ސްޓޭޓް މިނިސްޓަރ ޞާލިޙަށްކުރި ދައުވާ ސާބިތެއް ނުވި
ޓޫރިޒަމް މިނިސްޓްރީގެ ސްޓޭޓް މިނިސްޓަރު އަހުމަދު ޞާލިޙްގެ މައްޗަށް ދައުލަތުން ކުރި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ ސާބިތު ނުވާ ކަމަށް ކްރިމިނަލް ކޯޓުން މިއަދު ނިންމައިފިއެވެ.
ދައުލަތުންް ސްޓޭޓް މިނިސްޓަރ ޞާލިޙުގެ މައްޗަށް ކޮށްފައި ވަނީ އެމްއެމްޕީއާރްސީގެ ހިޔާނާތުގެ ދަށުން ދޫކުރި ރަށަކާއި ތިން ފަޅެއްގެ މައްސަލަ އެސެޓް ރިކަވަރީ ކޮމިޝަނުން ތަހުގީގު ކުރަމުން ދަނިކޮށް، އެ ރަށްތަކުގެ މައްސަލައެއް ތަހުގީގު ނުކުރާ ކަމުގެ ތުހުމަތެވެ.
އެގޮތުން ދައުލަތުން ބުނީ އެމްއެމްޕީއާރްސީ މެދުވެރިކޮށް ދޫކުރި ރަށްތަކާއި ފަޅުތަކުގެ މައްސަލަ ތަހުގީގުކުރަމުން ދާކަން އެސެޓް ރިކަވަރީ ކޮމިޝަނުން ޓޫރިޒަމް މިނިސްޓްރީއަށް އަންގައި އެ ތަންތަނުގެ ހެޑްލީސް ބަދަލުކުރުން ނުވަތަ ހިއްސާ ބަދަލުކުރުން މަޑުޖައްސައިލާން އެންގި ކަމަށެވެ.
އަދި އެހެން އަންގައިފައިވާކަން އެނގި ހުރެ، ތިން ފަޅަކާއި ރަށެއްގެ ތަހުގީގު ހިނގަމުން ނުދާ ކަމަށް ބުނެ ކުންފުނިތަކަކަށް ޞާލިޙް ސިޓީ ފޮނުއްވި ކަމަށް ވެސް ދައުލަތުން ބުނެފައިވެއެވެ.
މިމައްސަލައާ ގުޅިގެން މިއަދު ބޭއްވު އަޑުއެހުމުގައި ގާޒީ އަލީ އާދަމް ހުކުމް ކުރެއްވީ، ދައުލަތުން ކޮށްފައިވާ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ ޞާލިޙްގެ މައްޗަށް ސާބިތުވާން އެކަށީގެންވާ ، ޝައްކެއް ނެތް މިންވަރަށް ކުށް ސާބިތު ނުވާ ކަމަށެވެ.
