ޝައުނާގެ ދިފާއުގައި ރޮޒައިނާ: ހަނގާކޮށް އަބުރު ކަތިލުމަކީ ސިޔާސީ ދާއިރާއަށް އަންހެނުން ނެރުމަށް އެޅޭ ބޮޑު ހުރަހެއް

ހަނގާކޮށް އަބުރު ކަތިލުމަކީ ސިޔާސީ ދާއިރާއަށް އަންހެނުން ނެރުމަށް އެޅޭ ބޮޑު ހުރަހެއް ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

Ads by STELCO

ރޮޒައިނާ މިހެން ވިދާޅުވީ، މާލޭގެ ކުރީގެ މޭޔަރ ސިފާ މުހައްމަދު އެޑްމިންއަކަށް އިންނަވާ އެމްޑީޕީގެ އަންހެނުން ރޫހުގެ ވަޓްސްއަޕް ގުރޫޕެއްގައި ޝައުނާގެ މައްޗަށް ކޮރަޕްޝަނުގެ ތުހުމަތުތަކެއް ކޮށްފައިވާ ކަމަށް ބުނެ ލިޔެފައިވާ ޚަބަރެއް ހިއްސާކުރައްވަމުންނެވެ.

އެމްޑީޕީގެ ވަޓްސްއަޕް ގުރޫޕެއްގައި ރައީސް ނަޝީދަށް ތާއީދު ކުރައްވާ ފަރާތްތަކުން ކޮށްފައިވާ މެސެޖެއްގައި ބުނެފައި ވަނީ، ތިލަފުށީގައި ކުނި ނައްތައިލާން ހިންގާ ޕްރޮޖެކްޓުން ތިން މިލިއަން ޑޮލަރު ޝައުނާ ނެންގެވި ކަމަށާއި ލިބިވަޑައިގަންނަވާ މުސާރައާ ނުބައްދަލު އަގެއްގައި ހުޅުމާލެއިން އެޕާޓްމަންޓެއް ބައްލަވައިގެންފައިވާ ކަމަށް ވެސް ތުހުމަތުކޮށްފައި ވެއެވެ.

މިކަމަށް ރައްދު ދެއްވަމުން ރޮޒައިނާ ވިދާޅުވީ، އެމްޑީޕީގެ ލީޑަރޝިޕްގައި ތިއްބެވީ ވަރަށް މަދު އަންހެނުން ކަމަށާއި އެ ބޭފުޅުންނަށް ހަނގާކޮށް، ތުހުމަތުތައްކޮށް އަބުރު ކަތިލުން ހަރުކަށި އިބާރާތުން ކުށްވެރި ކުރާ ކަމަށެވެ. އަދި ސިޔާސީ ދާއިރާއަށް އަންހެނުން ނެރުމަށް މި ކަމުން ހުރަސް އެޅޭ ކަމަށް ރޮޒައިނާ ވިދާޅުވިއެވެ.

"އެމްޑީޕީގެ ލީޑާޝިޕްގައި ތިއްބެވީ ވަރަށް މަދު އަންހެން ބޭފުޅުން. އެ ބޭފުޅުންނަށް ޚާއްސަކޮށް ޕާޓީ ތެރެއިން މިގޮތަށް ހަނގާކޮށް ތުހުމަތުކޮށް އަބުރު ކަތިލުމަކީ ސިޔާސީ ދާއިރާއަށް އަންހެނުން ނެރުމަށް އެޅޭ ވަރަށް ބޮޑު ހުރަހެއް. މިކަން ހަރުކަށި އިބާރާތުން ކުށްވެރިކުރަން." ރޮޒައިނާ ކުރެއްވި ޓްވީޓެއްގައި ވިދާޅުވިއެވެ.

މިމަހު 14ވަނަ ދުވަހު ބޭއްވުމަށް ހަމަޖެހިފައިވާ ޗެއަރޕާސަންގެ އިންތިޚާބާ އެކު އެމްޑީޕީ އެތެރެ ވަނީ ވަރަށް ބޮޑަށް ހޫނުވެފައެވެ. ޕާޓީގެ އެތެރޭގައި ދެ ފެކްޝަން އުފެދިފައިވާ އިރު، ދެ ފަރާތުގެ ބޭފުޅުން ގެންދަވަނީ ބަހުގެ ހަމަލާ ބަދަލުކޮށް ކޮރަޕްޝަނާއި ވައްކަމުގެ ތުހުމަތު ކުރައްވަމުންނެވެ.