ރަންބީރްއާއި އާލިއާގެ ކައިވެނި މިމަހު، ދައުވަތު ދެނީ 450 މީހުންނަށް
ބޮލީވުޑްގެ މަޝްހޫރު ޖޯޑު ރަންބީރް ކަޕޫރާއި އާލިއާ ބަޓްގެ ކައިވެނީގެ ވާހަކަ އެކި ގޮތްގޮތަށް ދެކެވޭތާ ދެ އަހަރެއްހައި ދުވަސް ވެއްޖެއެވެ. ކޮވިޑް-19 ގެ ސަބަބުން ކައިވެނި ލަސްކުރަން ޖެހުނު ގޮތަށް އަދި އަދަށް ވެސް ކައިވެނި ނުކުރެވި އޮތީއެވެ.
މިހިނގާ 2022ވަނަ އަހަރު ފެށުނުއިރު އަނެއްކާ ވެސް ދެތަރިންގެ ކައިވެނީގެ ވާހަކަ ފަތު އަޑު ކިޔެއެވެ. އެއާ އެކު މިއަހަރުގެ ކުރީކޮޅު ކައިވެނި ކުރާނެކަމަށް މީޑިއާތަކުން ވެސް ރިޕޯޓުކުރަން ފެށިއެވެ.
ބޮލީވުޑް ހަބަރުތައް ގެނެސްދޭ ނޫސްތަކުގައި ބުނެފައިވާ ގޮތުން މި ދެތަރިން މިމަހު ކައިވެނި ކުރާނެއެވެ. ހީކުރި ގޮތާ ޚިލާފަށް ކައިވެނީގެ ބޮޑު ހަފްލާއެއް ނުބާއްވާނެއެވެ. ޕާޓީ ބާއްވަން ހަމަޖެހިފައިވަނީ ގާތްގަނޑަކަށް 450 މީހުންނަށް ދައުވަތު ދީގެންނެވެ. އެއީ އާއިލާއާއި ގާތް ރަހުމަތްތެރިން އެކަންޏެވެ.
މީގެ ކުރިން ބައެއް ރިޕޯޓުތައް ބުނި ގޮތުގައި ރަންބީރާއި އާލިއާގެ ކައިވެނީގެ ހަފްލާ އޮންނާނީ އިންޑިއާއިން ބޭރުގައެވެ. އެހެން ނަމަވެސް މިހާރު ރިޕޯޓުތައް ބުނަނީ ދެތަރިން ކައިވެނި ކުރަނީ ކަޕޫރު އާއިލާގެ ހާއްސަ ގޭގައި ކަމަށެވެ.
"އާރު ކޭ" ހައުސްގެ ނަމުން ނަން ދީފައިވާ މިގެއަކީ ރާޖް ކަޕޫރަށް ނަން ހާއްސަ ގެއެކެވެ. ރާޖް ކަޕޫރަކީ ރަންބީރުގެ ކާފައެވެ. ބެލެވޭ ގޮތުގައި ރާޖްގެ ގޭގައި ދެތަރިން ކައިވެނިކުރަން ނިންމީ ރަންބީރާއި އޭނަގެ މާމަ ކްރިޝްނަ ރާޖް ކަޕޫރާއި އޮތް ގާތް ގުޅުމުގެ ސަބަބުންނެވެ. ރަންބީރުގެ ބައްޕަ ރިޝީ ކަޕޫރާއި މަންމަ ނީތީ ކަޕޫރުގެ ކައިވެނީގެ ހަފްލާ ވެސް ބޭއްވީ އެގޭގައެވެ.
ރަންބީރާއި އާލިއާގެ ކައިވެނި ޕްލޭން ކުރަނީ ޝާދީ ސްކޮޑް ވެޑިންގ ޕްލޭނާޒް ކިޔާ ބައެކެވެ. ކައިވެނީގެ ހަފްލާއަށް ދައުވަތުދޭ މީހުންނަން ތާރީހު އަންގައިފައިވާކަމަށް މައުލޫމާތު ލިބޭއިރު އެއްވެސް މީޑިއާއަކަށް އެތާރީހު އަދި ތިލައެއް ނުވެއެވެ.
އިންޑިއާގައި ބާއްވާ ކައިވެނީގެ ބޮޑެތި ހަފްލާތަކަށް އާންމުކޮށް 700 އެއްހައި މީހުންނަށް މަދުވެގެން ދައުވަތު ދެއެވެ. ރަންބީރާއި އާލިއާގެ ކައިވެނީގެ ހަފްލާއަށް މަދު އަދަދެއްގެ މީހުންނަށް ދައުވަތު ދޭއިރު ފިލްމު އިންޑަސްޓްރީން މިހަފްލާގައި ބައިވެރިވާނީ ކޮންކޮން ބައެއްކަމާ މެދު މިހާރު ވަނީ ސުވާލު އުފެދިފައެވެ.
އާލިއާ، ރަންބީރަށް ވުރެ އުމުރުގެ ގޮތުން 10 އަހަރު ހަގެވެ. މިދެތަރިންނަކީ ވެސް ބޮލީވުޑް އާއިލާއަކަށް ނިސްބަތްވާ ދެތަރިންނެވެ. މަޝްހޫރު ޕްރޮޑިއުސަރު އަދި ޑައިރެކްޓަރު މަހޭޝް ބަޓްއަކީ އާލިއާގެ ބައްޕައެވެ. އަނެއްކޮޅުން ރަންބީރަކީ ބޮލީވުޑްގެ ޝާހީ އާއިލާއަށް ނިސްބަތްވާ މެމްބަރެކެވެ.
