ރާޖަމޯލީ އާލިއާއަށް ދިނީ ލަނޑެއްތަ؟
ބެލުންތެރިންގެ މެދުގައި ބޮޑު މަގުބޫލުކަމެއް ހޯދަމުން އަންނަ މަލްޓި ލޭންގުއޭޖް ފިލްމު "އާރްއާރްއާރް" ސިނަމާގައި އަޅުވަން ފެށުމާ އެކު އެންމެ ބާރަށް ދެކެވުނު އެއް ވާހަކައަކީ ބަތަލާ އާލިއާ ބަޓްއަށް ފިލްމުން ދީފައިވާ ސްކްރީން ޓައިމް ކުޑަވުމުގެ ވާހަކައެވެ. ނުވަތަ އޭނާގެ ރޯލު ފިލްމުގައި ކުޑަކަމުގެ ވާހަކައެވެ. މީޑިއާތަކުގައި މި ވާހަކަ ތިލަކުރަމުން ދިޔަ ވަރަކަށް ތުންތުންމަތިން އެކި ވާހަކަތައް ފުރޮޅެމުން އައެވެ.
ކުޑަ ދުވަސްކޮޅެއް ކުރިން މީޑިއާތަކުން ރިޕޯޓުކުރި ގޮތުގައި ސްކްރީން ޓައިމް ކުޑަވުމުގެ ނުތަނަވަސްކަމާ އެކު އާލިއާ އޭނާގެ އިންސްޓަގްރާމުން، މަޝްހޫރު ޑައިރެކްޓަރު އެސް އެސް ރާޖަމޯލީ އަންފޮލޯ ކުރިއެވެ. އޭގެ ފަހުން ފިލްމު "އާރްއާރްއާރް"ގެ ޓްރެއިލާއާއި ޓީޒާ ވީޑިއޯތައް ވެސް އިންސްޓަގްރާމުން އާލިއާ ޑިލީޓްކޮށްލިއެވެ.
މީޑިއާތަކަށް ކުދިކުދި ކަންކަން ވެސް މިޒަމާނުގައި ސިއްރެއް ނުކުރެވޭނެއެވެ. އެހެންވެ މިވާހަކަތައް ދިޔައީ ހަބަރުތަކުގެ ފަލަ ސުރުހީތަކުން ޖާގަ ހޯދަމުންނެވެ. އެއްކޮޅުން ރާޖަމޯލީއަކީ ސައުތު އިންޑިއަން ސިނަމާގެ އެންމެ ކުޅަދާނަ އެއް ޑައިރެކްޓަރެވެ. އަނެއްކޮޅުން އާލިއާއަކީ ބޮލީވުޑްގެ އެންމެ ޑިމާންޑިންގް އެއް ބަތަލާއެވެ.
ކޮންމެއަކަސް މި ވާހަކަތަކަށް އެޑްރެސްކުރަން އާލިއާއަށް މަޖުބޫރުވެއްޖެއެވެ.
"އާރުއާރުއާރުގެ ޕޯސްޓަރުތަކާ ވީޑިއޯތައް އަހަރެންގެ އިންސްޓަގްރާމުން ޑިލީޓް ކުރީ ފިލްމުގެ ޓީމާ މެދު ހިތްހަމަ ނުޖެހިގެންކަމަށް ވާހަކަ ދެކެވޭތަން އެކި ވަސީލަތްތަކުން މި ދަނީ ފެންނަމުން" މައްސަލައަށް އެޑްރެސްކުރަން ފަށަމުން އާލިއާ ބުންޏެވެ.
އޭނާ ބުނި ގޮތުގައި އެކަން އެހައި ބޮޑުކަމަކަށް ހަދައިގެން މައުލޫމާތު އޮޅޭގޮތަށް ވާހަކަ ފެތުރުން ހުއްޓައިލަން ޖެހޭ ކަމަށެވެ. އަދި ބުނީ ވީޑިއޯ ނުވަތަ ފޮޓޯ އިންސްޓަގްރާމް ފީޑުން އަބަދުވެސް ހައިޑު ކުރާކަމަށާއި އެހެން އެކަން ކުރަނީ ޕްރޮމޯޝަނަށް އިންސްޓަގްރާމަށް ލާ ޕޯސްޓުތައް ގިނަވެ ބަލަން އުނދަގޫވާތީކަމަށެވެ.
