ރަންބީރާއި އާލިއާއަށް ފަހު ދެން އޮތީ ކަރިޝްމާގެ ކައިވެނިތަ؟
އާލިއާ ބަޓްއާއި ރަންބީރް ކަޕޫރުގެ ކައިވެނީގެ ހަފްލާގެ ވާހަކަ މުޅި އިންޓަނެޓުގައެވެ. ތާރީހު ސިއްރުކޮށް ހަފްލާއަށް މަދު މީހަކަށް ދައުވަތުދިން މި ކައިވެންޏަކީ އަހަރުގެ އެންމެ ހާއްސަ އެއް އިވެންޓު ވެސްމެއެވެ. ކަރީނާ ކަޕޫރު ހާން، ކަރިޝްމާ ކަޕޫރު، ސައިފް އަލީ ހާން، ކަރަން ޖޯހަރް، އަޔާން މުކަރްޖީގެ އިތުރުން އަކާންޝާ ރާންޖަން ފަދަ މަޝްހޫރު ފަންނާނުން މިހަފްލާގައި ބައިވެރިވިއެވެ.
މިތަރިން މިހާރު ގެންދަނީ ކައިވެނީގެ ހަފްލާގައި ނެގި ފޮޓޯތައް ސޯޝަލް މީޑިއާގައި އާންމު ކުރަމުންނެވެ. ބައެއް ފޮޓޯތަކުން އެތައް ވާހަކައެއް ބުނެދެއެވެ. އަނެއްބައި ފޮޓޯތަކުގައި ރަންބީރާއި އާލިއާގެ ލޯބި ފެނެއެވެ.
އިއްޔެ ކަރިޝްމާ ވަނީ ވަރަށް ހާއްސަ ފޮޓޯއެއް އާންމުކޮށްފައެވެ. އެފޮޓޯގައި ފެންނަނީ ކައިވެނި ކުރާއިރު އާލިއާގެ އަތުގައި އަޅުވައިފައި އޮންނަ ކަލީރާ ކަރިޝްމާގެ އަތަށް ވެއްޓޭ މަންޒަރުގެ ފޮޓޯއެކެވެ. ދެވަނަ ފޮޓޯގައި އެ ކަލީރާ ކަރިޝްމާގެ އަތުގައި އޮންނަ ތަން ފެނެއެވެ. ކަލީރާ ވެއްޓޭ މީހާއަކީ ދެން އެންމެ އަވަހަށް ކައިވެނި ކުރާނެ މީހަކަމަށް ގަބޫލުކުރުމަކީ އިންޑިއާގެ ސަގާފަތުގެ ތެރެއިން ކޮށްއުޅޭ ކަމެކެވެ.
ފޮޓޯ އާންމު ކުރަމުން ކަރިޝްމާ ލިޔެފައި ވަނީ ކަލީރާ ވެއްޓުނީ އޭނާގެ އަތަށް ކަމަށާއި އެކަމާ ހުރީ ވަރަށް އުފަލުން ކަމަށެވެ.
ކަރިޝްމާގެ އަތަށް ކަލީރާ ވެއްޓުނު ފޮޓޯ އާންމުކޮށް އެކަމާ އުފަލުން ހުރިކަން އޭނާ ހާމަކުރުމުން މިކަމުގެ ހާއްސަކަން އެބަ އިތުރުވެއެވެ. ކަރިޝްމާ ހުރީ ސިންގަލްކޮށްކަން އެންމެންނަށް ވެސް އެނގެއެވެ. އެހެންކަމުން މިއީ ކަރިޝްމާ އޭނާގެ ކައިވެނީގެ ވާހަކަ އެންގުމަށް ދިން މެސެޖެއްގެ ގޮތުގައި ބެލެވިދާނެއެވެ.
ކަރިޝްމާ 2003ވަނަ އަހަރު ކައިވެންޏެއް ކުރިއެވެ. އޭރު ކައިވެނި ކުރީ އިންޑިއާގެ ވިޔަފާރިވެރިއެއްކަމަށްވާ ސަންޖޭ ކަޕޫރާއެވެ. އެކައިވެންޏަށް ދެކުދިން ވެސް ތިބެއެވެ. އެއީ ސަމައިރާ ކަޕޫރާއި ކިއާން ރާޖް ކަޕޫރެވެ. މިކައިވެނި ނިމުމަކަށް ގެނައީ 2016ވަނަ އަހަރެވެ.
ކަރިޝްމާއާއި ސަންޖޭގެ ކައިވެންޏަކީ ބޮލީވުޑްގައި އެންމެ ހުތުރުކޮށް ނިމުނު އެއް ކައިވެންޏެވެ. ގިނަ ދުވަސްތަކެއްވަންދެން ކޯޓުގައި މައްސަލަ ކުރިއަށް ގެންދިޔައިރު ދެމީހުން ވެސް އެކަކު އަނެކަކުގެ ވާހަކަތައް ދެއްކިއެވެ. މީޑިއާތަކުން މިވާހަކަތައް ގެނަސްދިނުން ވެގެން ދިޔައީ ބޮޑު ކޮންޓްރޮވާސީއަކަށެވެ.
އެ ކައިވެނި ރޫޅުމަށް ފަހު ކަރިޝްމާގެ އަމިއްލަ ދިރިއުޅުމުގެ ވާހަކަތައް މުޅިންހެން ސިއްރު ކުރިއެވެ. ވިޔަފާރިވެރިޔާ ސަންދީޕް ތޯޝްނިވާލްއާއި ކަރިޝްމާ ޑޭޓް ކުރާކަމުގެ ވާހަކަތަކެއް ދޭތެރެއަކުން ފެތުރުނު ނަމަވެސް އޭގެ މާބޮޑު ތަފްސީލެއް އެއްވެސް ފަރާތަކުން ހާމައެއް ނުކުރެއެވެ.
