ވޯޓް ކަރުދާހުގެ ފޮޓޯ ނަގައިފި ނަމަ ވޯޓް ބާތިލް ވެދާނެ: އެމްޑީޕީ
އަންނަ ހޮނިހިރު ދުވަހު އޮންނަ އެމްޑީޕީގެ ޗެއަރޕާސަން އިންތިޚާބުގައި ވޯޓް ކަރުދާހުގެ ފޮޓޯއެއް ނަގައިފި ނަމަ ވޯޓް ބާތިލު ވެސް ވެދާނެކަމަށް އެމްޑީޕީން ވިދާޅުވެއްޖެއެވެ.
އިންތިހާބުގެ ފަހުގެ ތައްޔާރީތަކާ ގުޅޭ ގޮތުން މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އިންތިހާބު ކޮމިޓީގެ މުގައްރިރު މުޙައްމަދު އިބްރާހީމް މަނިކު ވިދާޅުވީ، ވޯޓް ކަރުދާހުގެ ފޮޓޯ ނެގުމަކީ މިހާރު އާއްމުކޮށްފައިވާ ޤާވާއިދުގެ ތެރެއިން މަނާ ކަމެއް ކަމަށެވެ. ނަމަވެސް އެކަން ކުރާ މީހުންނަށް އަޅާނެ ފިޔަވަޅެއް އަދި އާއްމުކޮށްފައި ނުވާ ކަމަށާއި ނަމަވެސް ފޮޓޯ ނެގުމަކީ ވޯޓް ބާތިލް ކުރެވޭނެ ފަދަ އަމަލެއް ކަމަށެވެ.
"ފޮޓޯ ނަގައިފި ނަމަ، ފޮށީގެ ވެރިމީހާ ނޯޓު ކުރާނެ. ވޯޓު ގުނާ ނިންމުމަށް ފަހު، ވޯޓަށް ބަދަލަށް އައިސްދާނެ ކަމެއް. ޖުމްލަ ވޯޓަށް އަންނަ ބަދަލަކުން. އެއީ ބާތިލު ވޯޓަކަށް ވެސް ވެދާނެ،" މަނިކު ވިދާޅުވިއެވެ.
ޗެއާޕާސަންގެ މަގާމަށް ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީގެ ކެންޕެއިން ޓީމުން ވަނީ މި އިންތިޚާބުގައި ވާދަވެރި ކެނޑިޑޭޓަށް ވޯޓް ހޯދުމުގެ ގޮތުން ސަރުކާރުގެ ކުންފުނިތަކުގެ މުވައްޒިފުންނަށް ވޯޓް ކަރުދާހުގެ ފޮޓޯ ނެގުމަށް އަންގަމުންދާ ކަމަށް ތުހުމަތުކޮށްފައެވެ. އަދި މިގޮތަށް ކަންތައް ވިޔަ ނުދޭން، ވޯޓް ލާ ތަނަށް ފޯނު ނުވެއްދޭ ގޮތަށް ހެދުމަށް އެ ޓީމުން އެދެއެވެ.