އާރްއާރްއާރްގައި ސްކްރީން ޓައިމް ކުޑަވުމަކުން އާލިއާއަކަށް މައްސަލައެއް ނެތެވެ. އޭނާ ބުނީ ފިލްމުގައި ސީތާގެ ރޯލު ކުޅެން ފުރުސަތު ލިބުނީތީ އުފާކުރާ ކަމަށެވެ. އަދި ރާޖަމޯލީ ފަދަ ވަރުގަދަ ޑައިރެކްޓަރަކާ އެކު މަސައްކަތްކުރަން ފުރުސަތު ލިބުނީތީ ޝުކުރުވެރިވާ ކަމަށެވެ.
"މި ވާހަކައަށް އެޑްރެސްކުރަން ބޭނުންވީ ރާޖަމޯލީ ސަރއާއި މުޅި ޓީމުން ވަނީ މިފިލްމަށް ޓަކައި އެތައް އަހަރެއް ވަންދެން ވަރަށް ބުރަކޮށް މަސައްކަތްތަކެއް ކޮށްފައިވާކަން އެނގޭތީ" އާލިއާ ބުންޏެވެ.
މީގެ ކުރިން އިންޓަވިއުތަކުގައި ރާޖަމޯލީ ބުނެފައި ވަނީ އާލިއާ މިފިލްމުގައި ފެންނާނީ ކެމިއޯ ރޯލަކުން ކަމަށެވެ. އެހެންކަމުން ބޮލީވުޑް އޯޑިއެންސަށް މައުލޫމާތުގައި އޮޅުމެއް އަރައިފާނެތީ ޕްރޮމޯޝަންތަކުގައި ވެސް އާލިއާ ބޭނުންކުރަން ނުވިސްނާކަމަށް އޭނާ ބުންޏެވެ.
ރާޖަމޯލީއަކީ އިންޑިއަން ސިނަމާގައި މިހައިތަނަށް އުފެއްދި އެންމެ ކާމިޔާބު އެއް ފިލްމު "ބާހޫބަލީ"ގެ ޑައިރެކްޓަރެވެ. އެ ފިލްމުގެ ބޮޑު ކާމިޔާބީއާ އެކު "ބާހޫބަލީ 2" އުފެއްދީ ހިންދީ ބަހުންނާ ވެސް އެކީއެވެ. އެއާ އެކު ފުރަތަމަ ފިލްމަށް ވުރެ ދެވަނަ ފިލްމުގެ މަގްބޫލުކަން އިތުރުވިއެވެ.
މިހާރު ސިނަމާގައި އަޅުވަމުންދާ "އާރްއާރްއާރް" އުފެއްދީ ފަސް ބަހުރުވައަކުންނެވެ. އޭގެ ތެރޭގައި ހިންދީ ވެސް ހިމެނެއެވެ. އިންޑިއާ ސިނަމާގައި މި ފިލްމަށް ބޮޑު ތަރުހީބެއް ލިބެމުން ދާއިރު ބޮލީވުޑްގެ ޕްރޮޑިއުސަރުން ދަނީ ރާޖަމޯލީއާ އެކު މަސައްކަތްކުރަން ހުށަހެޅުންތައް ފޮނުވަމުންނެވެ. ރިޕޯޓުތައް ބުނާގޮތުން ޕްރޮޑިއުސަރު ކަރަން ޖޯހަރު ވެސް ވަނީ ރާޖަމޯލީއާ އެކު މަސައްކަތްކުރުމުގެ ޝައުގު ފާޅުކޮށްފައެވެ، އަނެއްކޮޅުން އެކްޓަރު ސަލްމާން ހާން ވެސް ދަނީ އޭނާގެ ފިލްމެއް ޑައިރެކްޓު ކުރުމަށް ރާޖަމޯލީއަށް ހުށަހެޅުމެއް ހުށަހަޅައިފައިކަމަށް ރިޕޯޓުތައް ބުނެއެވެ.
Ads by STO
