ ކަމަށެވެ.
