އަނބިމީހާއާ އަރައިރުންވެ ގެއަށް ނުދާންވެގެން އެއަރޕޯޓްގައި ދިރިއުޅޭތާ 14 އަހަރު!

ފުރަން އެއަރޕޯޓަށް ގޮސް ފްލައިޓް ޑިލޭ ވެއްޖެ ނަމަ އެއީ ގިނަ ބަޔަކު ފޫހިވާ ކަމެކެވެ. އެތައް ވަގުތެއް ބޭކާރުވެގެން ދިޔުމުގެ ސަބަބުން ހިތްހަމަ ނުޖެހި އެ ވަގުތުތައް ފުރައިލާން އެއްބަޔަކު އިޚްތިޔާރުކުރާނީ ކެފޭއެކެވެ. އަނެއް ބަޔަކު ފޯނުން ގޭމެއް ކުޅެލުން ، ނޫނީ އެއްޗެއް އަޑު އަހައިލުން ފަދަ ކަމެކެވެ. އެއީ ޑިލޭވި ވަގުތުގެ ފޫހިކަން އިހްސާސްވިޔަ ނުދީ އެގަޑި ފުރައިލުމަށެވެ.

Ads by MWSC

ނަމަވެސް މިއީ މުޅީން ތަފާތު މީހެއްގެ ވާހަކައެކެވެ. ފުރަން ނޫނަސް މީނާ އެއަރޕޯޓްގައި އުޅޭތާ 14 އަހަރުވެއްޖެއެވެ. ޗައިނާގެ ބެއިޖިންއަށް އުފަން ވެއި ޖިއަންގުއޯ 2014ވަނަ އަހަރު ގެއިން ނިކުތީ އަންހެނުންނާ އަރައިރުންވެ އުފެދުނު ނުތަނަވަސްކަމުގައެވެ. ސިނގެރޭޓް ބުއިމާ ، ރާބުއިން ފަދަ ކަންކަން ދެވި ހިފައިފައި ހުރި ވެއިގެ މައްސަލައަކީ އެކަންކަން ހުއްޓުވާން އަންހެނުން އުޅުމެވެ. ގެއިން ނިކުތް ގޮތަށް ވެއި އިޚްތިޔާރުކުރީ އެއަރޕޯޓެވެ.

ބެއިޖިން ކެޕިޓަލް އިންޓަނޭޝަނަލް އެއަރޕޯޓަށް ވަތްގޮތަށް އެ ތަނުގެ ދެވަނަ ޓަރމިނަލްގައި އޭނާ ދިރިއުޅޭތާ މިހާރު 14 އަހަރުވީއެވެ. ގެއިން އެއަޕޯޓުން ދިޔައިރު ވެއި ގެންދިޔަ ރައިސްކުކަރެއް ބަހައްޓައި އޭނާ ވަނީ އެއަރޕޯޓްގައި ކުޑަކުޑަ މޯބައިލް ބަދިގެއެއް ހަދައިފައެވެ. ބައެއް ފަހަރު އެ ބަދިގެއިން ކައްކައި ކައިބޮއެ ހަދާއިރު އަނެއް ބައި ފަހަރު އޭނާ އިޚްތިޔާރުކުރަނީ ކެފޭ،ރެސްޓޯރެންޓްތަކެވެ. މަސައްކަތެއް ނުކުރާތީ ސަރުކާރުންދޭ އެލަވަންސްގެ ގޮތުގައި ވެއިއަށް މަހަކު 1000 ޔުއާން (2500އެއްހައި ދިވެހި ރުފިޔާ)ލިބެއެވެ. އޭނާގެ ދިރިއުޅުން ބިނާވެފައި އޮންނަނީ އެ އެލަވަންސްގެ މައްޗަށެވެ.

ވެއިގެ އެއަރޕޯޓްގެ ދިރިއުޅުން މީޑިއާގެ ސަމާލުކަމަށް އައިސް މީޑިއާ ވަނީ އޭނާއާ ސުވާލުކޮށްފައެވެ. އެގޮތުން އެނބުރި ގެއަށް ދާނަންތޯ އެހުމުން އޭނާ ބުނެފައި ވަނީ ގެއަށް ދެވެން ނެތް ކަމަށާއި އޭރުން އޭނާ ބޭނުންވާ އޭނާގެ އަމިއްލަ ދިރިއުޅުން ނޫޅެވޭނެ ކަމަށެވެ. އަދި ގެއަށް ގޮސްފިނަމަ އޭނާ ޖެހޭނީ ސިނގެރޭޓާއި ރަލާ ދުރުވެ އޭނާއަށް ލިބޭ ފައިސާ ގެއަށް ޚަރަދުކުރަން ކަމަށް އޭނާ ބުނެފައި ވެއެވެ.