ސިނގިރޭޓަށް ކުރާ ހޭދަ ކުޑަ ކުރުމުން ފަހުން ލިބޭ ހިތްހަމަޖެހުން މާބޮޑުވާނެ: މަހްލޫފް
ސިނގިރޭޓަށް ކުރާ ހޭދަ ކުޑަ ކުރުމުން ފަހުން ލިބޭ ހިތްހަމަޖެހުން މާބޮޑުވާނެ ކަމަށް ޔޫތް މިނިސްޓަރު އަހުމަދު މަހްލޫފް ވިދާޅުވެއްޖެއެވެ.
މަހްލޫފް މިހެން ވިދާޅުވީ ސިނގިރޭޓުން ނަގާ ޑިއުޓީ ބޮޑުކުރަން ގެނައި އިސްލާހަށް އަމަލުކުރަން ފެށުމާއެކު އިއްޔެއިން ފެށިގެން ފިހާރަތަކުން ވިއްކާ ސިނގިރޭޓުގެ އަގު ބޮޑުވުމާ ގުޅިގެން ޒުވާނުން މީސް މީޑިއާގައި ހިތްހަމަނުޖެހުން ފާޅުކުރަމުން ދިއުމާ ގުޅިގެންނެވެ.
އެގޮތުން މަހްލޫފް ކުރެއްވި ޓްވީޓެއްގައި ވިދާޅުވީ ސިނގިރޭޓަށް ކުރަންޖެހޭ ހޭދަ މިއަދު ބޮޑުވެގެން ހިތްހަމަ ނުޖެހިދާނެ ކަމަށެވެ. ނަމަވެސް މާދަމާ ތިމާ ދުންފަރާއި ދުރުހެލެވި ސިނގިރޭޓަށް ކުރާ ހަރަދު ކުރާ އެތައް ހާސް ރުފިޔާ ސަލާމަތް ކުރެވި އަދި ދުޅަހެޔޮ ސިއްހަތެއްގައި ހުރުމަށް މަގުފަހިވުމުން ލިބޭ ހިތްހަމަޖެހުން ބޮޑުވާނެ ކަމަށް މަހުލޫފް ވިދާޅުވިއެވެ.
ސިނގިރޭޓުން ނަގާ ޑިއުޓީ ބޮޑު ކުރުމާއެކު އެންމެ އަގުހެޔޮ ވައްތަރުގެ ސިނގިރޭޓު ފޮއްޓެއް ވެސް ދެން ލިބޭނީ 85 ރުފިޔާއަށެވެ. އާއްމު ގޮތެއްގައި ދިވެހިން ދުންފަތުގެ އިސްތިއުމާލު ކުރުމަށް ބޭނުންކުރާ ވައްތަރުގެ ސިނގިރޭޓު ފޮއްޓެއް ލިބޭނީ މިއަދުން ފެށިގެން 95 ރުފިޔާއަށެވެ. ބައެއް ވައްތަރުގެ ސިނގިރޭޓު ފޮއްޓެއްގެ އަގު އުޅެނީ 100 ރުފިޔާއަށެވެ.
