50،000 ރުފިޔާއަށް ވުރެ މަތީ އަދަދުތަކަށް ޗެކުން ފައިސާ ނުނެގޭ ގޮތް ހަދަނީ!

ބެންކުތަކުން ޗެކް ބޭނުންކުރާ އަދަދު މަދުކުރުމަށް ޓަކައި ޗެކުން ފައިސާ ނެގޭ އެންމެ މަތީ އަގެއް ކަނޑައަޅަން މަރުކަޒީ ބޭންކް (އެމްއެމްއޭ)އިން ނިންމައިފިއެވެ.

Ads by Sosun Fihaara

އެގޮތުން ޗެކް ބޭނުން ކުރުން މަދު ކުރުމާ ގުޅޭ އެކްޝަން ޕްލޭން އިއުލާނު ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްއެމްއޭގެ އެސިސްޓެންޓް އެގްޒެކެޓިވް ޑައިރެކްޓަރ ހައްވާ ލަތީފު ވިދާޅުވީ، ޗެކް ބޭނުންކުރުން މަދުކުރުމަށް 2024ވަނަ އަހަރާ ހަމައަށް ފިޔަވަޅުތަކެއް އެޅުމަށް މަރުކަޒީ ބޭންކުން ނިންމައިފައިވާ ކަމަށެވެ.

އެގޮތުން ޗެކުން ފައިސާ ނެގޭ އެންމެ މަތީ މިންވަރު 50،000 ރުފިޔާއަށް އަދި ޑޮލަރުން ނަމަ 3،000 ޑޮލަރަށް ލިމިޓު ކުރުމަށް ކަނޑައަޅައިފައިވާ ކަމަށް ވެސް ހައްވާ ލަތީފު ވިދާޅުވިއެވެ. މީގެ އިތުރުން ޗެކުން ފައިސާ ނަގާ ނަމަ އިތުރު ފީއެއް ވެސް ނެގުމަށް ވަނީ ކަނޑައަޅައިފައެވެ.

އެމްއެމްއޭގެ އެސިސްޓެންޓް އެގްޒެކެޓިވް ޑައިރެކްޓާ ހައްވާ ލަތީފު/ ފޮޓޯ: އެމްއެމްއޭ

އެމްއެމްއޭއިން މިއަދު ބުނީ، ދިވެހިރާއްޖޭގައި ޗެކް ބޭނުންކުރާ މިންވަރު މަދުކުރުމާ ބެހޭ އެކްޝަން ޕްލޭން
ދިވެހިރާއްޖޭގައި ޕޭމަންޓްގެ ޚިދުމަތް އަވަސް އަދި ލުއިފަސޭހަ ގޮތެއްގައި ކުރެވޭނެ އިންތިޒާމްތައް ހަމަޖެއްސުމުގެ ގޮތުން، ނަގުދު ފައިސާއާއި ޗެކު ބޭނުންކުރުން މަދުކޮށް ޑިޖިޓަލް ޕޭމަންޓް ޚިދުމަތްތައް ބޭނުންކުރާ މިންވަރު އިތުރުކުރުމަކީ އެ އޮތޯރިޓީއިން ވަރަށް ބޮޑު އަހައްމިއްޔަތުކަމެއް ދީގެން ކުރަމުންދާ މަސައްކަތެއް ކަމަށެވެ.

"ދެ އަހަރުގެ މުއްދަތަކަށް އެކުލަވައިލެވިފައިވާ މި އެކްޝަން ޕްލޭން ތަންފީޛު ކުރުމުގެ އަމަލީ މަސައްކަތް، ބޭންކުތަކާ ގުޅިގެން މި އަހަރުގެ ޖޫން މަހު ފެށުމަށް މި އޮތޯރިޓީން ވަނީ ނިންމައިފައި.
މި އެކްޝަން ޕްލޭންގެ މަޤުޞަދުތައް ހާސިލްކުރުމަށް ޓަކައި އެޅިދާނެ ފިޔަވަޅުތައް ދެނެގަތުމަށް ޓަކައި ބޭންކުތަކާ އެކު ވަނީ މަޝްވަރާތަކެއް ކުރެވިފައި." މަރުކަޒީ ބޭންކުން ބުނެފައިވެއެވެ.

އެމްއެމްއޭއިން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން/ ފޮޓޯ: އެމްއެމްއޭ

އެގޮތުން ކުރެވުނު މަޝްވަރާތަކުގެ އަލީގައި އެކުލަވާލެވުނު މި އެކްޝަން ޕްލޭންގެ ދަށުން އެކި މަރުހަލާތަކަށް ބަހައިލެވިގެން އަންނަނިވި ފިޔަވަޅުތައް އެޅުމަށްވަނީ ނިންމައިފައެވެ.
1- 2023ވަނަ އަހަރުގެ ދެވަނަ ކުއާޓަރއިން ފެށިގެން ދިވެހިރާއްޖޭގައި ޗެކު ބޭނުންކޮށްގެން މުޢާމަލާތްކުރެވޭނެ އެންމެ މަތީ ޢަދަދަކީ ދިވެހި ރުފިޔާއިން ނަމަ 50،000، އަދި ޔޫއެސް ޑޮލަރުން ނަމަ 3،000 ކަމުގައި ކަނޑައެޅުން.

