ހެނދުނު އޮފީހަށް ދާން ހޭލުމަކީ ބޮޑު ކަމެއް ދޯ؟
ފަތިސް ނަމާދަށް ފަހު ނިދާލުމަކީ ގިނަ މީހުންގެ އާދައެކެވެ. އަދި ހެނދުނު ހޭލަން ޖެހުމަކީ އެންމެ މުރާލި މީހާވެސް ކަތްނެތް ވާ ކަމެކެވެ. ބައެއް މީހުންނަށް ކުޑަ ހިތްވަރެއް ލައިގެން ހެނދުނު ގަޑީގައި ހޭލެވޭއިރު، އަނެއް ބައި މީހުންނަށް އެލާމް ކޮށްގެންވެސް ހޭލުން ވެފައިވަނީ ވަރަށް އުނދަގޫ ކަމަކަށެވެ. ވަޒީފާ އަދާ ކުރާ މީހުންގެ ތެރެއިން، ހެނދުނު ޑިއުޓީއަށް ނިކުންނަން ޖެހޭ މީހުންނަށް ހެނދުނު ހޭލަން ޖެހުމުގެ އުނދަގޫ އިހްސާސް ވާނެއެވެ.
ވިއްސާރަ ދުވަހެއް ނަމަ އަދި ހެނދުނު ހޭލުމަކީ ވަރަށް ބޮޑު ކަމެކެވެ. ހެނދުނު ނިދި ލިބުމަކީ ކުރިއަށް އޮތް ދުވަހުގެ ވަގުތުތައް ހަމަޖެހިގެން ވޭތުކޮށްލުމަށް ވަރަށް ފަސޭހަ ކަމެކެވެ. ހަމަ ނިދި ނުލިބޭ ކަމަށްވާނަމަ މީހާގެ ދުވަސް ފުރިހަމަ ނުވާނެއެވެ. އޭރުން މުޅި ދުވަހު ހުންނާނީ ބޮލަށް ބަރުވެ، ބޮލުގައި ރިއްސާފައެވެ. ރަނގަޅަށް ނިދި ހަމަނުކޮށް ވަޒީފާއަށް ދާ ދުވަސް ދުވަހު ހަމަޖެހިލައިގެން ރަނގަޅު މަސައްކަތެއް ކުރުން ވަނީ އުދަނގޫ ކަމަކަށެވެ. މީހަކު އަނގައިން ބުންޏަސް ހުންނާނީ ފާޑަކަށް މޫޑު ގޯސްވެފައެވެ.
ސަރުކާރު އޮފީސްތަކުގައި މަސައްކަތް ކުރާ މުވައްޒަފުންނަށް ހުކުރު ހޮނިހިރު ދުވަހަކީ ވަރަށް ހިތް އުފާވާ ދެ ދުވަހެވެ. ސަބަބަކީ އެ ދެ ދުވަހު އޮފީސް ބަންދުވުމާއެކު ރަނގަޅަށް ނިދާލެވޭނެތީއެ ވެ. ހެނދުނުގެ އަރާމު ނިދި ލިބޭނެތީއެވެ. އެހެން ރޭ ރޭ ރޭގަނޑު އަވަހަށް ނިދި ނަމަވެސް، ބުރާސްފަތި އަދި ހުކުރު ދުވަހުގެ ރޭ ސީރީޒް ބެލުމަށާއި އެކުވެރިންނާއިއެކު ވަގުތުތައް ހޭދަކުރަން ނުނިދާ ގިނަ އިރު ހޭލާ ތިބުމަކީ ގިނަ ބައެއް ކުރާ ކަމެކެވެ. ހުކުރު އަދި ހޮނިހިރު ދުވަހު ހެނދުނު ގަޑީގައި ވަޒީފާއަށް ނިކުންނަން ޖެހިއްޖެނަމަ އެވާނީ ވަރަށް ހިތްދަތިވެ ހިތްހަމަ ނުޖެހޭ ކަމަކަށެވެ.
ހެނދުނު ވަޒީފާއަށް ނިކުންނަން ޖެހޭ މީހުން ކުރިން ނިދުމަކީ ވަރަށް މުހިންމު ކަމެކެވެ. ރަނގަޅަށް ނިދި ނުލިބުމަކީ ސިއްހީ ވަރަށް ގިނަ މައްސަލަތަކާއިވެސް ކުރިމަތި ލާން ޖެހިދާނެ ކަމެކެވެ. ތިމާ އަދާކުރާ ވަޒީފާވެސް އެންމެ ފުރިހަމައަށް އަދާކުރެވޭނީ ރަނގަޅަށް ނިދި ހަމަ ވާނަމައެވެ. ރޭގަނޑު ދަން ވަންދެން ހޭލާ އުޅުމަށްފަހު ހެނދުނު ހޭލަން ޖެހުމުން ކިތަންމެ ވަރަށް ޝަކުވާ ކުރިޔަސް ފައިދާއެއް ނުވާނެއެވެ. ހެނދުނު އޮފީހަށް ދާން ޖެހޭތީ ކަންބޮޑުނުވެ ރޭގަނޑު ، އަވަހަށް ނިދަން އާދަކުރާށެވެ.
