ފިރިމީހާގެ ރީތި ފޮޓޯތަކެއް ނަގައިދީ، ކެޓްރީނާ އިތުރު ހުނަރެއް ދައްކުވައިދީފި
ބޮލީވުޑްގައި އެންމެ ފަހުން ކައިވެނި ކުރި ތަރިންނަށް ބަލާއިރު، ކެޓްރީނާ ކެއިފްއާއި ވިކީ ކޯޝަލްއަކީ ގިނަ ބައެއްގެ ލޯތްބާއި ތަރުހީބު ލިބެމުން އަންނަ ޖޯޑެކެވެ.
އެ ދެމީހުންގެ ކައިވެނީގެ ވާހަކަތައް ދެކެވެން ފެށި ދުވަހުން ފެށިގެން، ކައިވެނި ކުރުމަށް ފަހު މިއަދާ ޖެހެންދެން ވެސް ގިނަ ބަޔަކު ތިބެނީ އެ ދެމަފިރިންގެ ކުޑަ ނަމަވެސް ހަރަކާތަކަށް ބަލަބަލައެވެ.
އެގޮތުން މި ދެމަފިރިންނާ ބެހޭގޮތުން އެންމެ ފަހުން އިންޑިއާގެ ނޫސްތަކުގައި ލިޔެފައި ވަނީ، ކެޓްރީނާ އޭނާގެ ފިރިމީހާގެ ވަރަށް ރީތި ފޮޓޯތަކެއް ނަގައިދިން ވާހަކައެވެ.
ކެޓްރީނާގެ ނަގައިދިން ފޮޓޯތައް އިންސްޓަގްރާމް ސްޓޯރީގައި ހިއްސާ ކުރަމުން ވިކީ ވަނީ އެއީ އޭނާގެ އަނބިމީހާ ނަގައިދިން ފޮޓޯތަކެއް ކަމަށް ފަހުރުވެރިކަމާ އެކު ބުނެފައެވެ. އަދި ކެޓްރީނާގެ އެ ހުނަރަށް އެތައް ބަޔަކު ވަނީ ތައުރީފު ވެސް ކޮށްފައެވެ.
ކެޓްރީނާއާއި ވިކީ ކައިވެނި ކުރީ މިދިޔަ އަހަރުގެ ޑިސެމްބަރު މަހުގައެވެ. ކައިވެންޏާ ގުޅިގެން މި ދެ ތަރިން މަސައްކަތުން ކުޑަ ދުވަސްކޮޅަކަށް ޗުއްޓީ ނެގި ނަމަވެސް، ކައިވެންޏަށް މަހެއް ވެސް ނުވަނީސް އަލުން ވަނީ މަސައްކަތަށް ނިކުމެފައެވެ.
