ރައީސް ނަޝީދު ތާއީދު ކުރެއްވި އިންތި ބަލިކޮށް ފައްޔާޒް ޗެއަރޕަރސަންކަމަށް!
އެމްޑީޕީގެ ޗެއަރޕާސަންކަމުގެ މަޤާމު އިކޮނޮމިކް މިނިސްޓަރު ފައްޔާޒް އިސްމާއީލް ކަށަވަރު ކުރައްވައިފިއެވެ. މިހާތަނަށް ލިބުނު ނަތީޖާއިން ބޮޑު ތަނުން ކުރީގައި އުޅުއްވަނީ ފައްޔާޒެވެ.
މިހާރު ލިބިފައިވާ ނަތީޖާތަކުން ޗެއަރޕަރސަންގެ އިންތިޚާބު ކާމިޔާބު ކުރައްވައިފައި ވަނީ ފައްޔާޒެވެ. މި އިންތިޚާބު ފައްޔާޒް ކާމިޔާބު ކުރައްވާފައިވަނީ، ދެން ވާދަ ކުރެއްވި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ބަލި ކުރައްވައެވެ.
އިކޮނޮމިކް މިނިސްޓަރ ފައްޔާޒް އިސްމާޢީލް ވަނީ 28514 ވޯޓް ހޯއްދަވައިފައެވެ. އެއީ ޞައްޙަ ވޯޓްގެ 58 އިންސައްތައެވެ. އިމްތިޔާޒް ފަހުމީއަށް ލިބިވަޑައިގަތީ 42 އިންސައްތަ ކަމަށްވާ 20856 ވޯޓެވެ.
މި އިންތިޚާބުގައި އިންތިއަށް ރައީސް ނަޝީދު ތާއީދު ކުރެއްވި އިރު ރައީސް ޞާލިޙް ތާއީދު ކުރެއްވީ ފައްޔާޒަށެވެ.
އިންތިޚާބުގައި 90،000 މީހުންނަށް ވުރެ ގިނަ މީހުން ވޯޓް ލުމުގެ ޙައްޤު ލިބިފައިވެއެވެ. ވޯޓް ލީ ޖުމްލަ މީހުންގެ އަދަދު އަދި ސާފުވެފައެއް ނުވެއެވެ.
މި އިންތިޚާބު ފާހަގަ ވެގެން ގޮސްފައިވަނީ ވަރަށް ވާދަވެރި އިންތިޚާބެއްގެ ގޮތުގައެވެ. އިންތިޚާބުގައި ވާދަ ކުރެއްވި ދެ ކެނޑިޑޭޓުން ވެސް ވަނީ ރާއްޖޭގެ ހުރިހާ ރަށަކަށް ކެންޕެއިން ދަތުރު ކުރައްވާފައެވެ.
Ads by STO
