އައިއެސްގެ އިސް މީހެއް ކަމަށް ބުނާ ހޫދު ޝަރީއަތް ނިމެންދެން ބަންދަށް

އޭނާގެ ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ގެންދިއުމުން އެ މަޖިލީހުގައި ހޫދު ބުނެފައި ވަނީ އޭނާއަކީ މަޢުލޫމާތު އެއްކުރާހިތްވާ މީހަކަށް ވާތީ ފޯނުގައި ބައެއްކަހަލަ މަޢުލޫމާތު ހުރެދާނެ ކަމަށާއި ނަމަވެސް އޭނާއަކީ ހާޑް ޑިސްކާއި ފްލޮޕީ ޑިސްކުގައި މަޢުލޫމާތު ރައްކާކޮށްގެން ގެންގުޅޭ މީހެއް ނޫން ކަމަށެވެ.

ނަމަވެސް ދައުލަތުން ހުށަހަޅާފައިވާ ހެކިތަކަށް ބަލާއިރު، ތުހުމަތުކުރެވޭ އެކަށީގެންވާ ސަބަބުތައް ހުރުމުން ޤާޟީ ދީބާނާޒް ފަހުމީ ވަނީ ޝަރީއަތް ނިމެންދެން ހޫދު ބަންދުގައި ބަހައްޓަން އަމުރުކޮށްފައެވެ.

ހޫދު ހައްޔަރުކޮށްފައި ވަނީ ފުލުހުންނާއި، އެމެރިކާގެ އެފްބީއައި އަދި ޔޫރަޕިއަން ޔޫނިއަންގެ ދެ ޤައުމެއްގެ ކަމާ ގުޅުން ހުރި އިދާރާތައް ގުޅިގެން ހިންގި އޮޕަރޭޝަނެއްގައެވެ.

ޕީޖީ އޮފީހުން ހޫދަށް ކޮށްފައިވާ ދަޢުވާތަކުގެ ތެރޭގައި އިންޓަރނެޓް މެދުވެރިކޮށް ޓެރަރިޒަމްގެ ޢަމަލެއް ކުރުމަށް ހިތްވަރުދިނުމުގެ ކުށުގެ ދަޢުވާ ހިމެނެއެވެ. މީގެ އިތުރުން އިންޓަރނެޓް މެދުވެރިކޮށް ޓެރަރިސްޓް ޖަމާޢަތެއްގެ ލިޔެކިއުންތައް ފެތުރުމުގެ ކުށުގެ ދައުވާއާއި ޓެރަރިސްޓް ޖަމާޢަތެއްގެ މެންބަރަކަށްވުމުގެ ކުށުގެ ދައުވާގެ އިތުރުން ޓެރަރިސްޓް ޖަމާޢަތަކަށް ތާއީދު ކުރުމުގެ ކުށުގެ ދައުވާ ވެސް އުފުލައިފައި ވެއެވެ.

ހޫދު މުޙައްމަދު ޒާހިރުގެ މައްޗަށް 5 ދަޢުވާއެއް ކޮށްފައިވާއިރު މި ދަޢުވާތައް ސާބިތުވެއްޖެ ނަމަ އޭނާއަށް 53 އަހަރުގެ ޖަލު ޙުކުމެއް އައުން އެކަށީގެންވެއެވެ.