ޔޫކްރެއިންގައި ތިބި ދަރިވަރުންގެ ކިޔެވުން ފުރިހަަމަ ކުރެވޭނެ ގޮތެއް ހޯދަނީ
ޔޫކްރޭނުން އެނބުރި އައި ދިވެހި ދަރިވަރުންނަށް އަލުން އެ ޤައުމަށް ދެވޭނެ ދުވަހެއް ޔަޤީން ނުވާތީ، އެ ދަރިވަރުންގެ ކިޔެވުން ފުރިހަމަ ކުރެވޭނެ ގޮތެއް ހޯދައިދިނުމަށް މިނިސްޓްރީ އޮފް ފޮރިން އެފެއާޒާއި މިނިސްޓްރީ އޮފް ހަޔަރ އެޑިޔުކޭޝަން ގުޅިގެން މިހާރު މަސައްކަތްކުރަމުން އަންނަ ކަމަށް ރައީސް އިބްރާހީމް މުހައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ، މިއަދު ޤައުމާ މުޚާތަބު ކުރައްވާ ދެއްކެވި ވާހަކަފުޅުގައެވެ.
ރަޝިޔާއިން ޔޫކްރެއިންއަށް އަރައި ހަމަލާދޭން ފެށިއިރު، އެ ޤައުމުގައި 55 ދަރިވަރުން ތާށިވެފައި ތިއްބެވެ. ފޮރިން މިނިސްޓްރީން ވަނީ އެ ކުދިން ރާއްޖެ ގެނެސްދިނުމުގައި، ރައީސް ޞާލިހްގެ އެންގެވުމަށް އެހީތެރިވެދީފައެވެ. އަދި އެ ކުދިން ރާއްޖެ ގެނައުމުގެ ޚަރަދުތައް ހަޔަރ އެޑިއުކޭޝަން މިނިސްޓްރީން ވަނީ ކޮށްދީފައެވެ.
މިރޭ ދެއްވި ޚިތާބުގައި ރައިީސް ޞާލިޙް ވިދާޅުވީ، ޔޫކްރޭން މައްސަލައާ ގުޅިގެން ލިބޭ ގެއްލުންތައް ކުޑަކުރުމުގެ ގޮތުން މި ހަނގުރާމައިގެ އަސަރުކުރާނެކަމަށް ބެލެވޭ ސަރަޙައްދުތަކުގައި ދިރިއުޅޭ ދިވެހިންގެ ތެރެއިން، މިވަގުތު ރާއްޖެ އަންނަން ބޭނުންވާ ދިވެހިން ގެނައުމަށް މިހާރު ކުރަމުން އަންނަ މަސައްކަތްތައް ކުރިއަށް ގެންދާ ކަމަށެވެ.
މީގެ އިތުރުން، ހަނގުރާމަ ދިގުލައިގެން ގޮސް އެންމެ ގޯސް ހާލަތުގައި ރާއްޖޭގެ އިގްތިސާދަށް ލިބިދާނެ ގެއްލުމުގެ އަންދާޒާއެއް ތައްޔާރުކޮށް ފިނޭންސް މިނިސްޓްރީން މިހާރު އަންނަނީ ފިޔަވަޅުތައް އަޅަމުން ކަމަށް ވެސް ރައީސް ވިދާޅުވިއެވެ. އަދި ޔުކްރޭން ހަނގުރާމައާ ގުޅިގެން ރާއްޖޭގެ ޓޫރިޒަމަށް އަންނާނެ ގެއްލުންތައް ދިރާސާކޮށް އައު މާކެޓްތައް ހޯދުމުގެ މަސައްކަތް ޓޫރިޒަމް މިނިސްޓްރީއާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން ގުޅިގެން ކުރަމުން އަންނަ ކަމަށް ވެސް ވިދާޅުވިއެވެ.
ޔޫކްރޭން މައްސަލައިގައި ރާއްޖޭގެ ވިސްނުން ބަޔާންކުރައްވަމުން ރައީސުލްޖުމްހޫރިއްޔާ ވިދާޅުވީ ރާއްޖޭގެ ޚާރިޖީ ސިޔާސަތު ބިނާވެފައި ވަނީ ކޮންމެ ޤައުމެއްގެ ވެސް މިނިވަންކަމާއި ސިޔާދަތަށް ޙުރުމަތްތެރިކޮށް ހިތުމުގެ މައްޗަށް ކަމަށާއި ކުޑަ ޖަޒީރާ ޤައުމެއްގެ ގޮތުގައި އޮވެ، ރާއްޖެއިން ޒަމާނުއްސުރެ ވަކާލާތުކުރަމުން އަންނަނީ ވެސް އެ ބިންގަލުގެ މަތީގައި ބައިނަލްއަޤުވާމީ ގުޅުންތައް ދެމެހެއްޓުމަށްކަމުގައެވެ. އަދި ޔޫކްރެއިންގެ ރައްޔިތުންނަށް ލިބެމުންދާ އަނިޔާތަކާ މެދު ހަމްދަރުދީ ފާޅުކުރައްވައި ދެފަރާތުގެ މެދުގައި ހުރި ދެބަސްވުންތަކަށް ހައްލެއް ހޯދުމަށް ޓަކައި، ދެ ފަރާތުން ވެސް މަޝްވަރާގެ މޭޒުދޮށަށް އެނބުރި އައުމަށް، ބައިނަލްއަޤުވާމީ މުޖްތަމަޢުން ގޮވައިލާ ގޮވައިލުން ދިވެހިރާއްޖެއިން ވެސް ތަކުރާރުކުރައްވާކަމުގައި ރައީސުލްޖުމްހޫރިއްޔާ ވިދާޅުވިއެވެ.
Ads by STO
