މަރުވި އިންޑިއާ ދަރިވަރުގެ ހަށިގަނޑު،މެޑިކަލް ރިސާޗަށް ހަދިޔާކޮށްފި
ރަޝިއާގެ އަސްކަރިއްޔާއިން ޔޫކްރޭނަށް އަރައި ދެމުންގެންދާ ހަމަލާތަކުގައި މަރުވި އިންޑިއާގެ ދަރިވަރު އުމުރުން 21 އަހަރުގެ ނަވީންގެ ހަށިގަނޑު މެޑިކަލް ރިސާޗްތަކުގައި ބޭނުން ކުރުމަށް ނަވީންގެ އާއިލާއިން ނިންމައިފިއެވެ.
އިންޑިއާގެ ޚަބަރުތައް ބުނާ ގޮތުގައި އާއިލާގެ ފަރާތުން ނަވީންގެ ބައްޕަ އެކަން ވަނީ ހާމަކޮށްފައެވެ. ކަރްނާޓަކާގެ ހަވޭރީ ޑިސްޓްރިކްޓަށް ނިސްބަތްވާ ނަވީންގެ އާއިލާއިން މި ނިންމުން ނިންމައިފައި ވަނީ ނަވީންގެ ހުވަފެންތަކާ އެއްގޮތަށް ކަމަށް ނަވީންގެ ބައްޕަ ބުނެފައި ވެއެވެ.
"އޭނާ ބޭނުންވި މެޑިކަލްދާއިރާއިން ބޭނުންތެރި މީހަކަށް ވާން، އެކަން ހާޞިލް ނުކުރެވުނު ނަމަވެސް އޭނާގެ ހަށިގަނޑު (މެޑިކަލްދާއިރާގައި)ބޭނުންކުރަން އާއިލާއިން ނިންމީ"ނަވީންގެ ބައްޕަ މީޑިއާތަކަށް ބުނެފައި ވެއެވެ.
ނަވީން މަރުވީ މި މަހުގެ އެއްވަނަ ދުވަހު ރަޝިއާއިން ދިން ހަމަލާތަކެއްގައެވެ. ހަމަލާ އަމާޒުވި އިރު އޭނާ ހުރީ ކާއެއްޗިހި ގަންނަން ކިޔޫގައި ކަމަށް ޚަބަރުތައް ބުނެއެވެ.
ނަވީން މަރުވުމާ ގުޅިގެން އޭނާގެ ބައްޕަ ވަނީ އިންޑިއާގެ މަތީތައުލީމީ ދާއިރާއަށް ފާޑު ކިޔައިފައެވެ. އެގޮތުން ތައުލީމް ހާސިލްކުރުމުގެ ފުރުސަތު ގައުމުން ނުލިބި ބޭރަށް ދާން ޖެހޭތީ އޭނާ ފާޑު ކިޔައިފައި ވެއެވެ.
"ޕްރި ޔުނިވަރސިޓީ ކޯހުން 97އިންސައްތަ ލިބުނު ނަމަވެސް އަހަރެންގެ ދަރިފުޅަށް މެޑިސިން ކިޔަވާނެ ފުރުސަތެއް ގައުމަކުން ނުލިބުނު، މިތަނުން މެޑިސިން ކިޔަވަންޏާ އެބަޖެހޭ އެތައް ކްރޯޑް ރުޕީސްއެއް ޚަރަދުކުރަން ، ބޭރު ގައުމުތަކުން އެއަށް ވުރެ މާކުޑަ ޚަރަދެއްކޮށްގެން މެޑިސިން އެބަކިޔެވޭ" ނަވީންގެ ބައްޕަ ބުނެފައި ވެއެވެ.
ނަވީންގެ ހަށިގަނޑު އިންޑިއާއަށް ގެންދިޔުމަށް ހަމަޖެހިފައި ވަނީ މި އަންނަ ހޯމަ ދުވަހުއެވެ. ޖަނާޒާގެ ކަންތައްތަކަށް ފަހު ހަށިގަނޑު ހަދިޔާކުރަން ނިންމައިފައި ވަނީ ހިތުގެ ބަލިތަކަށް ޚާއްޞަ ކަރްނާޓަކާގެ ހޮސްޕިޓަލެއްކަމަށްވާ އެސްއެސް ހޮސްޕިޓަލަށެވެ.
"ހަށިގަނޑު ލިބުމުން ޖަނާޒާގެ ކަންކަން ނިންމައި މޫނު ދެއްކުން އޮންނާނެ، އޭގެ ފަހުން އެސްއެސް ހޮސްޕިޓަލަށް ހަށިގަނޑު ދޭނަން" ނަވީންގެ ބައްޕަ މީޑިއާއަށް ބުނެފައި ވެއެވެ.
