މައުމޫންގެ ދިފާއުގައި އެމްއާރުއެމް: މައުމޫން ހައްޔަރުކުރެއްވީ ޔާމީން އަންގަވައިގެން

ކުރީގެ ރައީސް މައުމޫން އަބްދުލްގައްޔޫމް ޖަލަށްލައްވަން ނިންމެވީ ސީދާ ރައީސް އަބްދުﷲ ޔާމީން ކަމަށާއި އެކަމުން ރެކިވަޑައިގަންނަވަން އުޅުއްވުމަކީ ފިނޑިކަން ކަމަށް މޯލްޑިވްސް ރިފޯމް މޫވްމަންޓް (އެމްއާރްއެމް)އިން ވިދާޅުވެއްޖެއެވެ.

Ads by STELCO

ވިލިމާލޭގައި އޮތް ކެމްޕެއިން ހަރަކާތެއްގައި ބައިވެރިވެވަޑައިގެން ރައީސް ޔާމީން ވަނީ އެމަނިކުފާނުގެ ވެރިކަމުގައި ބޭބޭފުޅު މައުމޫން އަބްދުލްގައްޔޫމް ހައްޔަރު ކުރަން ޖެހިވަޑަައިގަތީ، ސުޕްރީމް ކޯޓްގެ ތެރެއިން ދައުލަތް ވައްޓައިލާން މަސައްކަތް ކުރެއްވުމުގެ ތެރޭގައި އެންމެ އިސް މޭސްތިރިއަކަށް ހުންނެވުމުން ކަމަށެވެ. އަދި އެ ނިންމުމަކީ ރައީސް ޔާމީންގެ ނިންމެވުމެއް ނޫން ކަމަށް ވިދާޅުވިއެވެ.

އެކަމާ ގުޅިގެން މައުމޫން ޒައީމްކަން ކުރައްވާ އެމްއާރްއެމްއިން މިއަދު ނެރުއްވި ބަޔާނެއްގައި ވިދާޅުވީ އޭރު ސަރުކާރުގެ ބާރުތަކާއި، ނުފޫޒު އޮތް ގޮތުން އެ ކަމަކީ ސީދާ ރައީސް ޔާމީންގެ ނިންމެވުމަކަށް ނުވެ ހިނގައިދާނެ ހަމަ އެއްގޮތެއް ވެސް ނެތް ކަމަށެވެ.

"އެހެންކަމުން މިއަދު އެކަމުން ރެކިވަޑައިގަތުމަށް ދައްކަވާ ވާހަކަފުޅަކީ ހަޤީޤީ ލީޑަރުންގެ ފަރާތުން ފެންނަ ތިމާގެ ބާރުން ހިނގާ ކަންކަމުގެ ޒިންމާ ނެގުމުގެ ސިފަޔާއި ނުހަނު ބީރައްޓެހި، ފިނޑި ވާހަކަފުޅުތަކެކެވެ." އެމްއާރްއެމްގެ ބަޔާނުގައިވެއެވެ.

އެމްއާރްއެމްގެ ބަޔާނުގައި އިތުރަށް ވިދާޅުވީ، 2018ވަނަ އަހަރުގެ ރިޔާސީ އިންތިހާބުގައި ރައީސް މައުމޫން ރައީސް ޔާމީންއާއި ދެކޮޅަށް އެހެން ސިޔާސީ ލީޑަރުންނާ އެކު ކޯލިޝަން ހައްދަވައި މަސައްކަތް ކުރައްވަން ޖެހިވަޑައިގަތީ ގާނޫނު އަސާސީ އާއި ގާނޫނުތަކުގެ ބާރު ކަނޑުވައިލައި ކޮރަޕްޝަނާއި އަނިޔާވެރިކަން އިސްކޮށް ގައުމު ހަމަ މަގުން ކައްސައިލައިގެން ދާން ފެށުމުން އެކަންކަން އިސްލާހު ކުރެއްވުމަށް އެތައް ގޮތަކުން މަސައްކަތް ކުރެއްވުމަށް ފަހު އެ މަސައްކަތްތައް ނާކާމިޔާބު ވުމުން ކަމަށެވެ.

ވެރިކަން ވައްޓައިލުމަށް ސިޔާސީ ފަރާތްތަކުން ރާވައިގެން ނެރުނު އަމުރެއްކަމަށް އިދިކޮޅުން ތުހުމަތުކުރާ ފެބްރުއަރީ1ގެ ސްޕްރީމް ކޯޓްގެ އަމުރާ ގުޅިގެން ރައީސް މައުމޫން ވަނީ ނުސީދާ ބަސްތަކެއް އަމާޒު ކުރައްވައިފައެވެ. އެ ގޮތުން "ކޭތަ ހިފާނެ"ކަމަށް ރައީސް މައުމޫން ކުރީން ވަނީ ވިދާޅުވެފައެވެ.