2- އެމްއެމްއޭއިން މިހާރު ދެމުންދާ ޗެކް ކްލިއަރިންގގެ ޚިދުމަތްދޭ ދުވަސްތައް، ދެ މަރުހަލާއަކަށް ބަހާލެވިގެން މަދުކުރުން.
• 2023ވަނަ އަހަރު ގެ ދެވަނަ ކުއާޓަރއިން ފެށިގެން ހަފްތާއަކު 2 ދުވަސް.
• 2024ވަނަ އަހަރުގެ ފުރަތަމަ ކުއާޓަރއިން ފެށިގެން ހަފްތާއަކު 1 ދުވަސް.

3- އޮޓޮމޭޓަޑް ކްލިއަރިންގ ހައުސް (އޭސީއެޗް) މެދުވެރިކޮށް، ދިވެހި ރުފިޔާއިން ޕްރޮސެސް ކުރަމުން އަންނަ ހުރިހާ އިންޓަބޭންކް އެކައުންޓް ޓްރާންސްފަރ މުޢާމަލާތްތައް، 2023ވަނަ އަހަރުގެ 3ވަނަ ކުއާޓަރއިން ފެށިގެން، އަލަށް ޤާއިމުކުރެވޭ އިންސްޓަންޓް ޕޭމަންޓް ސިސްޓަމް މެދުވެރިކޮށް ކުރުން. މީގެ ސަބަބުން ބޭންކްތަކުގެ މެދުގައި ހަދާ ޓްރާންސެކްޝަންތަކުގެ ފައިސާ ވަގުތުން ވަގުތަށް އެކައުންޓަށް ޖަމާވެގެންދާނެއެވެ.

4- ޕޭމަންޓް ހެދުމަށް ޗެކު ބޭނުންކުރާ މިންވަރު މަދުކޮށް ޑިޖިޓަލް ވަޞީލަތްތައް ބޭނުންކުރުމަށް ބާރު އެޅުމުގެ ގޮތުން 2023ވަނަ އަހަރުގެ ފަހު ކުއާޓަރއިން ފެށިގެން ޗެކު ޕްރޮސެސްކުރުމަށް ފީ ތަޢާރަފްކުރުން.
މީގެ އިތުރުން ވެސް، ބޭންކުތަކުން އެފަރާތުގެ ކަސްޓަމަރުންނަށް (ވަކިވަކި ފަރުދުންނާއި ވިޔަފާރިތައް ހިމެނޭގޮތުން) ފޯރުކޮށްދޭ ޚިދުމަތްތައް ޑިޖިޓަލް ވަޞީލަތްތައް މެދުވެރިކޮށް ފަސޭހަކަމާ އެކު ބޭނުން ކުރެވޭނެ އިންތިޒާމްތައް ހަމަޖެއްސުމަށާއި ޑިޖިޓަލް ވަޞީލަތްތައް ބޭނުންކުރުމަށް އެފަރާތުގެ ކަސްޓަމަރުން އަހުލުވެރި ކުރުވާ ހޭލުންތެރި ކުރުވުމަށް ވެސް ބޭންކު ތަކަށް ވަނީ އަންގައިފައެވެ.

ބޭންކުތަކާ ގުޅިގެން މި އެކްޝަން ޕްލޭން މިދިޔަ އަހަރު އެކުލަވައިލެވިފައިވާ އިރު، 2020ވަނަ އަހަރު ހަމަ މި މަޤުޞަދުގައި ސަރުކާރުގެ އިދާރާތަކާއި، ސަރުކާރު ހިއްސާވާ ކުންފުނިތަކާއި ބޭންކުތަކުން ޗެކު ބޭނުންކުރާ މިންވަރު މަދު ކުރުމަށް އެޅުނު ތަފާތު ފިޔަވަޅުތަކުގެ ސަބަބުން ވެސް، އެދެވޭ ނަތީޖާތަކެއް ނެރެވިފައިވާކަން އެމްއެމްއޭއިން ފާހަގަ ކޮށްފައިވެއެވެ.

މި އެކްޝަން ޕްލޭންގެ ދަށުން ކުރުމަށް ރާވައިފައިވާ، މަތީގައި ބަޔާންކޮށްފައިވާ ކަންކަން ތަންފީޛު ކުރުމުގެ ގޮތުން އެޅުމަށް ހަމަޖެހިފައިވާ ފިޔަވަޅުތައް، އެމްއެމްއޭއާއި ބޭންކުތައް މެދުވެރިކޮށް ރައްޔިތުންނަށް އާންމުކުރަމުން ގެންދާނެ ކަމަށް އެ އޮތޯރިޓީން ބުނެފައިވެއެވެ.