އިންޑިއާއިން އެއް މިލިޔަން ރުފިޔާގެ ކްރިކެޓް ސާމާނު ހަދިޔާކޮށްފި
އިންޑިއާއިން ރާއްޖޭގެ ކްރިކެޓް ބޯޑަށް އެއް މިލިޔަން ރުފިޔާގެ ސާމާނު ހަދިޔާކޮށްފިއެވެ.
މި ސާމާނު ހަވާލުކޮށްފައި ވަނީ މިއަދު ހަވީރު އެކުވެނި ސިންތެޓިކް ޓްރެކްގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ނައިބު ރައީސް ފައިސަލް ނަސީމާއި ޔޫތު މިނިސްޓަރު އަޙްމަދު މަޙްލޫފާއި ރާއްޖޭގެ ކްރިކެޓް ބޯޑުގެ ރައީސް މުޙައްމަދު ފައިސަލްގެ އިތުރުން އިންޑިއާއިން ރާއްޖެއަށް ކަނޑައަޅުއްވައިފައި ހުންނަވާ ހައި ކޮމިޝަނަރު މޫނޫ މަހާވަރު ވަނީ ބައިވެރިވެ ވަޑައިގެންފައެވެ.
މި ރަސްމިއްޔާތުގައި، އިންޑިޔާގެ މިނިސްޓަރ އޮފް ޔޫތު އެފެއާޒް އެންޑް ސްޕޯޓްސް އޮނަރަބަލް އަނޫރާގް ތަކުރުގެ ވީޑިއޯ މެސެޖެއް ވަނީ ދެއްވައިފައެވެ، މި ވީޑިއޯ މެސެޖުގައި މި އެހީގެ ސަބަބުން ރާއްޖޭގައި ކުރިކެޓް ކުރިއެރުވުމަށް އެހީއަކަށް ވާނެ ކަމަށް އުންމީދު ކުރައްވާ ކަމަށް ވިދާޅުވިއެވެ. އަދި ކުޅިވަރު ކުރިއެރުވުމުގެ ދާއިރާގައި މަސައްކަތް ކުރައްވާ ފަރާތްތަކަށް ޝުކުރު ދެންނެވިއެވެ.
މި ބައްދަލުކުރެއްވުމުގައި އިންޑިއާގެ ހައިކޮމިޝަނަރ ވަނީ، ރާއްޖެއާއި އިންޑިޔާއާ ދެޤައުމުގެ ދެމެދުގައި އޮތް ޒަމާންވީ ރަޙްމަތްތެރިކަމުގެ ގުޅުމުގެ ރަމްޒެއްގެ ގޮތުން، ކުޅިވަރުގެ ދާއިރާއިން ގުޅުން ބަދަހިކުރެއްވުމަށް ބޭނުންފުޅުވާ ކަމުގައި ވިދާޅުވިއެވެ.
މި ރަސްމިއްޔާތުގައި މިނިސްޓަރ މަޙްލޫފް ވެސް ވާހަކަފުޅު ދެއްކެވިއެވެ. މިގޮތުން މަހްލޫފްގެ ވާހަކަފުޅުގައި އިންޑިއާއިން ރާއްޖޭގެ ކުޅިވަރު ކުރިއެރުވުމަށް ދޭ ގާތް ގުޅުމަށް ޝުކުރު އަދާކުރެއްވިއެވެ.
ކްރިކެޓް ސާމާނުގެ ހަދިޔާކޮށްފައިވަނީ ސީބީއެމްގެ އެދުމުގެ މަތިންނެވެ. މިއަދުގެ ރަސްމިއްޔާތަށް ފަހުގައި އިންޑިއާ އާއި ރާއްޖޭގެ ޓީމުތަކުގެ މެދުގައި އެކުވެރިކަމުގެ ކްރިކެޓް މެޗެއްވަނީ ކުޅެފައެވެ.
ރާއްޖޭގައި ކްރެކެޓް ކުރިއެރުވުމަށް މީގެ ކުރިން ވެސް އިންޑިއާއިން ވަނީ އެހީވެފައެވެ. މިގޮތުން، ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާ (ބީސީސީއައި) އިން ރާއްޖޭގެ ކްރިކެޓް ކޯޗުންނާއި އަމްޕަޔަރުންނަށް ތަމްރީނު ޕްރޮގްރާމްތަކެއް ދަނީ ހިންގަމުންނެވެ. މީގެ އިތުރުން އިންޑިއާގެ ޗެންނާއީގައި ހުންނަ އިންޑިއާގެ ޕްރިމިއަރ ސެންޓަރ ފޮރ ސްޕޯޓްސް ސައިންސްގައި މޯލްޑިވްސް ނެޝަނަލް މެންސް އެންޑް ވިމެންސް ކްރިކެޓް ޓީމްތައް ތަމްރީނުކުރުމަށް މިހާރު ދަނީ މަސައްކަތްކުރަމުންނެވެ.
ޢިންޑިއާ މީހުން ކުޅެން ގެނައި ސާމާނު އެއީ
އިންޑިއާމީހުން ކުޅެ ބާވެގެން އުކާލާފަ ހުރި ތަކެތި ގޮނޑުން ހޮވައިގެން ކުލަ ބުރުވާލައިގެން ގެނައީ.