ނުވިއޭ ކިޔައިފައި ވޯޓެއް ނުހޯދޭ، ހައްލު ހޯދަން ރައްޔިތުން ހަވާލު ކުރީ އަޅުގަނޑުމެންނާ: ރޮޒައިނާ
މިއަދު ސަރުކާރުގައި އޮތަސް އެމްޑީޕީގެ ބައެއް މެންބަރުން އަދާ ކުރަމުން އަންނަނީ އިދިކޮޅު ޕާޓީއެއްގެ ރޯލު ކަމަށާއި ސަރުކާރަށް ނުވާ ކަންކަމުގެ ވާހަކަ ދައްކައިގެން މިއަދު ރައްޔިތުންގެ ވޯޓް ނުހޯދޭނެ ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
އެމްޑީޕީގެ އަންހެނުންގެ ކޮމިޓީގެ ރައީސާ ކަމަށް ވާދަ ކުރައްވާ ރޮޒައިނާ، މިހެން ވިދާޅުވެފައި ވަނީ، އެމްޑީޕީގެ ޗެއަރޕާސަން ކަމަށް ވާދަ ކުރައްވާ ފައްޔާޒާ އެކު، ރޭ ފުވައްމުލަކުގައި ބޭއްވި ކެންޕެއިން ޖަލްސާއެއްގައެވެ.
ރޮޒައިނާ ވިދާޅުވީ، އެމްޑީޕީ ތެރޭގައި ހިތްހަމަ ނުޖެހޭ ކަމެއް ހުރި ނަމަ، އެކަން ކުރަން ހައްލު ޖެހޭނީ އެމްޑީޕީ ތެރޭގައި ކަމަށެވެ. އަދި އެކަމަށް ބަހުސް ކުރުމަށް އޮންނަ ތަނަކީ ރައްޔިތުންގެ މަޖިލިސް ނޫން ކަމަށް ވިދާޅުވިއެވެ.
ފައްޔާޒްގެ ވާދަވެރި ކެނޑިޑޭޓް އިމްތިޔާޒް ފަހްމީގެ ކެންޕެއިން ޓީމުގެ މެންބަރުން ގެންދަވަނީ ތަފާތު އެކި ޕޯޑިއަމްތަކުގައި ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ.
މިފާޑު ވިދާޅުވުންތަކަށް ރައްދު ދެއްވަމުން ރޮޒައިނާ ވިދާޅުވީ، އެމްޑީޕީގެ ވިސްނުމަކަށް ވާން ޖެހޭނީ އާއްމު މެންބަރުންގެ ކަންބޮޑުވުންތައް ސަރުކާރާ ހިއްސާކޮށްގެން، ހައްލު ހޯދުން ކަމަށެވެ.
"ޕާޓީގެ ފަރާތުން އަޅުގަނޑުމެންގެ އާއްމު މެންބަރުންނާ ރަނގަޅަށް ގުޅުން ބާއްވައިގެން، އާއްމު މެންބަރުންގެ ހުރި ކަންބޮޑުވުންތަކަކީ ކޮބައިތޯ ބަލައި، ދާއިރާގެ މެންބަރުންގެ ހުރި ކަންބޮޑުވުންތަކަކީ ކޮބައިތޯ ބަލައި، ސަރުކާރާ ހަމައަށް އެ ވާހަކަތައް ގެންގޮސްގެން، ސަރުކާރު މެދުވެރިކޮށްގެން އެކަންކަމަށް ހައްލު ހޯދަން މަސައްކަތް ކުރަންވީ" ރޮޒައިނާ ވިދާޅުވީ، ޕާޓީއިން ސަރުކާރާ އެކު މަޝްވަރާ ނުކުރާ ކަމަށާއި ނުވާ ކަންކަމުގެ ވާހަކަ ދައްކައިގެން މިއަދު ވިއްކޭނެ ވޯޓެއް ނެތް ކަމަށެވެ.
"އަޅުގަނޑުމެން މިއަދު މިތިބީ ނުވެ ހުރި ކަންކަން މަގުމައްޗަށް ނިކުމެ ހުރެ ކިޔައިގެން ވޯޓް ހޯދޭ ހިސާބަކު ނޫން. ސަރުކާރުގައި ތިބެންޏާ އަޅުގަނޑުމެންނަކީ ހައްލު ހޯދަން ޖެހޭ މީހުން. ރައްޔިތުން ހައްލު ހޯދަން ހަވާލުކޮށްފައި ތިބި މީހުން. އެހެންވީމަ އަޅުގަނޑުމެންނަކަށް މީހެއްގެ ބޮލަށް ޖަހައިފައެއް އަޅުގަނޑުމެންގެ ތެރޭގައި އެއްވެސް މީހަކަށް ސަލާމަތެއް ނުވެވޭނެ"
