ޑީއާރުޕީގެ ވެރިކަމެއްގައި އެއްލައްކަ ގޯތި ބަހާނަން: ޖާބިރު
ކާށިދޫ ދާއިރާގެ މެންބަރު އަބްދުﷲ ޖާބިރު މިއަދު ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.
އިއްޔެ ވެސް ޖާބިރު ހުށަހެޅުއްވި މައްސަލައެއް މަޖިލީހުން ވަނީ ބޭރުކޮށްލައިފައެވެ.
މިއަދު ޖާބިރު ހުށަހެޅި ކުއްލި މައްސަލައަކީ މާލޭގެ ދަފްތަރުގައި ތިބި މީހުންނަށް، މާލޭން ގޯތި ދިނުމަށް ނިންމައިފައި ވާތީ ހުށަހެޅި މައްސަލައެކެވެ.
ކުއްލި މައްސަލަ ހުށަހަޅުއްވަމުން ޖާބިރު ވިދާޅުވީ، ތަފާތުކޮށްދިނުމެއް ނެތި ދިވެހި ރައްޔިތުންނަށް ޚިދުމަތް ފޯރުކޮށްދޭން ވާނެ ކަމަށާއި ބޯހިޔާވަހި ކަމަކީ އަސާސީ ޙައްޤެއް ކަމަށް ޤާނޫނުގައި އޮންނަ ކަމަށެވެ. ނަމަވެސް ސަރުކާރުން ކަނޑައަޅައިފައިވާ ގޯތި ގެދޮރުގެ ސިޔާސަތުގެ ސަބަބުން، އެތައް ބައެއްގެ މި ޙައްޤުން މަޙްރޫމް ވެގެންދާ ކަމަށް ޖާބިރު ވިދާޅުވިއެވެ.
މާލޭގެ ދަފްތަރަށް އިޝާރާތް ކުރައްވާ ޖާބިރު ވިދާޅުވީ، މާލޭގައި ދިރިއުޅޭ ގިނަ ރައްޔިތުންނަކީ ދަފްތަރުގައި ޖެހިފައިވާ ބައެއް ނޫން ކަމަށާއި ގޯތި ދޭއިރު ދަފްތަރުގައި ތިބި ފަރާތްކަށް އިސްކަން ދިނުމަކީ އިންސާފެއް ނޫން ކަމަށެވެ. އަދި ރާއްޖެތެރޭގެ މީހުންނާއި މާލޭ މީހުންނާ ތަފާތު ކުރުމެއް ނެތި ބޯހިޔާވަހިކަން ފޯރުކޮށްދޭން ޖެހޭ ކަމަށް ވިދާޅުވިއެވެ.
އިއްޔެ މަޖިލީހަށް ވަޑައިގެން، ޕްލޭނިން މިނިސްޓަރު އަސްލަމް ވިދާޅުވީ މާލޭގައި ދިރިއުޅޭނެ އެއްވެސް ތަނެއް ނެތް މާލެ މީހުންނަށާއި ދަފްތަރަށް އުފަން މީހުންނަށް ވެސް ގޯތިތަކަށް ކުރިމަތިލެވޭނެ ކަމަށެވެ.
މަޖިލީހުން މައްސަލަ ބަލައިގަތުމަށް ވޯޓު ދެއްވީ ތިން މެންބަރުންނެވެ. 28 މެންބަރުން ވޯޓް ދެއްވީ ބަލައިނުގަތުމަށެވެ. އެއް މެންބަރަކު ވަކި ގޮތަކަށް ވޯޓް ނުދެއްވައެވެ.
މައްސަލަ ބޭރުކޮށްލުމުން ވެސް، ޖާބިރު ވަނީ މި މައްސަލައާ ގުޅޭ ގޮތުން ވާހަކަފުޅު ދައްކަވައިފައެވެ. ސިވިލް ސާވިސް ޤާނޫނަށް އިސްލާޙް ހުށަހެޅުމަށް ބަހުސްކުރުމަށް ލިބުނު ވަގުތުގެ ބޭނުން ހިފައި ޖާބިރު ވިދާޅުވީ ސަރުކާރުން ގޯތީގެ ސިޔާސަތުތަކަށް މިއަދު ވަރަށް ގިނަ ރައްޔިތުން ބަވަމުންދާ ކަމަށެވެ. އަދި ދަފްތަރަކީ މައުމޫން އުފެއްދި ފޮތެއް ކަމަށާއި އިތުރު އެެހެން އެއްވެސް ބޭނުމެއް އޮންނަ އެއްޗެއް ނޫން ކަމަށް ވިދާޅުވިއެވެ. އަދި އެމަނިކުފާނުގެ ވެރިކަމެއްގައި އެއްހާސް ގޯތި ދެއްވާނެ ކަމަށް ވިދާޅުވިއެވެ.
"ދައުލަތުން ދޭންވާ އެއްޗެއް ދެއްވާށޭ. ދައުލަތުގެ މުދާ އެބަހުއްޓޭ. ދައުލަތުގެ މުދާ އިޝޫ ކުރެވޭނޭ. ޑީއާރުޕީގެ ވެރިކަމެއްގައި އެއްލައްކަ ފްރީ ގޯތި ވަގުތުން ފްރީކޮށް ބަހާނަމޭ ރައްޔިތުންނަށް. ކީއްވެހޭ ނުވާންވީ، ޤައުމުގައި ހުރި އެއްޗަކީ ގޯއްޗެއް ނޫންހޭ. މި ބިންތަކުގައި އަޅުގަނޑުމެންނަށް ދިރިއުޅެވޭނެ ގޮތް ހަދައިދޭށޭ." ޖާބިރު ވިދާޅުވިއެވެ.
