ޖެނުއަރީ މަހު ސަރުކާރު މުވައްޒަފުންގެ މުސާރަ އިތުރު: ތަފާސްހިސާބު
ނިމިދިޔަ ޑިސެމްބަރުމަހާ އަޅައި ބަލާއިރު މިއަހަރުގެ ޖެނުއަރީ މަހު ސަރުކާރު މުވައްޒަފުންގެ އެވަރޭޖް މުސާރަ އިތުރުވެފައިވާކަމަށް ބިއުރޯ އޮފް ސްޓެޓިސްޓިކްސްގެ ތަފާސް ހިސާބުތަކުން ދައްކައިފިއެވެ.
އާންމުކުރި ތަފާސް ހިސާބުތައް ދައްކާ ގޮތުގައި ޖެނުއަރީ މަހު އެކަނި ސަރުކާރު މުވައްޒަފުންގެ މުސާރައަށް 430.9 މިލިއަން ރުފިޔާ ދައުލަތުގެ ބަޖެޓުން ހޭދަކޮށްފައިވެއެވެ.
ތިން ގިންތިއަކަށް މި ފައިސާ ބަހައިލައިފައިވާ އިރު އެންމެ ބޮޑު ހޭދައެއްކޮށްފައި ވަނީ ޕަބްލިކް އެޑްމިނިސްޓްރޭޝަން ދާއިރާގެ މުވައްޒަފުންނަށް މުސާރަ ދިނުމަށެވެ. އެ ދާއިރާގެ މުވައްޒަފުންގެ މުސާރައަށް 285 މިލިއަން ރުފިޔާ ހަރަދުކޮށްފައިވެއެވެ.
މީގެ އިތުރުން ތައުލީމީ ދާއިރާގެ މުވައްޒަފުންގެ މުސާރައަށް 53.8 މިލިއަން ރުފިޔާ ސަރުކާރުން ހަރަދުކޮށްފައިވާ އިރު ސިއްހީ ދާއިރާގެ މުވައްޒަފުންގެ މުސާރައަށް 92 މިލިއަން ރުފިޔާ ވަނީ ހަރަދުކޮށްފައެވެ.
އެވަރޭޖްކޮށް ސަރުކާރު މުވައްޒަފެއްގެ މުސާރައަށް 15،686 ރުފިޔާ ޖެހިފައިވާކަމަށް ހިސާބުތަކުން ދައްކައެވެ. މިދިޔަ އަހަރުގެ ޑިސެމްބަރު މަހު އެވަރޭޖް މުސާރައަކީ 15،441 ރުފިޔާއެވެ. އެހެންކަމުން އެ މަހާ އަޅައި ބަލާއިރު ޖެނުއަރީ މަހުގެ މުސާރައަށް 1.6 އިންސައްތައިގެ އިތުރުވުމެއް ވަނީ އައިސްފައެވެ.
ރައީސް އިބްރާހިމް މުހައްމަދު ޞާލިހުގެ ވެރިކަމުގެ ހަތަރު އަހަރު ދުވަހުގެ ތެރޭގައި ސަރުކާރު މުވައްޒަފުންގެ އަދަދު ވަނީ 33.3 އިންސައްތަ އިތުރުވެފައެވެ. އެގޮތުން މިހާރު ސަރުކާރު އެކި މުއައްސަސާތަކާއި އޮފީސްތަކުގައި މަސައްކަތް ކުރާ 27،467 މުވައްޒަފުން އެބަތިއްބެވެ.
މުވައްޒަފުންގެ އެވަރޭޖު މުސާރަ އެންމެ ބޮޑަށް އިތުރުވީ ނިމިދިޔަ 2021 ވަނަ އަހަރުގެ އޯގަސްޓު މަހުއެވެ. އެމަހު މުސާރައިގެ ގޮތުގައި އެވަރޭޖުކޮށް ކޮންމެ މުވައްޒަފަކަށް 16،531 ރުފިޔާ ލިބުނެވެ.
މިދިޔަ ޖެނުއަރީ މަހު އެވަރޭޖު މުސާރަ 15،000 ރުފިޔާއިން މަތީގައި ހުރި ނަމަވެސް ސަރުކާރު ބައެއް މުވައްޒަފުންނަށް އެއަށް ވުރެ ކުޑަކޮށް ވެސް މުސާރަ ލިބެއެވެ. އެވަރޭޖު މުސާރަ ހިސާބު ކުރަނީ މުސާރައަށް ޖުމްލަ ހޭދަ ކުރާ މިންވަރާއި މުވައްޒަފުންގެ އަދަދަށް ބެލުމަށް ފަހުއެވެ.
Ads by STO
