Monday, 16 November 2026
Advertisement
Ooredoo — Article-Top (leaderboard)
ސިޔާސީ

އިންޑިއާ ސިފައިން މިތާ ތިބި ނަމަ، ބަޑި ހިފައިގެން އުޅެނިކޮށް ދައްކާ: ޖޭޕީ

އިންޑިއާ ސިފައިން މިތާ ތިބި ނަމަ،  ބަޑި ހިފައިގެން އުޅެނިކޮށް ދައްކާ: ޖޭޕީ
ރާއްޖޭގައި އިންޑިއާ ސިފައިން ތިބި ނަމަ، އެމީހުންގެ ބަޔަކު ރާއްޖޭގައި ބަޑި ހިފައިގެން އުޅެނިކޮށް ދެއްކުމަށް ޖުމްހޫރީ ޕާޓީން އެދިއްޖެއެވެ. އިންޑިއާއިން ރާއްޖެއަށް ހަދިޔާ ކުރި ދެ ހެލިކޮޕްޓަރާ އެކު، އެގައުމުގެ 75 ސިފައިން ރާއްޖޭގައި ހަރަކާތްތެރިވަމުންދާ ކަމަށް އެމްއެންޑީއެފްއިން މީގެ ކުރިން ވަނީ ކަށަވަރު ކޮށްދީފައެވެ. މި މައްސަލައިގައި ގިނަ ބަޔަކު ކަންބޮޑުވުންފާޅު ކުރަމުން އަންނަ އިރު، ސަރުކާރަށް ތާއީދު ކުރައްވާ ބޭފުޅުން ވިދާޅުވަނީ، ރާއްޖޭގައި އިންޑިއާ ސިފައިން ތިބި ނަމަވެސް، އެމީހުން ހަތިޔާރު ނުގެންގުޅޭ ކަމަށެވެ. މިކަމާ ގުޅިގެން އިދިކޮޅުން ބުނަނީ، ހަތިޔާރު ނެތަސް، ރާއްޖޭގައި، ރާއްޖެއަށް ވުރެ އަސްކަރީ ގޮތުން ގާބިލު ގައުމެއްގެ ސިފައިން ތިބުމަކީ ކޮންމެ ހިނދެއްގައި ވެސް ގައުމީ ސަލާމަތަށް ނުރައްކާވެދާނެ ކަމެއް ކަމަށެވެ. ދިވެހި ޗެނަލްގެ ޕްރޮގްރާމެއްގައި ވާހަކަ ދައްކަވަމުން، ސަރުކާރު ކޯލިޝަނުގައި ހިމެނޭ ޖޭޕީގެ އިސް ތަރުޖަމާނު އަދި މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީގެ ސްޓޭޓް މިނިސްޓަރު އަލީ ސޯލިހު ވިދާޅުވީ ރާއްޖޭގައި ކުލީ ސިފައިން ތިބި ކަމަށް ބުނެ ދައްކަނީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. [caption id="attachment_143872" align="alignnone" width="1140"] ޖޭޕީގެ އިސް ތަރުޖަމާނު އަލީ ސޯލިހު--[/caption]
"އެހެންވީމަ، ކުލީ ސިފައިންނޭ ކިޔައިފައި ޒާތްޒާތުގެ ވާހަކަ ދައްކާއިރު، އަޅުގަނޑުމެންނަށް އެނގެނީ ރޯ ބުހުތާނު ދޮގުކަން. ދިވެހިރާއްޖޭގައި އިންޑިއާގެ މިލިޓަރީއެެއް އޮތް ކަމަކަށް އަޅުގަނޑުމެން ގަބޫލެއް ނުކުރަން. ހަތިޔާރު އެޅި ސިފައިން ތިބި ކަމަކަށް އަޅުގަނޑުމެން ގަބޫލެއް ނުކުރަން. ތިބި ނަމަ، އެންމެ ފުރަތަމަ އެ ފޮޓޯ ޓްވީޓް ކުރައްވާނީ ވެސް، ރައީސް ޔާމީން." އަލީ ސޯލިހު ވިދާޅުވިއެވެ.
އަލީ ސޯލިހު ވިދާޅުވީ ތަމްރީނުގެ ބޭނުމަށާއި، އެ ނޫން ވެސް އެކި ބޭނުންތަކަށް ރާއްޖޭގައި އިންޑިއާގެ ބައެއް ސިފައިން އެބަތިބި ކަމަށާއި، އެހެން ނަމަވެސް އެމީހުން ހަތިޔާރެއް ނުގެންގުޅޭ ކަމަށެވެ. އިންޑިއާ ސިފައިން ރާއްޖޭގައި ގާއިމުވެ ތިބުމުގެ އިތުރުން، އެ ގައުމާ އެކު ދިވެހި ސަރުކާރުން ހަދައިފައިވާ އެއްބަސްވުންތައް ސިއްރު ކުރުމަކީ ވެސް އިދިކޮޅުގެ ކަންބޮޑުވުމެކެވެ. އެގޮތުން އުތުރުތިލަފަޅު ނުވަތަ ޔޫޓީއެފްގެ އެއްބަސްވުން ހާމަ ނުކުރާތީ ވެސް ކަންބޮޑުވުން ފާޅު ކޮށްފައިވެއެވެ. 2018ވަނަ އަހަރުގައި އެމްޑީޕީއަށް ދެވަނަ ފަހަރަށް ވެރިކަން ހޯދައިދިނުމަށް އިންޑިއާގެ ޑިޕްލޮމެޓުން އެހީތެރިވި ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވި އިރު، އެގައުމުން އެމްޑީޕީއަށް އެހީވީ، ޕީޕީއެމްގެ ވެރިކަން ދެމި އޮވެއްޖެ ނަމަ، ރާއްޖޭގައި ތިބި އެގައުމުގެ ސިފައިން އަނބުރާ ގެންދަން ޖެހިދާނެތީ ކަމަށް ވެސް އިދިކޮޅު ފަރާތްތަކުން ތުހުމަތު ކުރެއެވެ.      

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.