އެޗްޕީއޭގެ ކޯލް ސެންޓަރުގެ ޚިދުމަތް ދެން ލިބޭނީ ރަސްމީ ގަޑިތަކުގައި

ކޮވިޑް-19އާ ގުޅިގެން ހެލްތު ޕްރޮޓެކްޝަން އެޖެންސީ، އެޗްޕީއޭއިން ޤާއިމުކުރި ކޯލް ސެންޓަރ 1676ގެ ޚިދުމަތް ދެން ލިބޭނީ ރަސްމީގަޑިތަކުގައި އެކަނިކަމަށް އެ އެޖެންސީން ވިދާޅުވެއްޖެއެވެ.

އެޗްޕީއޭއިން ވިދާޅުވީ އެ ސެންޓަރުގެ ޚިދުމަތް މިމަހުގެ 24 ވަނަ ދުވަހުން ފެށިގެން ލިބޭނީ ރަސްމީ ގަޑިތަކުގައި އެކަނި ކަމަށެވެ.

އެޗްޕީއޭއިން ވިދާޅުވީ މި ބަދަލާ އެކު ކޯވިޑް-19އަށް ފައްސިވާ މީހުން ކޯލް ސެންޓަރަށް ގުޅައިގެން ހަމަޖައްސައިދެމުން ގެންދިޔަ ޑޮކްޓަރުންގެ އޮންލައިން ކޮންސަލްޓޭޝަން ދިނުން ހުއްޓައިލެވޭނެ ކަމަށެވެ.

ރާއްޖޭގައި ކޮވިޑް-19އަށް ފައްސިވާ މީހުންގެ އަދަދު މިހާރު ދަނީ ދުވަހެއް ދުވަހަކަށް މަދުވަމުންނެވެ. މިއާ އެކު ރާއްޖޭގައި އިޢުލާންކޮށްފައިވާ އާއްމު ޞިއްޙަތުގެ ކުއްލި ނުރައްކަލުގެ ޙާލަތު ނިމުމަކަށް ގެނެސް، ކޮވިޑުން ރައްކާތެރިވުމަށް އަޅައިފައިވާ ގިނަ ފިޔަވަޅުތައް ވަނީ އުވައިލައިފައެވެ.

ރާއްޖެއިން މި ބައްޔަށް ފައްސިވީ މީހުންގެ ޖުމްލަ އަދަދު މިހާރު ވަނީ 178،00އަށް ވުރެ މައްޗަށް ވަނީ އަރައިފައެވެ. މި ބަލީގައި ނިޔާވި މީހުންގެ ޖުމްލަ އަދަދަކީ 298އެވެ.