ޕުޝްޕާ ބަލައިފައި އާލިއާއަށް އިތުރު ހިތްވަރެއް ލިބުނު
ދާދި ފަހުން ސިނަމާތަކުގައި އެޅުވި ސަންޖޭ ލީލާ ބަންސާލީގެ "ގަންގޫބާއީ ކަތިއަވަޅީ"ގައި ބަތަލާ އާލިއާ ބަޓް ދައްކުވައިދީފައިވާ އެކްޓިންއަށް ބެލުންތެރިންގެ ޝައުގު ވަނީ ހުއްޓިފައެވެ. އެފިލްމުގައި މާފިއާ ބޮސް "ގަންގޫ"ގެ ރޯލު އަދާކޮށްފައިވާ ފުރިހަމަކަމުން އިންޑިއާގެ މަޝްހޫރު ކްރިޓީކްސްއިން ވެސް ދަނީ އެ ވާހަކަތައް ބްލޮގުތަކުގައި ޝާއިއު ކުރަމުންނެވެ.
ފިލްމުގައި އާލިއާގެ ހަރަކާތްތައް އެހާ ފުރިހަމައެވެ. ޑައިލޮގުތައް ގެނަސްދީފައިވާ ގޮތް އަސްލު ކެރެކްޓާއާއި ވައްތަރެވެ. މިހެން ގޮސް ހިނގުމަށް ވެސް އާލިއާ ވަނީ ބަދަލުތަކެއް ގެނަސްފައެވެ. އޭނާގެ ހިނގުން އަމިއްލައަށް ސިފަކުރަމުން ބުނީ އަސްދޫންޏެއްގެ ހިނގުމާ އެއްގޮތްވާނެ ކަމަށެވެ.
އާލިއާ ބުނި ގޮތުގައި މިދިޔަ އަހަރު ސިނަމާގައި އެޅުވި އެންމެ ކާމިޔާބު ފިލްމު "ޕުޝްޕާ" ބަލައިފައި ބޮޑު ހިތްވަރެއް ލިބުނުކަމަށެވެ. އޭނާ ބުނީ އެފިލްމުގައި އައްލޫ އަރުޖުން ގެންގުޅެފައިވާ ހަކަތަ ގަންގޫބާއީގެ ރޯލުން ވެސް ދައްކުވައިދޭން މަސައްކަތްކުރި ކަމަށެވެ.
"ޕަޕަރާޒީން ސިއްރުން ނަގައިފައިވާ ވީޑިއޯތައް ބަލައިފައި އަހަންނަށް ހީވި އަހަރެން ހިނގަނީ އަސްދޫންޏެއްހެންނޭ. އެހެންވެ އެއަށް ވުރެ ޝައުގުވެރިކުރުވަން އަހަރެން ބޭނުންވި. ޕުޝްޕާ ބަލައިފައި އައްލޫ އަރުޖުންގެ ހަރަކާތްތައް އަހަންނަށް ވަރަށް ކަމުދިޔަ" އާލިއާ ކިޔައިދިނެވެ.
އާލިއާ ބުނީ ކެރެކްޓާއެއްގައި ގެންގުޅޭ ކޮންމެ ހަރަކާތަކީ ވެސް ބެލުންތެރިންނަށް އޭގެ އިހުސާސް ކުރެވެންޖެހޭނެ ހަރަކާތަކަށް ވާން ޖެހޭނެ ކަމަށެވެ. އަދި އެއީ ހުނަރެއްކަން އެހެން މީހުންނަށް ފާހަގަކުރެވެން ޖެހޭނެކަމަށް އާލިއާ ބުންޏެވެ.
ގަންގޫބާއީ ކަތިއަވަޅީއަށް ފަހު އާލިއާ ފިލްމު ކުޅެދޭ އަގު ވެސް ވަނީ އުފުލައިފައެވެ. އަދި އޭނާއަކީ މިހާރު ބޮލީވުޑްގައި ހުރި އެންމެ ގިނަ ހިޓްސް ދިން އެއް ބަތަލާގެ ގޮތުގައި ވެސް ވަނީ ވެފައެވެ.
ގަންގޫބާއިއަކީ ކޮވިޑަށް ފަހު ބޮލީވުޑްގައި ރިލީޒްކުރި އެންމެ ކާމިޔާބު އެއް ފިލްމެވެ. އެ ފިލްމުން ޖުމްލަ 186 ކްރޯރް ރުޕީސް ވަނީ ބޮކްސް އޮފީހުގައި ހޯދައިފައެވެ.
އާލިއާ ދެން އެންމެ އަވަހަށް ސްކްރީނުން ފެންނާނީ ދަރްމާ ޕްރޮޑަކްޝަނުން އުފައްދައި އަޔާން މުކަރްޖީ ޑައިރެކްޓު ކުރާ ޓްރިއޮލޮޖީ "ބްރައްމާސްތުރަ" އިންނެވެ. މިއީ ލޯބިވެރިޔާ ރަންބީރް ކަޕޫރާ އެކު އާލިއާ ފެންނާނެ ފުރަތަމަ ފިލްމު ވެސް މެއެވެ.
މީގެ އިތުރުން ކަރަން ޖޯހަރު ޑައިރެކްޓުކުރާ "ރޮކީ އޯރް ރާނީ ކި ޕްރޭމް ކަހާނީ" ގެ ޝޫޓިންތައް ވެސް ދަނީ ކުރިއަށެވެ. މިފިލްމުގައި އާލިއާ ފެންނާނީ ރަންވީރް ސިންގްއާ އެކުއެވެ. ޒޯޔާ އަކްތަރުގެ "ޖީލޭ ޒަރާ"ގައި ވެސް އާލިއާ އުޅެއެވެ. އެފިލްމުގައި އާލިއާގެ އިތުރުން ބަތަލާ ކެޓްރީނާ ކެއިިފްއާއި ޕްރިޔަންކާ ޗޯޕްރާ ވެސް ފެންނާނެއެވެ.
Ads by STO
